[ანალიზი, VIDEO] ეროვნული ლიგა. დინამო (ბთ) 1-0 დილა. გარემო, რომელიც უხდება ფეხბურთს

დინამო (ბთ)-დილა      1:0
16.03. ბათუმი. ანგისა
1:0 საბანაძე (47)
დინამო ბთ (4-2-3-1): ალავიძე - მამუჩაშვილი, გადრანი, გაგოშიძე, ჩალაძე - მანჯგალაძე, ტეიდი - ჯანელიძე (59. გაფრინდაშვილი), ცაცკრიალაშვილი (79. ბ. თევდორაძე), რამოსი (85. ილურიძე) - საბანაძე
სათადარიგოები: გოშაძე, რ. ჭანტურია, ფაცაცია, ნავალოვსკი
მწვრთნელი: გია გეგუჩაძე
დილა (4-2-3-1): გუგეშაშვილი - თორ. გრიგალაშვილი, მირცხულავა, სანტოსი, გიორბელიძე - ნონდი (61. ნონიკაშვილი), რაზმაძე - ნჯოკუ, კუცია (80. ლემპტი), პაიმი (69. ფორტესი)  - სპანდერაშვილი
სათადარიგოები: ბეგაშვილი, ჩადუნელი, კერელეიშვილი, გაგნიძე
მწვრთნელი: გიორგი დეკანოსიძე
გაფრთხილება: სპანდერაშვილი (36), გაგოშიძე (43), თორ. გრიგალაშვილი (60), რაზმაძე (76), ნონიკაშვილი (90), ტეიდი (90)
გაძევება: ნონიკაშვილი (90+4)
არბტრი: . ნინუა

ორივე გუნდს დიდი მოტივაცია ჰქონდა ამ შეხვედრის წინ. საქმე ისაა, რომ იდეალური დასაწყისი არცერთ მათგანს არ გამოუვიდა. "დილა" სულაც მოგების გარეშე იყო აქამდე. ბათუმელებს კი საშინაო გამარჯვება არ ჰქონდათ, ეგ კი არა, საკუთარ მოედანზე გოლიც ჰქონდათ გატანილი...

გორელთა სამწვრთნელო შტაბმა თადარიგში გაამწესა გუნდის ლიდერები - ლევან ნონიკაშვილი და ალვინ ფორტესი. რაც შეეხება "დინამოს", გია გეგუჩაძემ ფლანგელ მცველად დააყენა ამპლუით საყრდენი ვლადიმერ მამუჩაშვილი.

თადარიგში პირველად ვიხილეთ საქართველოს ნაკრების წევრი გიორგი ნავალოვსკი, თუმცა... მხოლოდ თადარიგში. სანაკრებო მატჩების წინ ის კვლავ სათამაშო პრაქტიკის გარეშე რჩება...

კოკისპირული წვიმა და ბევრი მაყურებელი

ბათუმში ძალიან უყვართ ფეხბურთი და ეს ერთხელაც დამტკიცდა. კოკისპირული წვიმის მიუხედავად, სტადიონზე ბევრი მაყურებელი მივიდა. გუნდებმა დაზვერვით დაიწყეს თამაში. პირველი მომენტი "დილას" კართან შეიქმნა გაბრიელ რამოსისა და რატი ცაცკრიალაშვილის კომბინაციის შემდეგ, მაგრამ გოლი არ გასულა.

ძალიან კარგია ასეთი გარემო, ეს უხდება ფეხბურთს და გავრისკავთ იმის დაწერასაც, რომ სადღეისოდ საუკეთესო საფეხბურთო გარემო სწორედ ბათუმშია.

ნახევარმომენტები და რამოსი

რამდენიმე ნახევარმომენტზე ყურადღების გამახვილება არ ღირს. არ ღირს, რადგან მათ არანაირი გავლენა არ მოუხდენიათ თამაშის მსვლელობაზე. სამაგიეროდ, შესანიშნავი იყო რამოსის "გასროლა". ბრაზილიელმა რთული მდგომარეობიდან დაარტყა, მაგრამ მიზანს ვერ მიაღწია.

პირველი ტაიმის ყველაზე სახიფათო მომენტები კი ბოლოსღა შეიქმნა. დამატებულ დროში მიხეილ ალავიძემ ზედიზედ ორჯერ ითამაშა დიდებულად და თავისი გუნდი გადაარჩინა. ჯერ "დილას" ნიგერიელი შემტევი ჯეიკობ ნჯოკუ შეეყარა მას პირისპირ ოდნავ მახვილი კუთხიდან, მერე კი ბათუმელთა გამოცდილმა მეკარემ ნუგზარ სპანდერაშვილსაც არ გაატანინა. არადა, ახალგაზრდა შემტევმა უზადოდ დაარტყა თავით...

საგოლე ანგარიში გახსნილია

დაიწყო მეორე ტაიმი და ბათუმელებმა ეროვნულ ლიგაში პირველი საშინაო გოლი გაიტანეს. გორელებმა ძალიან მიამიტური შეცდომა დაუშვეს დაცვაში, ნიკა საბანაძემ კი ის მშვენივრად შეირგო - მეკარესთან პირისპირ დავიდა და ტრუბუნებმაც იხუვლა - 1:1.

ამის შემდეგ კარგა ხნის განმავლობაში მინდორზე საყურადღებო არაფერი მომხდარა. 71-ე წუთზე კი გორელთა შორის საუკეთესო ნჯოკუმ სისწრაფე ჩართო და მახვილი კუთხიდან დაარტყა კიდეც. ალავიძემ ერთხელაც ითამაშა კარგად და ბურთი კარში არ შეუშვა.

მერე ბენჟამინ ტეიდმა გაილაღა - საჯარიმოში შეაცურა ბურთი, რომელიც ჯერ ლუკა რაზმაძეს მოხვდა, მერე - ბაქარ მირცხულავას, მეკარე ლუკა გუგეშაშვილმა კი შესანიშნავი რეაქციის წყალობით შეძლო ვითარების განმუხტვა.

შეხვედრის ბოლომდე მინდვრის დატოვებამ მოუხდა ლევან ნონიკაშვილს. ახალგაზრდა გორელი პენალტის მონადირებას ცდილობდა, მაგრამ შედეგად წითელი ბარათი იხილა არბიტრ ბაკურ ნინუასგან.

979
მკითხველის კომენტარები / 0 /
მსგავსი ამბები
რუბრიკის სხვა სიახლეები
;