[ანალიზი] მინსკი 2019. ისევ ვერცხლი და ბრინჯაო ევროპულ თამაშებზე 

სამწუხაროდ, საქართველოს თავისუფალი სტილით მოჭიდავეთა ნაკრებმა ოქროს გარეშე დაამთავრა გამოსვლა მეორე ევროპულ თამაშებზე, თუმცა კი ჯამში 4 მედალი მოიპოვა:

2-2 ვერცხლი და ბრინჯაო. გუშინწინ ფინალში გივი მაჭარაშვილი (125) დამარცხდა, ავთანდილ კენჭაძემ (74) კი ბრინჯაო მოიპოვა. გუშინ ვერცხლს ვლადიმერ ხინჩეგაშვილი (65) დასჯერდა, ხოლო ელიზბარ ოდიკაძე (97) მესამეზე გავიდა. 

ხინჩეგაშვილი ფინალში დამარცხდა აზერბაიჯანელ ჰაჯი ალიევთან - 2:10. არადა, მისი ოქრო ჰაერივით გვჭირდებოდა გუნდურ ჩათვლაში, რათა უკრაინა ჩამოგვეტოვებინა. სამწუხაროდ, ხინჩეგაშვილი მორიგი დიდი გამარჯვებისთვის ვერ აღმოჩნდა მობილიზებული და რუს ახმედ ჩაკაევს თუ იოლად სძლია, კიდევ ერთ პრინციპულ მეტოქესთან, აზერბაიჯანელთა სამ-სამგზის ევროპისა და მსოფლიოს ჩემპიონთან, ოლიმპიურ პრიზიორ ალიევთან დამარცხდა. აზერბაიჯანელი მეორედ გახდა ევროპული თამაშების ჩემპიონი. 

ხინჩეგაშვილმა პირველი პერიოდი 0:5 წააგო და თანაც როგორ: თავიდან კომბინაციურად და სწორი ტაქტიკით ჭიდაობდა, რამაც შედეგიც გამოიღო და ალიევი ჯერ ქულით დასაჯეს, მერე კი პასიურობისთვის 30-წამიანი საჯარიმო დრო ჩაურთეს, მაგრამ სწორედ ეს გახდა ჩვენთვის საბედისწერო:

ხინჩეგაშვილმა შეტევა წამოიწყო, მაგრამ ბოლომდე ვერ გადაიყვანა და ალიევმა კონტრშეტევაზე 4 ქულა აართვა. ეს ეპიზოდი ჩვენებმა გააპროტესტეს, რაც, ბუნებრივია, ამაო ჩანდა და კიდევ ერთი ქულით დაგვსაჯეს. ანგარიში 5:0 გახდა და შეხვედრის ბედიც, არსებითად, აქ გადაწყდა. მეორე პერიოდში ხინჩეგაშვილმა ერთხელ კი მოახერხა ჯვარზე კარგად შეკვრა, თუმცა მაშინაც ვერ გადააგდო, მხოლოდ წრიდან გაიყვანა და ერთი ქულა მიიღო. სამაგიეროდ, რამდენჯერმე შეცდა და მეტოქემ მიითვალა ქულები. 

სამაგიეროდ, გაგვახარა ელიზბარ ოდიკაძემ, ვინც დილის შეხვედრაში 3:2 დაამარცხა პოლონელი რადოსლავ ბარანი და დამამშვიდებლის ფინალში გავიდა. იქ უკრაინელ მურაზ მჭედლიძეს შეხვდა და 5:0 მოუგო. 

ვლადიმერ ხინჩეგაშვილი: 
„მედალი ყოველთვის ნორმალურ შედეგად მიიჩნევა და კარგია მისი მოპოვება, მაგრამ, როცა ფინალში ხარ და მარცხდები, აქედან გამომდინარე, კმაყოფილი არ ვარ. ეს ევროპული თამაშების პირველი მედალია, ამ მხრივ კი თუ შევხედავთ, სასიხარულოა. უფრო ტაქტიკურად წავაგე.

თავიდან კარგად დავიწყე ჭიდაობა, მაგრამ პროცესში მეტოქემ შეცვალა სტილი, რაღაც მეც გამომეპარა, რაღაც იმან დამასწრო... თუმცა ჭიდაობაა და ასეც ხდება. 

ელიზბარ ოდიკაძე: „რა თქმა უნდა, აქ ბრინჯაოსთვის არ ვიყავი ჩამოსული, რადგან წინა თამაშებზე ფინალში გავედი და მსურდა იმ შედეგის გაუმჯობესება. სათანადოდ კი ვიყავი მომზადებული, გეგმაც მქონდა შემუშავებული, მაგრამ პატარ-პატარა ტაქტიკური შეცდომები დავუშვი, რის გამოც დავმარცხდი. ამის მიუხედავად, შემდეგ გავაგრძელე ბრინჯაოსთვის ბრძოლა, ეს გზა წარმატებით გავიარე და მოვიპოვე კიდეც მედალი. ამით ძალიან გახარებული ვარ, რადგან ყველა მედალს დაფასება უნდა“. 

ბერძნულ-რომაული ჭიდაობა

მეორე ევროპულ თამაშებში დღეიდან უკვე ბერძენ-რომაელებიც ჩაებმებიან და 60, 67 და 77 კილოგრამების წარმომადგენლები იჭიდავებენ. 
ევროპის ბრინჯაოს მედალოსანი დავით ჩხარტიშვილი (60) საკვალიფიკაციოში იტალიელ ჯაკოპო სანდრონს ხვდება, მოგების შემთხვევაში კი აზერბაიჯანელ საკიტ გულიევს ან ხორვატ ივან ლიზატოვიჩს დაეჭიდება. 

ოლიმპიური პრიზიორი შმაგი ბოლქვაძეც (67) მერვედფინალიდან დაიწყებს, სადაც ავსტრიელ კრისტოფ ბურგერს დაეჭიდება. ამ წყვილიდან გასულს მეოთხედფინალში მეტოქედ სერბი მატე ნემესისა და შვეიცარიელი ანდრეას ვეჩის დუეტიდან უძლიერესი ეყოლება. 

დაბოლოს, ახალგაზრდებში მსოფლიოს ჩემპიონი გელა ბოლქვაძე (77), ვისაც ჩვენი სამეულიდან წილისყრამ ყველაზე მეტად არ გაუმართლა, რადგან უკვე მეორე წრეში რუს ალექსანდრ ჩეხირკინზე გადის. მანამდე ბოლქვაძემ შვედი ალექს კესიდისი უნდა დაამარცხოს. 

* * * 
მინსკში ნაწინასწარმეტყველები ქარიშხალი და შტორმი მაინცდამაინც გუშინ ამოვარდა, ზაზა ნადირაძის ასპარეზობის დღეს. ჩვენი ნაკრების ერთ-ერთ იმედს ქარსა და კოკისპირულ წვიმაში მოუწია ნიჩბების მოსმამ, რასაც ტრავმაც დაემატა და საბოლოოდ უმედლოდ დარჩა, თუმცა კვარცხლბეკამდე ბევრიც არ დაჰკლებია, მეოთხეზე გავიდა.

ბუნებრივია, გამოსვლის შემდეგ ის იმედგაცრუებული იყო ამ ყველაფრით:

- ტრავმამ და კლიმატურმა პირობებმა ძალიან დამწიეს უკან. ძლიერი ქარი იყო, რაც ჩემთვის ცუდი გახლდათ, რადგან მე ვუსვამ მარჯვენა მხრიდან, ხოლო სამეულში შესულები - მარცხნიდან. მაყურებლისთვის იქნებ ძნელი გასაგებია ასეთი დეტალები, მაგრამ ჩვენს სპორტში ძალიან მნიშვნელოვანია. ტრიბუნის ახლოს ვინც იყო, მათ ქარი ნაკლებად უშლიდა ხელს, მე კი შუაში ვიდექი.

წარმოუდგენელი იყო იტალიელის საპრიზოზე გასვლა, მაგრამ კარგ ზოლში იდგა, რამაც წარმატება განაპირობა. მე ბოლომდე დავიხარჯე, მაგრამ კმაყოფილი არა ვარ, რადგან მაყურებელსაც და ქომაგსაც იმედები გავუცრუე. თუმცა ჩვეულებრივი მონდომებით ვივარჯიშებ და, ალბათ, შედეგებიც იქნება. 

ირაკლი თავაძე  მინსკიდან

ყოველდღიური სპორტული გაზეთი "ლელო"
258
მკითხველის კომენტარები / 0 /
მსგავსი ამბები
რუბრიკის სხვა სიახლეები
;