[ანალიზი] რაგბი-ევროპა. თასი ისევ ჩვენია! მოდებაძის ჰეთ თრიკი, გერმანიას 8 ლელო გავუტანეთ

საქართველო-გერმანია 52:3

საქართველო (15-9): ხმალაძე (თოადუა 63), მოდებაძე, შარიქაძე, მალაღურაძე, მათიაშვილი, აბჟანდაძე (კაჭარავა 70), აფრასიძე (ლობჟანიძე 63); (1-8): ჟვანია (მელიქიძე 55), მამუკაშვილი (ჟვანია 70), გიგაშვილი (ჩილაჩავა 55, მატარაძე 75), სუთიაშვილი, ნემსაძე (ჭეიშვილი 63), საღინაძე (გიგაური 63), ცუცქირიძე, გიორგაძე
8ლ: მოდებაძე (3), ხმალაძე, მამუკაშვილი, ლობჟანიძე, შარიქაძე, მალაღურაძე. 6გ: აფრასიძე (5), მათიაშვილი.
სინბინი: ჟვანია

გერმანია (15-9): კლევინგჰაუსი, ფ. ლამერსი, ქემერონ-დაუ, საიმი (აუნალა 60), ფელ. ლამერსი, ჰილზენბეკი (ჰარისი 66), მენცელი (ლაუბშერი 59); (1-8): ნოშტადტი (ბენდერი 60), ბარბერი, ფიუზელი (დიკინსონი 14), შრიოდერი (ნგუნბანე 42), მარქსი, რუპფი, მარტელი (ვილიამსი 51), ოტო.
ს: ჰილზენბეკი
სინბინი: ნოშტტადტი
მსაჯი: ქის ალენი (შოტლანდია)
საქართველოს ნაკრებმა ქუთაისში რაგბი ევროპის გათამაშების მეოთხე ტურში გერმანიის ნაკრები დიდი ანგარიშით, 52:3 დაამარცხა და ჩემპიონის ტიტული ერთი ტურით ადრე გაინაღდა.

„ბორჯღალოსნებმა“ მეტოქეს რვა ლელო გაუტანეს, აქედან ექვსი გარდასახეს და დაგეგმილი გამარჯვება მიითვალეს. როგორც მოსალოდნელი იყო, ბელგიის ნაკრებთან მატჩის მსგავსად, ჩვენი მორაგბეები სულ ხელდახელ შეტევას ცდილობდნენ და საკუთარი 22-მეტრიანი ზონიდანაც ხშირად უტევდნენ.

აღსანიშნავია, რომ ჩვენი მორაგბეების პირველი ორი შეტევა მატჩის დასაწყისშივე შედეგიანად დასრულდა. ჯერ მარჯვენა ფრთაზე მირიან მოდებაძემ გაილაღა, რომელმაც საბოლოოდ სამი ლელო მიითვალა, მერე კი მარცხენა ფრთაზე სოსო მათიაშვილმა შესანიშნავად გადაკიდა ბურთი ლელოსკენ, სადაც ყველას ლაშა ხმალაძემ დაასწრო და გერმანია დაალელოვა. ორივე გარდასახვა გელა აფრასიძემ გაიტანა - 14:0.

ამას გერმანელების ზუსტი საჯარიმო მოჰყვა, რაზეც „ბორჯღალოსნებმა“ მეტოქის ლელოდან ხუთ მეტრში აგორებული მოლით უპასუხეს, რასაც ჩვენი შერკინების კვაჭის შალვა მამუკაშვილის ლელო მოჰყვა. აფრასიძემ ესეც გარდასახა - 21:3.

25-ე წუთიდან მოყოლებული თამაშმა მოედნის ჩვენს ნახევარზე გადაინაცვლა. გერმანელებმა დერეფანი მოიგეს და მოლით შემოგვიტიეს. „ბორჯღალოსნებმა“ თავი წესის დარღვევით დაიცვეს. სტუმრები რამდენჯერმე მოგვეძალნენ. რამდენჯერმე დაჯარიმების შემდეგ არბიტრმა შერკინების ბურჯი ზურაბ ჟვანია გაასინბინა. საქართველოს ნაკრებმა, მიუხედავად იმისა, რომ კაცნაკლული დარჩა, ლელოს დაცვა შეძლო და ანგარიში პირველ ტაიმში აღარ შეცვლილა.

შესვენების შემდეგ გერმანიას ქულათა მარაგის გაზრდის რეალური შანსი აღარ ჰქონია. ჩვენმა მორაგბეებმა კი ერთმანეთზე უკეთესი ხუთი ლელო გაიტანეს. ძალიან ბევრი იმუშავა და ხშირად ქმნიდა უპირატესობას მესამეხაზელი ოთარ გიორგაძე. მატჩის საუკეთესო მორაგბედ კი მირიან მოდებაძე დასახელდა, რომელმაც პირველ ტაიმში გატანილ ლელოს კიდევ ორი დაუმატა. თავი გამოიჩინეს ასევე ლაშა მალაღურაძემ, მერაბ შარიქაძემ და ვასილ ლობჟანიძემ.

მატჩის შემდეგ

მილტონ ჰეიგი, საქართველოს ნაკრების მთავარი მწვრთნელი:
„მატჩის დროს იყო მომენტები, როცა ძალიან კარგი რაგბი ვითამაშეთ, მაქსიმალურად კარგად შევასრულეთ ჩვენი დასახული გეგმა. თუმცა საერთო სურათს თუ გადავხედავთ, ბურთის ფლობის პროცენტული მაჩვენებელი ნამდვილად არ გვქონდა სახარბიელო. ეს კი იმას ნიშნავს, რომ საერთო ჯამში კარგად ვერ გამოვიყურებოდით.

ასეთი ტიპის მატჩებში ბურთს მაქსიმალურად უნდა გაუფრთხილდე და მეტოქეს არაფერი უნდა დაუთმო. ვემზადებით მსოფლიოს თასისთვის, სადაც უმაღლესი დონის გუნდები შეგვხვდებიან და ერთ შეცდომასაც, შესაძლოა, სავალალო შედეგი მოჰყვეს.

მართალია, გერმანიის დამარცხებით რაგბი ევროპის ჩემპიონატი მოვიგეთ, მაგრამ ეს იმას არ ნიშნავს, რომ რუსეთის ნაკრებთან მატჩში რამეს დავთმობთ. ვიცით, მეტოქე კარგად ემზადება ჩვენთან სათამაშოდ და ჩვენც ბოლომდე მობილიზებულები შევხვდებით მათთან შეხვედრას.“
მორიგ შეხვედრას საქართველოს ნაკრები 17 მარტს, კრასნოდარში რუსეთის ნაკრების წინააღმდეგ გამართავს.

IV ტური

რუმინეთი-რუსეთი 22:20
ესპანეთი-ბელგია 47:9

თ მ ფ წ ბ ქ(ს)
1. საქართველო 4 4 0 0 +112 18(2)
2. ესპანეთი 4 3 0 1 29 13(1)
3. რუსეთი 4 2 0 2 +61 11(3)
4. რუმინეთი 4 2 0 2 +18 10(2)
5. ბელგია 4 1 0 3 -128 4(0)
6. გერმანია 4 0 0 4 -92 1(1)

V ტური

17 მარტი
რუსეთი-საქართველო
გერმანია-ესპანეთი
ბელგია-რუმინეთი

ყოველდღიური სპორტული გაზეთი "ლელო"
816
მკითხველის კომენტარები / 0 /
მსგავსი ამბები
რუბრიკის სხვა სიახლეები
;