[ანალიზი] სასიამოვნო ანგარიში დანახული ხარვეზებით. U21. საქართველო 3-0 სლოვენია

საქართველო-სლოვენია            3:0
22.03. გორი. თენგიზ ბურჯანაძე
1:0 ვოდიჩეკი (33-საკ. კარში), 2:0 არაბიძე (47-პენ), 3:0 არაბიძე (89. დავითაშვილის პასით)
საქართველო (3-5-2): გუგეშაშვილი - ბერიაშვილი, ლოჩოშვილი, კობოური - მალი (81. სილაგაძე), ქოჩორაშვილი, კუცია (90. ნინუა), ლაკვეხელიანი (82. ჩოგაძე), არდაზიშვილი (61. ქავთარაძე) - არაბიძე (90. სპანდერაშვილი), ბუღრიძე (61. დავითაშვილი)
სათადარიგოები: სანიკიძე, სამურკასოვი, ფაცაცია, ჯინჯოლავა, ბულისკერია
მწვრთნელი: გია ცეცაძე
სლოვენია (4-5-1): ვოდიშეკი - რომი, პიშჩეკი, ზალეტელი, კარიჩი - ჰორვატი, პეტროვიჩი, დრკუშიჩი (56. სოკლერი), ელსინკი (73. როგელი) - სელარი
სათადარიგოები: არკო, კობლარი, ზაკრაიჟეკი, ოგრინეკი, ზურგა
მწვრთნელი: ლიმოშ გლიჰა
გაფრთხილება: სელარი (50), არაბიძე (57), ქავთარაძე (72), ჰორვატი (83)
არბიტრი: . ვადაჭკორია


ჩვენი ქვეყნის 21-წლამდელთა ნაკრებისთვის ახალი სეზონის გამარჯვებით დაწყება, რასაკვირველია, სასიამოვნოა, მით უფრო, რომ ვძლიეთ არცთუ სუსტ გუნდს, თანაც - 3:0. ჩვენ მოვუგეთ იმ ქვეყნის ნაკრებს, სადაც უნდა ჩატარდეს ევროპის ჩემპიონატი 21-წლამდელთა შორის. ანგარიში ერთობ შთამბეჭდავია, თუმცა, სიმართლე რომ ვთქვათ, ციფრები სრულად ვერ გამოხატავს გუნდებს შორის კლასსა და პოტენციალში სხვაობას...

კონტროლი ბურთზე

...ჩვენი გუნდის თამაშში არსებული ხარვეზების სიმრავლეს ხაზი თავად საქართველოს ნაკრების მწვრთნელმაც გაუსვა. გია ცეცაძის ამ შეფასებას ბოლოს წაიკითხავთ. იქამდე კი ის ვთქვათ, რომ ცეცაძემ ეს ნაკრები ზუსტად ერთი წლის წინ ჩაიბარა და სადებიუტო მატჩში, თან მაშინაც გორში, ფარერებს 1:0 სძლია. გორში ჩვენი 21-წლამდელები ჯერ მხოლოდ იგებენ, თანაც გოლს არ უშვებენ და იმედია, ისრაელთანაც ასე გაგრძელდება...

თავიდანვე გამოჩნდა, რომ საქართველოს ნაკრების მთავარი მიზანი იყო თამაშის სადავეების ხელში აღება ბურთზე კონტროლის გზით. ქართველი ფეხბურთელები მოპოვებულ ბურთს მოედნის ცენტრში ათამაშებდნენ (ზოგჯერ ზედმეტადაც) და შეტევაში დინამიურად გადადიოდნენ.

ხშირად ეძებდნენ თანაგუნდელები გიორგი არაბიძეს, რომელმაც საბოლოოდ დუბლის შესრულება შეძლო და მნიშვნელოვანი როლი შეიტანა გამარჯვებაში. არაბიძეს გატანა მატჩის დასაწყისშიც შეეძლო, როცა გიორგი ქოჩორაშვილმა მშვენივრად გაუთამაშა ბურთი ლუკა ლაკვეხელიანს, ამან კი კარგ პოზიციაში მყოფი კაპიტანი მოძებნა და არაბიძის დარტყმული ხარიხას დიდი მანძილით გადასცდა.

სლოვენიელთა დაცვის ხაზში სივრცეების ნახვა დიდ სირთულეს არ წარმოადგენდა, არადა, სტუმრები სწორედ ამ კომპონენტს ანიჭებდნენ მნიშვნელოვან როლს. მათ სულაც არ უბრძოლიათ ქართველებთან ტერიტორიული უპირატესობის ხელში ჩასაგდებად, რადგან მთავარ მიზნად საკუთარი კარის უსაფრთხოება და კონტრშეტევაში გოლის გატანა აირჩიეს.

...ამასობაში, ცეცაძის გუნდის უპირატესობა თანდათან გამოიკვეთა. არაბიძის გრძელი, მახვილგონივრული გადაცემით ლაკვეხელიანმა ძლიერად დაარტყა და მცირედით ააცილა მიზანს.

33-ე წუთზე გოლიც ვნახეთ - რატი არდაზიშვილმა კუთხური ჩამოაწოდა, რამაც სტუმრების საჯარიმოში ქაოსი გამოიწვია და ამ ქაოსში დავით კობოურისგან გოლიც გადიოდა კარში, მაგრამ ბურთს ხაზის გადაკვეთის საშუალება სლოვენიელთა კაპიტანმა იანეკ პიშჩეკმა არ მისცა - მის მიერ მოგერიებული მეკარე ვოდიჩეკს მოხვდა და ბადეში შევარდა - 1:0.

მოვლენებს ოდნავ წინ გავუსწრებთ და გეტყვით, რომ კობოურმა გარკვეული წვლილი ჩვენი გუნდის მიერ გატანილ მეორე გოლშიც შეიტანა. შესაბამისად, ამ ფეხბურთელმა მწვრთნელის დავალება უკანა ხაზზეც კარგად შეასრულა და შეტევაშიც.

არდაზიშვილიც ხშირად აწუხებდა სლოვენიელთა უკანა ხაზს. ბევრს მოძრაობდა და მცველთა დასახმარებლადაც ჩადიოდა, ამოტანილ ბურთს კი ზუსტი პასებით ანაწილებდა. იმის გამო, რომ უჭირდათ მასპინძელთა იერიშების წესების დაცვით შეკავება, სლოვენიელები ხისტ თამაშსაც არ ერიდებოდნენ. ამიტომ, რამდენჯერმე სახიფათო "სტანდარტულის" შესრულების საშუალება მოგვეცა, ოღონდ, მათი ნაყოფიერად გამოყენება გვმართებდა...

უცვლელი სურათი, შეცვლილი ანგარიში

მეორე ტაიმში საერთო სურათი არ შეცვლილა - საქართველო ისევ დომინირებდა, თუმცა იცვლებოდა მატჩის ანგარიში. ცეცაძის შეგირდების პირველივე იერიშისას საჯარიმო დაინიშნა შეტევის მარჯვენა ფლანგზე. არაბიძემ ჩააწოდა ბურთი, რომელიც შესანიშნავ პოზიციაში მყოფ კობოურს უნდა მისვლოდა, რომ არა წესების დარღვევა სლოვენიელი მცველის მხრიდან. მსაჯმა უყოყმანოდ დანიშნა პენალტი, რომელიც ზუსტად შეასრულა არაბიძემ - 2:0.

გამარჯვებულის ვინაობა თითქმის ნათელი გახდა, ოღონდ, აქ საინტერესო ის იყო, ქართველები "მშრალად" სძლევდნენ მეტოქეს, თუ - ვერა. ამ თვალსაზრისით, მაქს ელსინკმა აგვანერვიულა მეორე გოლიდან მალევე, თუმცა ლუკა გუგეშაშვილის კარი ამ დღეს აუღებელი დარჩა. ცხადია, ამაში ჩვენი გოლკიპერის კარგმა გარჯამაც ითამაშა დიდი როლი. 

შემდეგ, ლიმოშ გლიჰას გუნდმა უწინდელზე უფრო მეტად ამოიწია ზევით. მოედნის ცენტრშიც დროს უფრო მეტხანს ატარებდნენ სლოვენიელები, მაგრამ ამას შედეგზე არ უმოქმედია. მეტიც, ქართველებმა ცალკეულ ეპიზოდებში ისევ მწვავედ "უჩხვლიტეს" მოწინააღმდეგეს. ცეცაძემ კოლეგაზე მეტი ფეხბურთელი გამოსცადა შეცვლებით. სხვათა შორის, სათადარიგოთა სკამიდან თამაშში ჩართულ ჩვენს ფეხბურთელებსაც (მაგალითად, ბექა ქავთარაძეს) შეეძლოთ, ეხეირათ...

მესამე გოლი სტუმრებმა მსაჯის საფინალო სასტვენამდე ცოტა ხნით ადრე, 89-ე წუთზე, სწრაფი კონტრშეტევით მიიღეს. შეცვლაზე შესულმა ზურიკო დავითაშვილმა ზუსტი პასით მეკარესთან პირისპირ გაიყვანა გიორგი არაბიძე, რომელმაც შანსი არ დაუტოვა ვოდიჩეკს - 3:0.

მატჩის შემდეგ

გია ცეცაძე (საქართველოს ახალგაზრდული ნაკრების მთავარი მწვრთნელი): "რასაკვირველია სასიხარულოა ახალი სეზონის დაწყება მოგებით, თან 3:0 და თანაც სლოვენიასთან, რომელიც ხელწამოსაკრავი გუნდი სულაც არ არის. კმაყოფილი ვარ იმით, რომ მოვახერხეთ "მშრალი" ანგარიშით გამარჯვება, თუმცა ხარვეზი ბევრი იყო. სწორედ ასეთი ხარვეზების აღმოფხვრას ემსახურება კიდეც ეს ამხანაგური მატჩები...

სლოვენიამ თითქმის მთელი შესარჩევი ეტაპი "მეორე ნომრად" ითამაშა და ჩვენც ველოდით, რომ ასე გაირჯებოდა. ჩვენს გუნდს ხარვეზები ბევრი ჰქონდა, პირველ ყოვლისა - შეტევაში, კერძოდ დამამთავრებელ ფაზაში. პირველ ტაიმში იყო ეპიზოდები, როცა გაცილებით უკეთესად უნდა გვემოქმედა იერიშებისას. მჯერა, დროთა განმავლობაში ამ თვალსაზრისით აუცილებლად დალაგდება ყველაფერი...

მართალია არც დღევანდელი პაექრობა ყოფილა იოლი, მაგრამ ვფიქრობ, ისრაელთან უფრო რთული მატჩი გველის. ის უფრო შემტევი გუნდია და მათთან თამაში სანახაობის მხრივაც უკეთესი იქნება".

ყოველდღიური სპორტული გაზეთი "ლელო"
992
მკითხველის კომენტარები / 0 /
მსგავსი ამბები
რუბრიკის სხვა სიახლეები
;