[ანალიზი] საქართველო-ისრაელი 71:69. დაწყდა ნერვები, ბოლო წამები... [VIDEO]

- მირჩევნია ცუდად ვითამაშოთ და მოვიგოთ, ვიდრე კარგად ვითამაშოთ და წავაგოთ, - თქვა საქართველოს კალათბურთელთა ნაკრების მთავარმა მწვრთნელმა ილიას ზუროსმა პრესკონფერენციაზე. 

საქართველო
71
ისრაელი
69

 

 

3 დეკემბერი, თბილისი
სპორტის სასახლე

9:11, 25:19, 16:19, 14:15, 7:5

საქართველო: ცინცაძე (34წთ, 14ქ, 3მ, 2პ), მაკფადენი (37წთ, 9ქ, 4მ, 5პ), სანაძე (38წთ, 8ქ, 7მ, 4პ), ბურჯანაძე (12წთ, 6ქ, 5მ), შერმადინი (30წთ, 10ქ, 11მ, 3პ), ბითაძე (30წთ, 18ქ, 7მ, 2ჩ, 3დ), ანდრონიკაშვილი, ფაცაცია (6წთ, 3ქ), ბერიშვილი (17წთ, 3ქ, 2მ), ბოქოლიშვილი (16წთ, 3მ).

ისრაელი: ბართოლომეო (9ქ, 5პ), არიელი, ბლატი (8ქ), დოუსონი (4ქ, 6მ), პნინი (3ქ), კოენი (22ქ, 8მ), ზალმანსონი (4ქ), ჩუბრევიჩი, ლევი, გინატი (10ქ), ზოოსმანი (9ქ).

მსაჯები: მ. კოზლოვსკისი (ლატვია), დ. ზაპოლსკი (პოლონეთი), მ. კარაბილეჩენი (თურქეთი).

 რატომ თქვა? - გაგახსენებთ: ამა წლის სექტემბერში საქართველოს ნაკრებმა თავის ისტორიაში ერთ-ერთი ყველაზე ეფექტური მატჩი ჩაატარა, საბერძნეთს 17 ქულის სხვაობითაც უგებდა, მაგრამ ბოლო წამზე დამარცხდა - 84:85. ასეთ დროს იღბალს დიდი მნიშვნელობა აქვს - ერთმა სამქულიანმა კი არა, ერთმა ორქულიანმა კი არა, გვერდით ერთმა გახედვამ შეიძლება თამაში წაგაგებინოს.

იღბალი კი ისეთი რამაა, ზურგს ერთ მატჩში თუ გაქცევს, მეორეში - მოგაგებინებს. როგორც საბერძნეთთან წავაგეთ, ისე მოვიგეთ ისრაელთან. ამჯერად სპორტის სასახლეში შეკრებილმა 7 ათასმა ქომაგმა ოვერტაიმიც იხილა. დამატებითი დროის ბოლო წამზე გიორგი შერმადინმა პიკ-ენდ-როლი გაითამაშა თად მაკფადენთან, ბურთი ფარქვეშ მიიღო და ფარიდან ასხლეტით ჩააგდო - 71:69. "ჩააგდო" - დასაწერად იოლია, შესასრულებლად ძალიან რთული იყო, გასახსენებლად კი საოცარი - იმ წამმა ხომ სპორტის სასახლეში შეკრებილი გულშემატკივარი ჰაერში აიტაცა და გამარჯვებისა შეაძახებინა.

- საოცარი შეგრძნება იყო, - იხსენებს შერმადინი, - ეს უკვე მოგებას ნიშნავდა, რამაც გამახარა, მაგრამ კიდევ უფრო სასიამოვნო იყო, რომ ქართველ გულშემატკივარს სიხარული მივანიჭე. ისეთი შეგრძნება იყო, თითქოს ფრენა შემეძლო.



რა მოხდა

ქრონოლოგიის აღწერა ხშირ შემთხვევაში მოსაწყენია, თუმცა არა ამ მატჩისას. მოვლენები ხომ იმდენად დრამატულად განვითარდა, ნებისმიერი მძაფრსიუჟეტიანი ფილმის სცენარისტს დააინტერესებდა.

პირველი პერიოდი თანაბარი გამოდგა და სტუმრების გამარჯვებით, 11:9 დასრულდა.
მეორე ათწუთეულის დასაწყისში ეს ანგარიში დუდა სანაძემ სამქულიანით გაალღო. მატჩი თანაბარ ბრძოლაში გაგრძელდა, თუმცა ერთმანეთის მიყოლებით ჩაგდებულმა სამქულიანებმა (ფაცაცია, ბითაძე, მაკფადენი, ცინცაძე) საქართველო 26:17 დააწინაურა.

პირველი ტაიმი 34:30 მოვიგეთ.

მესამე პერიოდის შუიდან ისრაელის ნაკრების კალათბურთელებმა მიზანი გაისწორეს და მეოთხე რაუნდის წინ სხვაობა მინიმუმამდე შეამცირეს - 49:50.
როგორც ასეთი ტიპის თამაშებს ახასიათებს, მატჩის ბოლო წუთები ძალიან დაძაბული გამოდგა და ოვერტაიმის გარეშე არაფერი გამოვიდა.

ძირითადი დროის დასრულებამდე 5 წუთით ადრე ზალმანსონმა 2 ქულა ჩააგდო და სტუმრები 56:52 დააწინაურა. ეს ალოგიკური შედეგი იყო იმის გათვალისწინებით, რომ მანამდე საქართველო უფრო უკეთ გამოიყურებოდა და ერთთავად წინ იყო. ჩვენმა მწვრთნელმა ილიას ზუროსმა წუთშესვენება აიღო, თამაშში დაბრუნებულმა ქართველებმა ორი სამქულიანით (ბითაძე, მაკფადენი) კვლავ მოიპოვეს უპირატესობა - 58:56.

სწორედ 2 ქულის სხვაობით ვიგებდით ძირითადი დროის დასრულებამდე 18 წამით ადრე, თუმცა კოენზე დავჯარიმდით, მანაც ორი საჯარიმო ჩააგდო და 64:64.

ოვერტაიმი ისრაელის სამქულიანით გაიხსნა. გაიხსნა გიორგი ცინცაძეც, რომელიც მსგავს დაძაბულობაში ხშირად აღმოჩენილა და იცოდა რას აკეთებდა. სამქულიანი ჩამორჩენაც მალე აღმოვფხარით და ანგარიშზე 69:69 ბოლო შეტევა ჩვენ დაგვრჩა. ეს სწორედ ის მომენტი იყო, გიორგი შერმადინმა ბურთი მაკფადენისგან რომ მიიღო და გამარჯვების ორქულიანი ჩააგდო. სტუმრებმა მძაფრად გააპროტესტეს - შერმადინი შეტევაში დაჯარიმდაო. არადა, თავადაც კარგად იცოდნენ, რომ ასეთ ჯარიმებს ბოლო წამებზე იშვიათად სტვენენ, მით უმეტეს, მასპინძლების წინააღმდეგ.

- წავაგეთ მსაჯების შეცდომების გამო, - თქვა ისრაელის მწვრთნელმა ოდედ კატაშიმ,

- მაღალი ხარისხის კალათბურთისას, მაშინ, როცა თამაში ძალიან დაძაბულია, მსაჯებიც მაღალი დონისანი უნდა იყვნენ. ფიბა-ს ამ მიმართულებით სერიოზულად აქვს სამუშაო.

ბატონ მწვრთნელს ერთი წლის წინანდელ მაგალითს გავახსენებთ: თელ-ავივში, ევრობასკეტზე ისრაელი ოვერტაიმში რომ დავამარცხეთ, მსაჯებმა სადაო ეპიზოდებში კი არა, არასადაო მომენტებშიც ისრაელის მხარე დაიჭირეს - გემახსოვრებათ, ძირითადი დროის ბოლო წამზე ზაზა ფაჩულიას ერთდროულად ორი მასპინძელი რომ დაახტა, მაგრამ არბიტრებმა სასტვენები გადაყლაპეს... ის მატჩიც მოვიგეთ და 2018 წლის 3 დეკემბარსაც, თბილისში.

რატომ მოხდა

რის წყალობით მოვიგეთ, რატომ დაგვჭირდა ოვერტაიმი? როგორც ჩანს, ესტონეთი-საქართველოს მატჩი კარგად გაშიფრა ისრაელის მწვრთნელმა ოდედ კატაშიმ. იმდენად კარგად, რომ მატჩის ბოლოს სამწამიან ზონაში სათავისო სტატისტიკა დააფიქსირა: ფარქვეშიდან ჩაგდებული ქულებითაც გვაჯობა (20:16), მოხსნის შემდეგ მოპოვებული ქულებითაც (17:11), ხოლო მოხსნებში მხოლოდ 6-ით ჩამოგვრჩა - 43:49.
არადა, ესტონეთში სწორედ ფარქვეშ მოპოვებული უპირატესობით მოვიგეთ.

- ისრაელის ნაკრები ძალიან მჭიდროდ გვეთამაშა, წინახაზელებს გასაქანი არ მოგვცა - ბურთის მიღების შემდეგ, იატაკზე დავაგდებდით თუ არა, მეორე დამცველი მოდიოდა, შემდეგ მესამეც ეხმარებოდა, - იხსენებს გიორგი შერმადინი.

ამიტომაც იყო, მას 10 ქულა რომ ჰქონდა, ხოლო ბითაძემ 18 ქულიდან უმეტესობა შორეული ტყორცნით (3-დან 2 სამქულიანი) და საჯარიმოებით (9-დან 6) მოაგროვა.

მიუხედავად სტუმარი გუნდის კარგი დაცვისა, ილიას ზუროსმა წინა მატჩის მსგავსად დიდი დროით ერთმანეთის გვერდით ათამაშა შერმადინი და ბითაძე. მხოლოდ 12 წუთი ერგო ბექა ბურჯანაძეს...

- ბექა მაღალი დონის კალათბურთელია და განსაკუთრებით კარგად დაიწყო მეორე ტაიმი, - აღნიშნა ილიას ზუროსმა, - თუმცა გადავწყვიტეთ, გადამწყვეტ მომენტში გვეთამაშა ორი ცენტრით, რათა მათ საჯარიმოში შანსი არ მიეცათ ისრაელის წინახაზელებისთვის, ხოლო სამ უკანახაზელს პერიმეტრიდან დაეცვა თავი. როდესაც მოსამზადებლად ძალიან ცოტა დრო გაქვს, დიდი მნიშვნელობა აქვს დაცვას. საერთო სურათზე რა მოგახსენოთ, მაგრამ რიგ ეპიზოდებში დაცვა კარგი იყო. მთავარია გავიმარჯვეთ, ახლა ზეიმის დროა.

ვანო გორგიშვილის ფოტოები

ყოველდღიური სპორტული გაზეთი "ლელო"
979
მკითხველის კომენტარები / 0 /
მსგავსი ამბები
რუბრიკის სხვა სიახლეები