[ანალიზი] ფინალი? - ეს ქართული სენია, რომელიც ზაალიშვილმა ფსიქოლოგიური მდგრადობით გადალახა

ბაქოში მუზარადი ბოლოს მოვირგეთ

ბაქოს "დიდი მუზარადი" საქართველოს ვაჟთა ნაკრებმა სამივე სინჯის თითო მედლით ანუ სამი ჯილდოთი დაამთავრა. ისე მოხდა, რომ სამდღიან ტურნირზე ჩვენებმა თითო დღეს თითო მედალი მოიპოვეს, მაგრამ გემრიელი ლუკმა ბოლოსთვისო და ბოლო ჯილდო ოქრო აღმოჩნდა, რომელიც მძიმეწონოსანმა გელა ზაალიშვილმა მოიპოვა.

ნოდარ მეტრეველის გუნდმა ბაქოში გამოსვლა თემურ ნოზაძის (60) ვერცხლით დაიწყო, რასაც შაბათს ტატო გრიგალაშვილის (81) ბრინჯაო მიჰყვა. ამასთან, მეშვიდე ადგილზე გავიდნენ ჯაბა პაპინაშვილი (60) და ქალებში ტატიანა ლევიცკა-შუკვანი (52). მათ სალიცენზიო რეიტინგში საკმაოდ ქულები შეიმატეს, რაც განსაკუთრებით მნიშვნელოვანი ლევიცკა-შუკვანის შემთხვევაშია. საერთო გუნდურ ჩათვლაში ჩვენი ნაკრები მეშვიდეა, საკუთრივ ვაჟებში კი მხოლოდ მასპინძელ აზერბაიჯანს ჩამორჩნენ.

[VIDEO] როგორ დასცა ზაალიშვილმა შახბაზოვი!.. სამი ქართული მედალი ბაქოში

ზაალიშვილის ფსიქოლოგიური გამარჯვება

ზაალიშვილმა ამ რანგის შეჯიბრებაზე პირველად მოიპოვა ოქრო, რაც მისთვის, უწინარესად, ფსიქოლოგიურად იქნება მნიშვნელოვანი, რადგან განუმტკიცებს საკუთარი ძალების რწმენას. თან მოუგო ძალიან ძლიერ და ჩვენთვის, პირადად მისთვისაც უხერხულ მეტოქეებს: ვირგლა ჰოლანდიელ როი მეიერს, რუს ანტონ კრივობოკოვს, ხოლო მეორე რუს რუსლან შახბაზოვს ურთიერთშეხვედრებში ანგარიში გაუთანაბრა. ფსიქოლოგიისა და საკუთარი ძალების რწმენის კუთხით მას ჯერ კიდევ სჭირდება ანალოგიური გამარჯვებები - თითქოს რიდით ეჭიდავებოდა კონკურენტებს, თითქოს აკლდა აღმაფრენა და შემტევი სული, თუმცა, ვფიქრობთ, მეიერის დონის ფალავანთან მოგება ძალიან წაადგება.

ბედმაც თითქოს განსაცდელი მოუწყო, რადგან ბაქოში პირველ მეტოქედ სწორედ ევროპის მედალოსანი და ჩვენი ტურნირის წლევანდელი ბრინჯაოს პრიზიორი მეიერი არგუნა, ვისაც პირველად ხვდებოდა. ფიზიკურად ზორბა ჰოლანდიელთან პაექრობა წმინდად ძალისმიერ სტილში წარიმართა და დამატებით დროში გადაიზარდა. ჩვენებურს თითქოს დაღლაც დაეტყო, მაგრამ მეტოქე ძლიერი წელისა და ღონის ხარჯზე დაამარცხა, როცა ჩახვეული გარეფეხიდან კუნძივით გადააგდო უკან პირდაპირ ბეჭებზე.

ძალისმიერი გამოდგა მომდევნო გამარჯვებაც რუსეთიდან აზერბაიჯანში გადაბარგებულ რუსტამ კოწოევთან, ვისი უფროსი ძმა ზელიმხან კოწოევი (100) ჩვენთვის მეტად უხერხული მეტოქეა. მეორე წუთი მიმდინარეობდა, როცა კოწოევმა გდება დააპირა და ორივენი ტატამზე დავარდნენ, აქ კი ზაალიშვილმაც გამოავლინა ქვეჭიდში ჭიდაობის მშვენიერი მაგალითი, რითაც წოინა დღეებში სხვა ახალგაზრდებმაც დაგვამახოვრეს თავი და რაც ამ ტურნირზე მეტრეველის ახალგაზრდული კრებულის ერთ-ერთ მახასიათებლად იქცა. ესაა შებოჭვებზე ჭიდაობა, რასაც ჩვენები წინა წლებში კეთროვანივით გაურბოდნენ, ახლა კი თითქმის ყველა ცდილობდა ამას. ზემოხსენებულ ეპიზოდშიც არაფერი მოასწავებდა შებოჭვას და ზაალიშვილიც თითქოს უიმედო ვითარებაში მიუბრუნდა ძირს დავარდნილ მეტოქეს, მაგრამ დააწვა და საბოლოოდ მოიხელთა კიდეც შებოჭვაზე - ესეც მეორე იპონი.

მან ნახევარფინალშიც შებოჭვით მოიგო ახალგაზრდულ ასაკში ქართველთა მრავალგზის გამამწარებელი კრივობოკოვთან, თუმცა ისინიც პირველად შეხვდნენ ერთმანეთს. ჩვენდა სასიხარულოდ, მას საკმაოდ იოლად მოუგო, ოღონდ შედეგიანად მხოლოდ შეხვედრის მიწურულს გამოჰკრა ფეხი. მანამდე ძონძროხა რუსი გვარიანად აჯანჯღარა, თუმცა გდება ვერ გაუკეთა, იმ ეპიზოდში კი ძირს დააგდო და შებოჭა. ზაალიშვილმა ფინალშიც საკმაოდ იოლად მოიგო შახბაზოვთან, ვისთანაც შარშან 23-წლიანთა ევროპირველობაზე დამარცხდა. მეტოქემ ამჯერად ვერანაირი საფრთხე ვერ შეუქმნა მას, ზაალიშვილმა კი ორჯერ დაიჭირა მოძრაობაზე, როცა რუსი ფეხის გამოკვრას აპირებდა, მიაწვა და იქით გადააგორა. პირველად ეს ვაზარი იყო, მეორედ კი - უნაკლო იპონი.

ნოზაძის უმნიშვნელოვანესი იპონი

60 კილოგრამში ნახევარფინალური შეხვედრის დასრულებამდე 1.15 წუთი რჩებოდა, როცა ნოზაძეც და მისი მეტოქეც, მონღოლთა მსოფლიოს ვიცე-ჩემპიონი ამარტუვშინ დაშდავააც ზედა ჩავლების შემდეგ წელში მოხრილები წამით გაჩერდნენ. თითქოს ორივე რაღაცას ელოდა, თუმცა ამ მომენტით უფრო ახალგაზრდა ნოზაძემ ისარგებლა, რომელმაც ახალგაზრდული შემართებით დაასწრო ტიტულოვან მეტოქეს და მოგვერდით ტომარასავით დაახეთქა ტატამს.

ნახეთ 360 გრადუსიანი გდების VIDEO: როგორ დაატრიალა ნოზაძემ მონღოლი 1/2 ფინალში

ალბათ, ეს მის კარიერაში ჯერჯერობით ყველაზე მნიშვნელოვანი გამარჯვება და ერთ-ერთი საუკეთესო იპონი იყო - ის ხომ ამ გამარჯვებით პრესტიჟული "დიდი მუზარადის" ფინალში გავიდა, რაც ათლეტის ხარისხის ნიშანია. ნოზაძე ჯერ 21 წლისაა და მთავარი გამარჯვებები წინ აქვს, თუმცა ამ რანგის ტურნირის ფინალში პირველად გავიდა, ისე კი პარიზის წლევანდელი "დიდი მუზარადის" და თბილისის შარშანდელი ტურნირის მესამე პრიზიორია.

მან მეოთხედფინალშიც მნიშვნელოვანი და რაც მთავარია, ლამაზი გამარჯვება მოიპოვა რუსეთის სახელით მოჭიდავე მომავალ მესამე პრიზიორ იაგო აბულაძესთან, ვისაც ორი ვაზარი აართვა. ის თავიდანვე ეკვეთა "მამლუქს" და პირველივე წამებზე შებოჭვაზე იჭერდა, თუმცა ეპიზოდის ჩაშლით დიდად არ უზარალია - ქამრიდან მალევე აიტატა ხელში და მშვენიერი ბრუნი შეასრულა, შეხვედრის განახლებისთანავე კი გარეფეხის დახმარებით მეორე ვაზარზე ჩაატრიალა.
თუმცა ნოზაძეს ბაქოში იოლი მეტოქე არც ჰყოლია და ყველასთან დამაჯერებლად მოიგო. ერთი შეხედვით, ის თითქოს არ გამოირჩევა ნაირფერი ილეთებით, როგორც - ავთანდილ ჭრიკიშვილი, ბექა ღვინიაშვილი და სხვები, თუმცა ბაქოში ლამის ყველა პაექრობაში განსხვავებული გდებებით მოიგო და რაც მთავარია, ტაქტიკურად იჭიდავა სწორად - პირველ ნომრად, დასწრებაზე, რის გამოც ყველა შეხვედრაში ახერხებდა ინიციატივის აღებას და საკუთარ სტილს კარნახობდა მეტოქეებს. თავიდან მან საკმაოდ ძლიერი ებრაელი დანიელ ბენ დავიდი დააიპონა, როცა შედეგიანად გამოცერა, მერე კი დამატებით დროში კისრულით გადმოიღო ყაზახი მაგჟან შამშადინი.

ნოზაძემ მხოლოდ ფინალური შეხვედრა ჩააგდო ბრაზილიელ ოლიმპიურ პრიზიორ ფელიპე კიტადაისთან, რაც უფრო ტრადიციულ ქართულ სენს უნდა დავაბრალოთ - რატომღაც ჩვენებს უჭირთ ფინალისთვის განწყობა. არადა, თითქოს ცდა არ დაუკლია, მაგრამ აქ დააკლდა ის, რითაც იგებდა მანამდე - ინიციატივის აღება ვერ შეძლო. პირიქით - კიტადაი უფრო აკადემიურად ირჯებოდა და მაჯებიდან ჭიდაობით გასაქანი არ მისცა ჩვენებურს. სხვათა შორის, მანამდე მან ამგვარად დაგვიმარცხა პაპინაშვილიც.

ეს ვერცხლი შიდა კონკურენციის თვალსაზრისით ძალიან მნიშვნელოვანია. ასეთ შეჯიბრებებში ხომ მედლის ხარისხზე უფრო მნიშვნელოვანი ჭიდაობის ხარისხია და ნოზაძემაც უკვე მერამდენედ, საკმაოდ მაღალი დონის ჭიდაობა აჩვენა და დაამტკიცა, რომ ლიდერებს არათუ მშვიდი ძილის საშუალებას არ მისცემს, არამედ თავადაც რეალურად იწევს ლიდერობაზე. დაამტკიცა ისიც, რომ წინა შეჯიბრებებზე მისი კარგი ჭიდაობა შემთხვევითი არ ყოფილა და სტაბილურად ძლიერ ათლეტად ყალიბდება, ვინც არათუ შიდა ასპარეზზე ჩაუქობს, უცხოეთშიც არ ინდობს წონის ლიდერებს და უკვე ბევრ მათგანს "გაუშრო სისხლი".

ბრინჯაოს გრიგალაშვილი

ტატო გრიგალაშვილი დაეუფლა. ის ერთგვარად "ბრინჯაოს კაცად" ჩამოყალიბდა, რადგან უფროსთა ნაკრებში ზედიზედ მესამე მედალი მოიპოვა და კვლავაც ბრინჯაოსი (შეგახსენებთ, რომ ის თბილისის წლევანდელი და ანტალიის ტურნირის შარშანდელი მესამე პრიზიორია), თუმცა გზად ერთი ხმაურიანი გამარჯვებაც მიითვალა - უტიტულო, მაგრამ მსოფლიოს რეიტინგის ლიდერი და ყველასათვის ანგარიშგასაწევი ჰოლანდიელი ფრანკ დე ვიტი დააიპონა.

ამით მან რეიტინგში დე ვიტის პირველნომრობაც შეიწირა, რადგან ქულების მოპოვების შანსი მოუსპო და ებრაელმა საგი მუკიმ გადაუსწრო. მთელი 4 წლით უფროს დე ვიტს 19 წლის ქართველთან შედარებით ფიზიკურ ძალაში გარკვეული უპირატესობა ჰქონდა, თუმცა ეს იყო მისი ერთადერთი უპირატესობა, რაც ქართველმა იოლად გაანეიტრალა სწორი ტაქტიკით და გდების გაკეთების საშუალება არ მისცა.

[VIDEO] დიდებული იპონი და ბრინჯაო ტატო გრიგალაშვილს!

გრიგალაშვილის სასარგებლოდ ისიც მიუთითებს, რომ როცა ორი გაფრთხილება მიიღო (თუმცა იქნებ მსაჯმაც იჩქარა ეს გადწყვეტილებები - ჩვენებური ნამდვილად არ იყო პასიური და არ გაურბოდა ბრძოლას), ყურები კი არ ჩამოყარა, იმდენად გააქტიურდა და ისეთ წნეხში მოაქცია მეტოქე, ბოლო ნახევარ წუთში ისიც ორჯერ გააფრთხილებინა და შეხვედრა დამატებით დრომდე გადაიყვანა. იქ ბევრი აღარ დააცალა მეტოქეს და მე-9 წამზე გარეფეხით ბრუნზე სავაზარედ გადააბზრიალა.

მანამდე რუმინელ ვლად ვისანთან წაივარჯიშა - ცალი ხელით აღებული ჩავლებიდან ისე მარტივად გადააგორა გვერდზე, თითქოს მართლა ვარჯიშზე იყო. ჰოლანდიელის მერე ჰეიდარ ალიევის სახელობის ტურნირზე შეკრებილი აზერბაიჯანელებიც დაადუმა, როცა მასპინძელი მურად ფატიევი დამატებით დროში მესამე გაფრთხილებით ტრიბუნის ბილეთი ამოუბეჭდა, მეოთხედფინალში კი კერკეტ შვედ რობინ პაცეკს მიუჩინა თავისი ადგილი: უკვე ნახევარი წუთის შემდეგ მოგვერდით ვაზარიზე გადმოიღო, ბოლო წუთზე კი შებოჭვაზე დაიჭირა და უიმედო მდგომარეობაში ჩავარდნილმა შვედმა დანებების ნიშნად ხელი დაურტყა.

არადა, იმ ეპიზოდში თითქოს არაფერი მოასწავებდა შებოჭვას - მეტოქეები ფეხზე იდგნენ და გრიგალაშვილმა დგომიდან დაიწყო მოძრაობა, როცა მაჯებიდან ჩავლებით კისრულის იმიტაციით დაბლა ჩააგდო მეტოქე, იქ კი გააგრძელა პოზიციური ბრძოლა შებოჭვისთვის და მიზანსაც უწია. ამ ტურნირზე ჩვენებურმა თუ რამე კარგი თვისება გამოავლინა და ასეთი ბევრი იყო, ერთ-ერთი ქართველებისთვის "აქილევსის ქუსლად" ქცეული დაბლაჭიდში ჭიდაობაა - მუდამ მისდევდა მეტოქეს, თავს არ ანებებდა და ცდილობდა შეხვედრის დაბლა გადაყვანას.

ნახევარფინალში გრიგალაშვილი ბულგარელ ივაილო ივანოვთან უფრო გამძლეობით დაიჩაგრა დამატებით დროში გადასულ, ლამის 8 წუთამდე გაგრძელებულ შეხვედრაში, თორემ მასთანაც მედგრად იბრძოლა და თავიდან უპირატესობაც ჰქონდა, მაგრამ ბოლომდე ვერ გაუძლო ტემპს და მეტოქემ შეხვედრის მე-8 წუთის დასაწყისში გამოიჭირა. სამაგიეროდ, შესვენების შემდეგ ბრინჯაოსთვის შეხვედრა ძველებური აღმავლობით ჩაატარა ბერძენთა დედით ქართველ ალექსიოს დანაციდისთან - მესამე წუთის მიწურულს ქამარში გადავლებიდან პირდაპირ საიპონედ გადატეხა უკან.


60 კგ.
1. ფელიპე კიტადაი (ბრაზილია); 2. თემურ ნოზაძე (საქართველო); 3. ამარტუვშინ დაშდავაა (მონღოლეთი), იაგო აბულაძე (რუსეთი); 7. ჯაბა პაპინაშვილი (საქართველო).
66 კგ.
1. დენის ვიერუ (მოლდოვა); 2. ნიჯატ შიხალიზადა (აზერბაიჯანი); 3. ბოგდან იადოვი (უკრაინა), ბასკხუუ იონდონპერენლაი (მონღოლეთი).
73 კგ.
1. ჰიდაიატ ჰეიდაროვი (აზერბაიჯანი); 2. ტოჰარ ბუტბული (ისრაელი); 3. რუსტამ ორუჯოვი, ტელმან ვალიევი (ორივე - აზერბაიჯანი).
81 კგ.
1. საგი მუკი (ისრაელი): 2. ივაილო ივანოვი (ბულგარეთი); 3. ტატო გრიგალაშვილი (საქართველო), მატიას კასე (ბელგია).
90 კგ.
1. ნემანია მაიდოვი (სერბეთი); 2. მამადალი მეჰდიევი (აზერბაიჯანი); 3. ნიკოლოზ შერაზადიშვილი (ესპანეთი), კრისტიან ტოტი (უნგრეთი).
100 კგ.
1. მიხაელ კორელი (ჰოლანდია); 2. ყაზბეგ ზანკიშიევი (რუსეთი); 3. ბენჯამინ ფლეტჩერი (ირლანდია), ზელიმხან კოწოევი (აზერბაიჯანი).
+100 კგ.
1. გელა ზაალიშვილი (საქართველო); 2. რუსლან შახბაზოვი; 3. ანტონ კრივობოკოვი (ორივე - რუსეთი), ვლადუტ სიმოენესკუ (რუმინეთი).

3959
მკითხველის კომენტარები / 1 /
Leonti
0
"დიდი მუზარადი" - სუფთა რუსული კალკია. Grand Slam - არანაირი კავშირი აქვს რუსულ გადმოთარგმნილ შლემთან და შესაბამის მუზარადთან. როდემდე უნდა ვიყოთ რუსული დამახინჯებული მედიაზონის ქვეშ?
მსგავსი ამბები
რუბრიკის სხვა სიახლეები
;