[ანალიზი+ფოტოგალერეა] VIDEO. ბორჯღალიოსნები. ნარშავი - შოტლანდიასავით ეკლიანი

ამ მატჩმა კიდევ ერთხელ დაამტკიცა ათასჯერ ნათქვამის სისწორე - საქართველოს ნაკრებს რაც შეიძლება მეტი თამაში სჭირდება ასეთი ანუ პირველი დონის ნაკრებებთან.  

საქართველო
10
შოტლანდია
44

საქართველო (15-9) მათიაშვილი (ხმალაძე 55), მოდებაძე, ძნელაძე (მჭედლიძე 57), კაჭარავა, თოდუა, აბჟანდაძე, ლობჟანიძე (აფრასიძე 55) (1-8) ნარიაშვილი (ასიეშვილი 57), მამუკაშვილი, (ჭყოიძე 57), გიგაშვილი (ჩილაჩავა 57), სუთიაშვილი (ლომიძე 69), მიქაუტაძე (ნემსაძე 60), გიორგაძე, საღინაძე, გორგაძე,

ლ: ასიეშვილი; გ: აბჟანდაძე; ს: მათიაშვილი

შოტლანდია: ქინგჰორნი, გრემი, ჰაჩინსონი, ჯონსონი (ჯოუნზი 48) მეითლენდი, რასელი (ჰეისთინგსი 67) ლეიდლოუ (პრაისი 60) (1-8) დელი (ბჰათი 60) მაკინალი (სთიუართი 67) ნელი (ზ.ფეიგერსონი 60) თულისი გილქრისთი, ბარქლეი (ქამინგსი 72) ვოთსონი მ.ფეიგერსონი (სტრაუსი 60)

5ლ: თულისი, ჰაჩინსონი (2), გრემი, ქამინგსი; 5გ: ლეიდლოუ (3), რასელი, ჰეისთინგსი; 3ს: ლეიდლოუ

მსაჯი: პასკალ გოზერი (საფრანგეთი) 

შოტლანდიის ნაკრები გვჯობდა სისწრაფეში, კარგად ორგანიზებულ დაცვასა და შეტევაში. შოტლანდიელი მორაგბეები სწრაფად იღებდნენ სწორ გადაწყვეტილებებს, რაც ერთმნიშვნელოვნად ყველაზე მთავარია.

ისეთი შთაბეჭდილება იქმნებოდა, რომ ისინი წინასწარ დახაზული სქემებით მოქმედებდნენ და ყველამ კარგად იცოდა, როდის რა უნდა გაეკეთებინა. ერთი ზედმეტი ნაბიჯიც კი არავის გადაუდგამს. სწორედ ეს არის დიდი რაგბი, რომლისკენაც მივისწრაფვით და ვითხოვთ დიდ გუნდებთან თამაშს, რომ ჩვენც მათ დონეს მივუახლოვდეთ.

შოტლანდიელების სტუმრობა ქართული რაგბისთვის ისტორიული მოვლენაა. ასეთი მაღალი დონის გუნდი ჩვენს ქვეყანას ჯერ არ სწვევია. შედეგიც შესაბამისი იყო. ბორჯღალოსნებმა 10:44 წააგეს, ასეთი, 34-ქულიანი სხვაობით საქართველოს ნაკრებს შინ არასდროს წაუგია.

ნარშავებმა დასაწყისშივე აქტიურად შემოგვიტიეს. ჩვენი გუნდი დიდ წნეხში მოაქციეს და ბორჯღალოსნებმა რამდენჯერმე სრულიად უხიფათო სიტუაციაში შეცდომა დაუშვეს. ვერაფრით გავწმინდეთ საკუთარი რაკი და მეტოქის რაკშიც თამაშგარედან ვითამაშეთ. შედეგად დროის ძალიან მცირე მონაკვეთში ზედიზედ ხუთჯერ დავჯარიმდით. აქედან ორი, სკოტების ცხრა ნომერმა გრეგ ლეიდლოუმ მე-11 წუთისთვის ექვს ქულად აქცია.

ამას მოედნის ცენტრალურ ნაწილთან უყურადღებო თამაში მოჰყვა, რაც მეტოქემ კარგად გამოიყენა და ხელდახელ ბურთაობით პირველი ლელო მიითვალა. მე-19 წუთისთვის კი, ანგარიში სულაც 20:0 გახდა.

ასეთი დასაწყისი ყველასთვის მოულოდნელი იყო. მატჩის ბედი, ფაქტობრივად, საწყის 20 წუთში გადაწყდა, რადგან 20 ქულის ამოქაჩვა ასეთი დონის გუნდთან უბრალოდ ფანტასტიკის სფეროა. მოგვიანებით, ნელ-ნელა ჩვენი გუნდი დალაგდა. თუმცა, ტაიმი მაინც 3:23 წავაგეთ. ერთადერთი საჯარიმო სოსო მათიაშვილის ანგარიშზეა.

შესვენების შემდეგ, ბორჯღალოსნები უკეთ ათამაშდნენ. შერკინებაში მეტოქე რამდენჯერმე დავაჯარიმეთ. შემტევ და დაცვის მოლშიც ჩვენი ბიჭები კარგად გაისარჯნენ. 57-ე წუთზე მილტონ ჰეიგმა სამივე პირველხაზელი შეცვალა. რასაც მეტოქის ხუთმეტრიანი ზონის ხაზთან მოგებული შერკინება მოჰყვა. რამდენიმე მოკლე დარტყმის შემდეგ, ასევე შეცვლაზე შესულმა გელა აფრასიძემ ბურთი მარცხნივ გრძელ ფრთაზე გაიტანა. ის შერკინების ბურჯ კარლენ ასეიშვილს მიუვიდა, რომელმაც ათიოდე მეტრი მეტოქესთან ბრძოლაში გაიარა და ბურთი ლელოში დაამიწა. თედო აბჟანდაძეს გარდასახვა არ გასჭირვებია - 10:30.

ამის შემდეგ მეტოქის ლელოს აღების რამდენიმე შანსი კიდევ გვქონდა, მაგრამ ვერ გამოვიყენეთ. შოტლანდიელებმა კი, ორჯერ შემოგვიტიეს და ორვე ლელოს გატანით დაასრულეს. საბოლოოდ, როგორც უკვე აღვნიშნეთ, 10:44 დავმარცხდით.

მატჩის საუკეთესო მოთამაშედ სტუმართა მგეზავი ფინ რასელი დასახელდა, რომლის ბრწყინვალე გარჯამ განაპირობა კიდეც სკოტების დალაგებული, შესანიშნავი, აზრიანი თამაში.

გიორგი ჟამერაშვილის ფოტოები

774
მკითხველის კომენტარები / 0 /
მსგავსი ამბები
რუბრიკის სხვა სიახლეები
;