[ანალიზი] ქართველი ახალგაზრდების ტრიუმფი ფინეთში, ევროპის ჩემპიონატზე 

ყველაზე ოპტიმისტურ პროგნოზშიც კი ძნელი წარმოსადგენი იყო ის ტრიუმფი, რომლითაც ძიუდოისტთა ახალგაზრდული ნაკრები გამოვიდა ფინურ ვანტააში ჩატარებულ თანატოლთა ევროპის ჩემპიონატში:

6 ოქრო, 1 ვერცხლი, 2 ბრინჯაო და, რაღა თქმა უნდა, დიდი უპირატესობით მოგებული გუნდური ჩათვლა! ამას გუნდურ პირველობაში მოპოვებული ბრინჯაოც დაემატა და ჯამში ფინეთში ჩვენებმა 10 მედალი მოინადავლეს. 

ეს ჯილდოებსა და სტატისტიკაში გამოხატული წარმატებაა, მაგრამ არსებობს ისეთი მიღწევებიც, რომელიც მედლებსა და ციფრებში არ გამოიხატება.

მაგალითად, ასეთია 81 კილოგრამში გამართული ქართული ფინალი და ორი მედალოსანი 90 კილოგრამში. ამასთან, ბიჭებში ორი წონა გამოვტოვეთ და 7-დან მხოლოდ 5-ში გამოვედით, მაგრამ ლაშა გუჯეჯიანის შეგირდებმა ხუთივეში გაიმარჯვეს! ერთი სიტყვით, ევროპის ჩემპიონატი - ეს ამხელა შეჯიბრება ჩვენებმა საქართველოს პირველობად აქციეს. 

პირად პირველობაში მოპოვებული ამ 9 მედლიდან 7 ბიჭების ნაკრების მონაგარია, 2 კი - გოგონებისა. ბიჭებში ჩემპიონები ქუთაისელი გიორგი თუთაშვილი (66), ხაშურელი (თუმცა, ქარელის სასპორტო სკოლის აღზრდილი) ტატო გრიგალაშვილი (81), თბილისელი ლაშა ბექაური (90), ტყიბულელი ილია სულამანიძე (100) და თბილისელი გელა ზაალიშვილი (+100) გახდნენ. ვერცხლი ვლადიმერ ახალკაცმა (81) მოიპოვა, მესამეზე კი მიხეილ ბექაური (90) გავიდა. გოგონებში ჩემპიონობა თბილისელმა ეთერ ლიპარტელიანმა (57) იზეიმა, მესამეზე კი აბაშელი მარიამ ჭანტურია (70) გავიდა. 

ამ შეჯიბრებამ კიდევ ერთხელ დაამტკიცა, რაოდენ წარმატებული პროექტი აღმოჩნდა „2020“, რომელიც ახალგაზრდების საშეკრებო პირობებში, ინდივიდუალურად მომზადებას და უფროსებში მათ თანდათანობით ჩართვას ისახავდა მიზნად. ამ ბიჭებიდან უმეტესობას მართლაც უკვე აქვს დიდი შედეგები მოპოვებული უფროსებში. ეს მსოფლიოში აპრობირებული მეთოდია, თუმცა ჩვენში, რატომღაც, კრიტიკის ობიექტი გახდა...

ასევე უნდა აღინიშნოს სამწვრთნელო შტაბის კარგი მუშაობა და სწორი სელექციაც. გარდა იმისა, რომ გუნდი კარგადაა მომზადებული, გუჯეჯიანმა და მისმა მწვრთნელებმა შემადგენლობაც სწორად შეარჩიეს.

მათი მხრიდან საკმაოდ თამამი ნაბიჯი იყო არათუ ერთი, არამედ ერთბაშად ორი წონის გამოტოვება - საქართველოში ეს ნამდვილად არაა იოლი; მით უფრო, იმ წონებშიც მოეძევებოდათ მეტ-ნაკლებად ღირსეული მოჭიდავეები, მაგრამ მათ მიერ შემადგენლობის შერჩევისას მიღებული გადაწყვეტილება ზედმიწევნით ზუსტი აღმოჩნდა.

ფინეთში ჩვენი გუნდის ერთადერთი ხინჯი გუნდურ შეჯიბრებაში მარცხი თუ არის - რუსებთან წააგეს, მაგრამ, ეტყობა, პირადი პირველობის შემდეგ გუნდურისთვის ვერ შეძლეს მობილიზება, თუმცა მესამეზე მაინც გავიდნენ. 

ქართული ფინალი
81 კილოგრამში ქართული ფინალი გაიმართა, სადაც ახალი თაობის გამორჩეულად ნიჭიერი ფალავნები - გრიგალაშვილი და ახალკაცი დაუპირისპირდნენ ერთმანეთს.

ახალკაცი შედარებით ახალგაზრდაა, გრიგალაშვილს კი ასაკთან ერთად უფროსებში ასპარეზობის გამოცდილებაც უმაგრებს ზურგს. ის ამ ფინალშიც ფავორიტად მიიჩნეოდა და მოიგო კიდეც, თუმცა თანაგუნდელების შეხვედრა არ იყო მაინცდამაინც დაძაბული და სანახაობრივი - აშკარად იგრძნობოდა, რომ მეგობრობა მეტოქეობაზე წინ იდგა, თუმცა პაექრობა დამატებით დროში გაგრძელდა, გრიგალაშვილმა კი ვაზარით მოიგო.

მანამდე მომავალმა ჩემპიონმა ოთხი შეხვედრა მოიგო იპონით: პირველ შეხვედრაში უკრაინელ დმიტრო პილიპენკოს ჯერ ვაზარიც აართვა, მერე ბოსნიელი ვუკ ელეზი დააიპონა, მას ბრიტანელი ლაჩლან მოორჰადიც ზედ მიაყოლა, ნახევარფინალში კი 20 წამში დააიპონა ლატვიელი ალექსეის ზარუდნევსი.

ფინალამდე ახალკაციც დამაჯერებლად და სულ იპონებით მივიდა: შვეიცარიელი სიმონ გაუჩი და თურქი მუჰამედ კოჯი პირდაპირ იპონებზე დააგდო, რუს ნოვრუზ ნოვრუზოვს და სლოვაკ ალექს ბარტოს კი მანამდე ვაზარიც აართვა. თანაც ორივე დგომიდან წამოიღო კისრულებზე, ძალიან მაღალი ტრაექტორიით, რაც გდებებს კიდევ უფრო მეტ ეფექტურობას სძენდა. 

სამი ოქრო
პირადი პირველობის ბოლო დღეს - შაბათს ჩვენებმა სამივე წონაში გაიმარჯვეს და ფინელებს თუ დარბაზში შეკრებილ ქომაგთ ლამის დააზეპირებინეს ჩვენი ჰიმნი. ამ დღეს 90-ის კვარცხლბეკზეც ორი ქართველი ავიდა. თანაც - მოგვარეები, ბექაურები. ამათგანაც უფრო მეტ იმედებს ლაშა ბექაურზე ვამყარებდით, ვინც ახალგაზრდებში მსოფლიოს მოქმედი ჩემპიონია.

ფინალში მას სულ რაღაც 22 წამი დასჭირდა უნგრელი როლანდ გოზის დასამარცხებლად, ვინც გარედან გამოცერა და ტომარასავით დაახეთქა ტატამს ბეჭებით. ამით მან თანამოგვარის წაგებისთვისაც იძია შური - მიხეილ ბექაური სწორედ უნგრელთან დამარცხდა ქვეჯგუფში. 

ლაშა ბექაურმა ესტონელ სიმონ სულასთან იოლად მოპოვებული გამარჯვების შემდეგ გერმანელ ლუის მალთან უსწრაფესი იპონი მიითვალა - 6 წამში ვარდნაში შესრულებული მოგვერდით დააიპონა. ნახევარფინალში რუს მანსურ ლორსანოვთან უფრო კი გაუჭირდა და დამატებით დროში 8.34 წუთი იჭიდავეს, თუმცა საბოლოოდ მაინც დააიპონა. 

მიხეილ ბექაურმა ქვეჯგუფში ხორვატი იოსიპ ბულიჩი ორი, თურქი მერტ სისმანლარი კი ერთი ვაზარით დაამარცხა, დამამშვიდებელში კი იტალიელი ჯენარო პირელი წმინდად დაჯაბნა, ხოლო შემდეგ ბრინჯაოსთვის უშუალო პაექრობაში რუსი ლორსანოვი მანაც დაიბრიყვა და ვაზარით მოუგო. 

სულამანიძემ კარგი ჭიდაობით დაგვამახსოვრა თავი. ის განსაკუთრებით კარგად იყენებს გარეფეხს, თუმცა მეოთხედფინალში ლატვიელი ემილს გერკენსი მოგვერდით დააგდო ბეჭებზე. მანამდე კოსოვოელი შპეტ ზეკაი გაფრთხილებებით მოახსნევინა, ხოლო ნახევარფინალში უნგრელი ჟომბორ ვეგი გარეფეხით გამოცერა. ფინალში უკრაინელ იევჰენი ვეჰერასაც წმინდად მოუგო.

ზაალიშვილმა წარმატებით დაიცვა შარშან ამავე ასაკში მოპოვებული ევროპის ჩემპიონის ტიტული. თან ამჯერადაც შარშანდელი ფინალი განმეორდა - ისევ გერმანელი ერიკ აბრამოვი დაამარცხა. ზაალიშვილი შარშან მსოფლიოს ჩემპიონიც გახდა, მაგრამ წლეულს დიდი პროგრესი აქვს - ილეთების არსენალიც მეტი აქვს და ხასიათითაც ბევრად უფრო გახსნილია, ლაღი, განწყობაც უკეთესი აქვს, უფრო კონტაქტურიცაა და აღარაა ადრინდელივით შებოჭილი.

განსაკუთრებულ ყურადღებას იქცევდა მისი ქომაგობა და სიხარული თანაგუნდელთა წარმატებისადმი... ერთი სიტყვით, ყველაფერში ეტყობოდა, რომ ირწმუნა საკუთარი ძალებისა, ეს კი მის ჭიდაობაზეც დადებითად აისახა. 

მთლიანობაში, მან ვანტააში ძალიან იოლად გაიმარჯვა. ვერც ბოსნიელმა იგორ ვრაჩარმა, ვერც უნგრელმა რიხარდ შიპოჟმა ნახევარფინალში და ვერც აბრამოვმა ფინალში მას ჯეროვანი წინააღმდეგობა ვერ გაუწიეს. ადამოვს გადაავლო და ქამრიდან აყვანილი იმგვარად დაატრიალა ჰაერში, როგორც იაპონელ ოლიმპიადისა და მსოფლოს ფინალისტ ჰისაოში ჰარასავას გაუკეთა ზაგრების ტურნირის ფინალში, მერე კი ბრუნით დააგდო. 

ამ წონაშიც სულ ცოტა დაგვაკლდა, კვარცხლბეკზე ორი ქართველი რომ გვეხილა - საბა ინანეიშვილი მეხუთეზე გავიდა. ქვეჯგუფში ხორვატ მარსელ სკალეჩთან და ბოსნიელ ვასილ ვუჩიჩითან წმინდა მოგებების შემდეგ (ბოსნიელი გაფრთხილებებით მოახსნევინა) ის მეოთხედფინალში აბრამოვთან დამარცხდა, სანუგეშოში კი იტალიელ ლერონცო აგრო სილვაინს კი აჯობა, მაგრამ შიპოჟთან დამარცხა და მეხუთე ადგილზე დარჩა. 

ჭანტურიას ბრინჯაო
ბოლო ორი დღის განმავლობაში გოგონებში სამი მონაწილე გვყავდა, თუმცა მხოლოდ ერთი ბრინჯაო ვირგუნეთ. მარიამ ჭანტურია შარშანდელ ევროპირველობაზეც მესამეზე გავიდა, თუმცა, ლიპარტელიანისგან განსხვავებით, ამ შედეგის გაუმჯობესება ვერ შეძლო. არადა, შანსი ნამდვილად ჰქონდა, ნახევარფინალში ბრიტანელთა მომავალ ჩემპიონ კელი პოლარდ პეტერსენთან ცოტა მეტი კონცენტრაციით რომ ეჭიდავა და ადრინდელი შემართება გამოევლინა. მან ქვეჯგუფში ორი იპონი მიითვალა - ავსტრიელ ანა-ლენა შუხტერს ვაზარი გაუქვითა და ბოლოს იპონზეც დააგდო, იტალიელი მარტინა ესპოზიტო კი გაფრთხილებებით მოახსნევინა. ასევე სამი გაფრთხილება მიაღებინა ბრინჯაოსთვის ბრძოლაშიც ჰოლანდიელ სილია კოკის და ჯილდოც მოიპოვა. 

სამწუხაროდ, ჩვენები წარუმატებლად გამოვიდნენ მძიმე წონაში: ორივე პირველივე შეხვედრაში დამარცხდა და თანაც ორივე - უკრაინელთან. აქ უფრო მეტად სოფიო სომხიშვილისა გვეიმედებოდა, მაგრამ ის პირველივე შეხვედრაში კრისტინა ჰომანთან, სალომე მაყიშვილმა კი რუსლანა ბულავინასთან წააგო.

დასანანი მარცხი რუსეთთან
პირად პირველობაში ასეთი ტრიუმფალური გამოსვლის შემდეგ გაჩნდა იმედი, რომ გუნდურშიც წარმატებით ვიჭიდავებდით და ჩემპიონობას მოვიპოვებდით. ოპტიმიზმს ისიც ვერ ანელებდა, რომ 73 კილოგრამში მონაწილე არ გვყავდა და იქ 66-ის ძიუდოისტებიდან უნდა დაგვეყენებინა რომელიმე. შარშანდელი ანალოგიური შეჯიბრების მსგავსად, გოგონებმა ამჯერადაც უფრო იყოჩაღეს. 

ჩვენებმა პირველ შეხვედრაში 4:1 მოუგეს ხორვატიას, შემდეგ კი 3:4 წააგეს რუსებთან. დამამშვიდებელში პორტუგალიას 4:1, ჰოლანდიას კი 4:0 მოუგეს და მესამეზე გავიდნენ. 

ყოველდღიური სპორტული გაზეთი "ლელო"
3345
მკითხველის კომენტარები / 0 /
მსგავსი ამბები
რუბრიკის სხვა სიახლეები
;