[ანალიზი] ჭიდაობა ძალადობაა! ვინ რას გმობს?

ჭიდაობის ფედერაციის პრეზიდენტი გეგა გეგეშიძე ჯერაც წინასწარ პატიმრობაში რჩება, საჭიდაო სამყაროში კი ვნებთაღელვა კვლავაც გრძელდება. როგორც უკვე იცით, ორივე სტილით მოჭიდავე ვაჟთა ნაკრებმა მიატოვა დუშეთში დაწყებული შეკრება და თბილისში დაბრუნდა გეგეშიძისთვის მხარის დასაჭერად. ეს სამშაბათს მოხდა და ისინი დუშეთიდან პირდაპირ დიღომში მივიდნენ, პოლიციის სამმართველოსთან, სადაც პრეზიდენტის გათავისუფლების მოთხოვნით აქცია გამართეს, გუშინ კი ჭიდაობის ფედერაციაში შეიკრიბნენ და საკუთარი პოზიცია კიდევ ერთხელ დააფიქსირეს. მათ ფედერაციაში ბრიფინგი გამართეს, რომელსაც ესწრებოდნენ ფედერაციის ხელმძღვანელები, ორივე ნაკრების სამწვრთნელო შტაბების წარმომადგენლები, ვეტერანთა ნაწილი თუ მოქმედი მოჭიდავეები.

მოჭიდავე ზურაბ დათუნაშვილი: არ მინდოდა, რომ გეგა გეგეშიძე ციხეში წასულიყო, ჩემი მოთხოვნაა, ჭიდაობის ფედერაცია დატოვოს

მთელი მათი კომენტარ-შეფასებების აზრი ასეთია: ეს ოჯახის საქმეა და ის უნდა მოგვარებულიყო ოჯახში, გარეთ არ უნდა გასულიყო; მსგავსი ჩხუბი ნებისმიერ ოჯახში ხდება და ეს არაა გასაკვირი. ამიტომ გეგა გეგეშიძე უნდა გამოშვან. თავისუფალი სტილით მოჭიდავეთა ნაკრების მთავარმა მწვრთნელმა გიორგი იანტბელიძემ 11 იანვარს სპორტის სასახლეში მომხდარ მასობრივ ჩხუბს კარგად დაგეგმილი პროვოკაცია, ხოლო პრეზიდენტს ამ პროვოკაციის მსხვერპლი უწოდა. "მინდა, ბოდიში მოვუხადო ჭიდაობის ქომაგს, ეს ამბავი მათ ყურამდე რომ მივიდა. ჭიდაობის ოჯახის ხელმძღვანელს დღეს უჭირს და აქ მის მხარდასაჭერად მოვედით" - განაცხადა მსოფლიოს ორგზის და ევროპის ჩემპიონმა გენო პეტრიაშვილმა.

"ჭიდაობა ძალადობაა. როცა ვჭიდაობ, ვძალადობ. ძალის გამოყენების გარეშე ქულას ვერ მოვიპოვებ" - ეს უკვე ოლიმპიური და მსოფლიოს ჩემპიონის, ევროპის სამგზის გამარჯვებულ ვლადიმერ ხინჩეგაშვილის სიტყვებია. საკუთარი პოზიცია და პრეზიდენტისადმი მხარდაჭერა ასევე დააფიქსირეს მსოფლიოს ჩემპიონმა ზურაბ იაკობიშვილმა და სხვა მოჭიდავეებმა. აზრი გამოთქვეს ვეტერანმა მოჭიდავე ლუკა კურტანიძემ, ექსტრა-კლასის მსაჯმა ედიშერ მაჩაიძემ და სხვებმა.

მომხდარს ასევე გამოეხმაურა განათლების, მეცნიერების, კულტურისა და სპორტის მინისტრი მიხეილ ბატიაშვილი, სპორტის საპარლამენტო კომიტეტის თავმჯდომარის მოადგილე შოთა ხაბარელი და სხვები, რომლებმაც, ძირითადად, დაგმეს ძალადობა.
ამის პარალელურად, მოჭიდავეთა მხრიდან აქა-იქ გაისმა ხმები ზურაბ დათუნაშვილის შესახებაც. დადებითია ის ფაქტი, რომ ისინი მოერიდნენ თანაგუნდელისა და მეგობრის პირდაპირ შეფასებას, თუმცა ეს კი ითქვა, არის თუ არა დათუნაშვილი საჭიდაო ოჯახის წევრი, ამაზე თავად ისაუბროსო. დათუნაშვილს კონკრეტულად ამ თემაზე არაფერი უთქვამს, მაგრამ კონფლიქტზე განცხადება კი გააკეთა. კერძოდ, მან თქვა, რომ მისი მიზანი არ ყოფილა გეგეშიძის დაპატიმრება, მხოლოდ ის სურდა, რომ მას დაეტოვებინა ფედერაციის პრეზიდენტის პოსტი და ეს მოთხოვნა ახლაც ძალაშია. თუმცა ასევე განაცხადა ყველაზე არასასიამოვნოც - შესაძლოა, უცხოეთში წავიდე, ან საერთოდ დავასრულო კარიერაო...

ჩხუბი, სისხლი და სკანდალი სპორტის სასახლეში [ვრცელი ანალიზი]

გეგეშიძის მხარდასაჭერი აქციები თბილისის გარდა, ბათუმშიც გაიმართა. სპორტსმენთა პროტესტი, სავარაუდოდ, ხვალაც გაგრძელდება, ეს კი ნიშნავს, რომ კვლავაც ჩაიშლება საწვრთნელი პროცესი და უკვე დაწყებული შეკრება. ამ პირობებში ისიც საეჭვო ხდება, რომ თვის ბოლოს თავისუფალი სტილით მოჭიდავეთა ნაკრები ნიცაში გაემგზავროს საერთაშორისო ტურნირში საჭიდაოდ. მათ ამ დღეებში უკვე ჩაეშალათ ერთი შეჯიბრება - იანტბელიძეს გუნდის ახალგაზრდა ფალავნების კრასნოიარსკში გაგზავნა სურდა ივან იარიგინის მემორიალზე, მაგრამ ვიზები ვერ მიიღეს, სანაცვლოდ კი ფრანგულ ვარიანტზე გადაერთო, სადაც ლიდერებსაც უპირებდა წაყვანას. ის ამ შეჯიბრებას ევროპის ჩემპიონატისთვის მოსამზადებლად განიხილავს, მომდევნო ეტაპი კი ბულგარეთში დაგეგმილი ტურნირია. ბუნებრივია, თავისი გეგმები ექნებათ ბერძენ-რომაელებსაც, თუმცა მათზე ვერაფერს გეტყვით, ის კი ცხადია, რომ სავარჯიშო პროცესი მათთანაც შეფერხებულია.

არადა, დრო არ ითმენს, მოჭიდავეებს კი სეზონის პირველ ნახევარში ორი მნიშვნელოვანი შეჯიბრება ელოდებათ - ევროპის ჩემპიონატი და ევროპული თამაშები. იმედია, ისინი უახლოეს დღეებში დაუბრუნდებიან სავარჯიშო პროცესს.

ყოველდღიური სპორტული გაზეთი "ლელო"
1829
მკითხველის კომენტარები / 3 /
რეზო
0
შიგნით რო მოგვარებულიყო და გადამდგარიყო ყველასათვის მისაღები იქნებოდა. ისე კი კანონზე მაღლა ვინც დადგება მისიადგილიც ვიცი.
ელიზავეტა
0
ჭიდაობა ძალადობა არ არის! კი ბატონო ძალის გამოცდა არის ტექნიკით , ლამაზი და გონიერი ილეთებით, მაგრამ ეს სულ სხვა რამ არის და არა ძალადობა...ვერ გავიგე დათუნაშვილია დამნაშავე???? სირცხვილია...ჩვენ ხომ უამრავჯერ ვნახეთ კადრები ვინ როგორ მოიქცა. თუ დათუნაშვილის სისხლიანი სახეც არ გინახავთ? რაც შეეხება სახელოვან სპორცმენებს, ბევრჯერ რომ გვიამაყია მათით, იქნებ ერთხელ მაინც წამოსცდეთ და ისიც თქვან რომ საჭიროა ამ შემთხვევაში ყველამ მთელმა ფედერაციამ გეგეშიძიდან დაწყებული სახალხოდ მოუხადონ ბოდიში.
მსგავსი ამბები
რუბრიკის სხვა სიახლეები
;