ანატოლი დემიანენკო: ქართველებისგან სიყვარულს ვგრძნობ, თბილისში ჩამოსვლა მარტო ამისთვის მიღირდა

ტურნირის საუკეთესო მოთამაშე, რომელიც რუბინში საბა კვირკველიასთან მეგობრობდა...

„ზამთრის თასი“ დასრულდა. ქართველი ვეტერანების ნაკრები ლეგენდების ტურნირის ფავორიტად ითვლებოდა, თუმცა ნახევარფინალში ესპანეთთან მოგება ბოლო წამებში ხელიდან გაუშვა და მესამე ადგილს დასჯერდა. ტურნირს ბევრი ცნობილი მოთამაშე ესწრებოდა. „ლელომ“ მათთან კომენტარები ჩაწერა:

ივიცა ოლიჩი, ფიფას ნაკრები: „რამდენიმე ქართველ ფეხბურთელს ვიცნობდი. საქართველოში ჩამოსვლის დიდი სურვილი მქონდა, მაგრამ ეს მხოლოდ ახლა მოვახერხე. მიხარია, რომ „ზამთრის თასზე“ ვითამაშე - ძალიან კარგი ტურნირია და კარგი ფეხბურთელებიც ჩამოვიდნენ - შმიცერი, ბერგერი, ჯერემი, ამავისკა...

მომეწონა ტურნირი, ატმოსფერო და საერთოდ, მსგავსი ტურნირები ფეხბურთში ყოფნის, ძველ მეგობრებთან ურთიერთობის მშვენიერი საშუალებაა. სამწუხაროდ, ფიფას ნაკრები, სადაც მე ვთამაშობდი, ფინალში ვერ გავიდა. მაგრამ აქ ჩამოსვლა და თამაში ჩემთვის მაინც სასიამოვნო იყო“.

ანატოლი დემიანენკო, უკრაინის ნაკრები: „თბილისში ჩამოსვლა და მეგობრების ნახვა ძალიან მიყვარს, რადგან აქ მართლაც უამრავი მეგობარი მყავს და მათთან შეხვედრა ჩვენს მოგონებებს აცოცხლებს. ისევ ის სურათი დამხვდა - მშვენიერი, ნაცნობი გარემო, ძველი მეგობრები და გულშემატკივრები, რომლებისგანაც დიდ სითბოსა და სიყვარულს ვგრძნობ. თბილისში ჩამოსვლა მარტო ამისთვის მიღირდა“.

ჰასან კაბზე, თურქეთის ნაკრები, ტურნირის საუკეთესო მოთამაშე: „ყაზანის „რუბინში“ დავით კვირკველიასთან ვმეგობრობდი, მაგრამ თბილისში არასოდეს ვყოფილვარ და მიხარია, აქ ჩამოსვლის საშუალება რომ მომეცა. თბილისი ძალიან მომეწონა, ლამაზი ქალაქია, ეს ტურნირი კი მშვენიერი წამოწყებაა. „ზამთრის თასზე“ პირველად ვარ. ძალიან გამიხარდა, თურქეთის ნაკრებმა რომ გაიმარჯვა. იმედია, აქ თამაშის საშუალება მომავალ წელსაც მომეცემა“.

ივან კამპო, ესპანეთის ნაკრები: „როცა მსგავს ტურნირებზე მიწვევენ, სიამოვნებით ვთანხმდები ხოლმე, რადგან ფეხბურთის თამაში ისევე მიყვარს, როგორც - საუკეთესო წლებში. წლები კი მომემატა, მაგრამ ამით ფეხბურთისადმი ინტერესი და სიყვარული არ გამნელებია, შესაძლოა, უფრო - პირიქით. კარიერა დიდი ხანია დავასრულე და იშვიათად რომ ვთამაშობ, მოედანზე გასვლა და ბურთის გაგორება უფრო მენატრება. საწყენია, რომ ფინალი წავაგეთ, მაგრამ ასეთ ტურნირებზე მთავარი ძველი მეგობრებისა და მეტოქეების მონახულებაა. თუ დამპატიჟებთ, მომავალშიც სიამოვნებით გეწვევით“.

კახა კალაძე, ტურნირის საუკეთესო ბომბარდირი: „მივესალმები ამ ტრადიციას, რომ ყოველ წელს იმართება „ზამთრის თასი“. ჩვენს დედაქალაქში სხვადასხვა ქვეყნის ვარსკვლავი ჩამოდის და მიხარია, რომ ბევრი გულშემატკივარი მოდის, მათ შორის, ახალგაზრდები, მოჰყავთ ბავშვები... სამწუხაროდ, ფინალში ვერ გავედით, რადგან ნახევარფინალში ესპანეთთან დავმარცხდით და ამჯერად, მესამე ადგილზე გავედით. მაგრამ ეს ფეხბურთია და ყოველთვის ვერ მოიგებ. რატომ ვითამაშე თავდასხმაში? სხვათა შორის, წინ თამაში სულ მიზიდავდა, ახლა ვცადე და, როგორც ხედავთ, შეტევა ცუდად არ გამომდის“.

ლევან კობიაშვილი, სფფ-ის პრეზიდენტი: „ეს მშვენიერი პროექტია, რომელმაც დანიშნულება სამივე ტურნირზე გაამართლა - ბავშვებშიც, ეროვნული ლიგის გუნდებშიც და ლეგენდების გათამაშებაშიც. არაერთი ვარსკვლავი ჩამოვიდა და გულშემატკივარს მათი მოედანზე ხილვის საშუალება მიეცა. შესაძლოა, მომავალში გუნდების რაოდენობა გაიზარდოს და ბუნებრივია, ვარსკვლავები კიდევ ჩამოვლენ. იმედია, ტურნირის განვითარებას მოვახერხებთ“.

ყოველდღიური სპორტული გაზეთი "ლელო"
4140
მკითხველის კომენტარები / 0 /
მსგავსი ამბები
რუბრიკის სხვა სიახლეები
;