ანდორასთან ფრეს გამართლება არ აქვს...

გიორგი ქოჩორაშვილი ესპანეთში წლეულს, ზაფხულში წავიდა და ლა ლიგაში ახალაღზევებულ "ჟირონაში" ჩაირიცხა. "საბურთალოსა" და საქართველოს 19-წლამდელთა ნაკრების საყრდენი ნახევარმცველი კატალონიური კლუბის დუბლშემადგენლობაში ვარჯიშობს.

ქოჩორაშვილმა საქართველოში გამართულ 19-წლამდელთა ევროპის ჩემპიონატზე ჩვენი ნაკრების შემადგენლობაში სამივე შეხვედრა ჩაატარა და ევროფორუმის შემდეგ "ჟირონასთან" კონტრაქტი მალევე გააფორმა 1+1 სისტემით. ის "საბურთალომ" იჯარით გაუშვა და როგორც მაშინ ითქვა, ესპანეთში 2 წელი ითამაშებდა და ამის მერე გადაწყდებოდა, გადაიხდიდა თუ არა "ჟირონა" გამოსასყიდ თანხას.

ქოჩორაშვილს ესპანეთში დავუკავშირდით და ინტერვიუ ჩავწერეთ.

- წასვლისას სოციალურ ქსელში ესპანეთში გადასვლა ასე შეაფასეთ: "ახალი ცხოვრება იწყება". გამართლდა თქვენი იმედები? როგორ აგეწყოთ ესპანეთში საქმეები?

- ძალიან კარგ სიტუაციაში მოვხვდი და ყველაფერი ადვილად დალაგდა. ენის შესწავლაც ნაწილობრივ მოვახერხე, რაც აქ ცხოვრებაშიც მეხმარება და გუნდშიც.

- როგორც ვიცით, "ჟირონას" დუბლებში თამაშობთ...

- "ჟირონას" 19-წლამდელთა გუნდში რამდენიმე თამაში ჩავატარე და ძალიან კმაყოფილები არიან. ამას გარდა, მეორე გუნდშიც რამდენჯერმე მავარჯიშეს და ერთი ამხანაგური თამაშიც ჩავატარე. დიდი ალბათობით, ოფიციალური თამაშებიც მალე მომიწევს.

- ძირითად "ჟირონაში" გადასვლაზე ჯერ ლაპარაკი არ არის?

- რაც შეეხება პირველ გუნდში გადასვლას, ძალიან დიდი კონკურენციაა და იქ თამაში მხოლოდ საუკეთესოებს უწევთ. ამიტომ ყოველ ვარჯიშსა და თამაშზე ვცდილობ, მაქსიმუმი ვაჩვენო. მახარებს, რომ ძალიან კარგად მეპყრობიან და საერთოდ, ახალგაზრდებს დიდ ყურადღებას აქცევენ.

- რა იყო ადაპტაციის პერიოდში ყველაზე რთული?

- სხვათა შორის, ადაპტაცია არ გამჭირვებია - უცხო გარემოსთან შეგუების პრობლემა არ მქონია. მაგრამ იმასაც ვერ ვიტყვი, რომ საერთოდ უმტკივნეულო გახლდათ - ყველაზე რთული მაინც ოჯახისგან შორს ყოფნა აღმოჩნდა. ცხოვრებას ახლა ვსწავლობ და ძალიან დიდ გამოცდილებას ვიძენ. მაგრამ ტელეფონის და კომპიუტერის საშუალებით მათთან კონტაქტი ძალიან მიადვილდება და ეს მახარებს. ოჯახის წევრებთან თითქმის ყოველდღე ვსაუბრობ, რადგაც ისინი ჩემ გვერდით იდგნენ, დგანან და იდგებიან.

- ზაფხულში "ჟირონასთან" იჯარა გიმთავრდებათ. ესპანეთში დარჩებით თუ საქართველოში დაბრუნდებით?

- იჯარა 1+1 სისტემით არის გაფორმებული. ზაფხულში პირველი წელი მთავრდება და 90 პროცენტით შეიძლება ითქვას, რომ "ჟირონაში" კიდევ ერთ წელიწადს გავატარებ. შემდეგ უკვე მათი გადასაწყვეტი იქნება, "საბურთალოსგან" გამომისყიდიან თუ არა.

- ბოსნიაში გამართულ 19-წლამდელთა შესარჩევ ციკლში ნაკრების კაპიტანი იყავით და ახსნაც გექნებათ. რა დაემართა გუნდს?

- უფრო შეუთამაშებლობას დავაბრალებ, იმიტომ, რომ ბიჭებს ძალიან ცოტა ხნით მოგვიწია ერთად ყოფნამ. შესარჩევ ეტაპამდე სულ რაღაც 4 თამაში გავმართეთ და, ალბათ, გავლენა ამან იქონია.

- მაგრამ ანდორასთან ფრეს ესეც ვერ ახსნის. ასეთ არასაფეხბურთო, პატარა ქვეყანასთან ფრე ქართველი გულშემატკივრისთვის დიდი იმედგაცრუება და დარტყმა აღმოჩნდა...

- ამის ახსნა შეუძლებელია და არც ვცდილობ, რომ თავი გავიმართლო. ფეხბურთში არასდროს იცი, რა მოხდება. დღეს ყველამ თამაში თუ არა, კარის დაცვა მაინც ისწავლა.

- ძნელი წარმოსადგენი არ არის, თამაშის შემდეგ რას განიცდიდით...

- ეს ძალიან განვიცადეთ. მაგრამ შევძელით და ყოველივე ამის შემდეგ საფრანგეთის თამაშისთვის დავიწყეთ მზადება, რადგან გვინდოდა, დაგვერწმუნებინა ქართველი ხალხი, რომ ფეხბურთის თამაში მართლა შეგვიძლია და არ ვიმსახურებდით ისეთ კომენტარებს, რაც მატჩის შემდეგ დაგვიწერეს. ვინც საფრანგეთთან ჩვენს თამაშს უყურა, ბიჭების სულისკვეთებას აუცილებლად დაინახავდა - სტადიონზე მათ ყველაფერი გააკეთეს იმისათვის, რომ ქართველი ხალხი ცოტათი მაინც გაეხარებინათ.

- საერთოდ, ბოლო წლებში ქართულ ფეხბურთში დიდი კრიზისია. ამის შემხედვარეს, ხვალინდელი დღის იმედი ხომ არ გიქრებათ, ან რა სტიმული გაქვთ?

- პირიქით, ისეთი თაობა და ისეთი ფეხბურთელები მოდიან, ჩემი აზრით, მალე მოხდება ის, რასაც ქართველი ხალხი ამდენი ხანია ელის. სტიმული კი ძალიან ბევრია - ყველაზე გამორჩეული სტიმულია, რომ ეროვნულ ნაკრებში ვითამაშო და მასთან ერთად დიდ წარმატებას მოვაღწიო - ეს არის ჩემი ოცნება.

ყოველდღიური სპორტული გაზეთი "ლელო"
572
მკითხველის კომენტარები / 0 /
მსგავსი ამბები
რუბრიკის სხვა სიახლეები