ანსუ ფატის ცხოვრება - გაიცანით ბარსას 16 წლის ვუნდერკინდი

„ბარსელონას“ 16 წლის ვუნდერკინდმა ანსუ ფატიმ პრიმერას ბოლო ტურში „ვალენსიას“ წინააღმდეგ გოლი და საგოლე პასი მიითვალა, რის შემდეგაც მთელი საფეხბურთო სამყარო აალაპარაკა...

თითქმის ათი წლის წინ, ესპანეთის ქალაქ ერერას მუნიციპალურ სტადიონზე ფეხშიშველი ბიჭი მივიდა. „მას მარტო საცურაო ტრუსები ეცვა, თავის ასაკთან შედარებით მაღალი იყო. და ძალიან გამხდარი. და ისეთებს აკეთებდა! - იხსენებს ადგილობრივი კლუბის კოორდინატორი ხოაკინ სანჩესი. - შოკირებულნი ვიყავით, არ გვესმოდა ვინ იყო. ერთი ცხადია: ბიჭს შეუძლია ფეხბურთის თამაში. ჩვენმა ბიჭებმა ვერაფრით შეძლეს მისთვის ბურთის ართმევა“.

ის, რაც ანსუს მაშინ თავს გადახდა, შემთხვევითობა არ ყოფილა. ფეხბურთისადმი სიყვარული მას მამისგან გენეტიკურად გადაედო. ბორი ფატი გვინეაში ადგილობრივი „ბენფიკა-დე-ბისაუს“ რიგებში თამაშობდა. ასე გრძელდებოდა იქამდე, სანამ 1998 წელს, მისი ცოლი ანსუს უფროს ძმაზე ბრაიმზე არ დაფეხმძიმდა. ბორი ცოტას შოულობდა. იმისთვის, რომ ოჯახი გამოეკვება, ჯერ პორტუგალიაში გაემგზავრა, შემდეგ ესპანეთში ძმასთან. კორდობასა და მალაგას შორის სწრაფი მატარებლის ხაზის მშენებლობისთვის პერსონალი იყო საჭირო, ასე რომ, ის ერერაში დამკვიდრდა.

სახელმწიფო სარკინიგზო კომპანია Renfe-ში სამუშაოების დასრულების შემდეგ, ბორის ყველგან სთავაზობდნენ სამსახურს ქვის მტეხავის, ოფიციანტის ან მენაგვის პოზიციაზე, მაგრამ ყოველთვის ასე არ ხდებოდა. რთული დროება 2008 წელს დასრულდა, როცა ის გახდა მერინალედას მერის ხუან მანუელ სანჩეს გორდილიოს მძღოლი.

ბორიმ, როგორც იქნა, მოიპოვა ეკონომიკური სტაბილურობა და ოჯახი ესპანეთში გადაიყვანა. ბავშვებზე ზრუნვის დრო არ ჰქონდა, ამიტომაც ეჭვიც არ აუღია მეორე ვაჟის ვირტუოზულ შესაძლებლობებზე. „ანსუს ბავშვობამ უჩემოდ ჩაიარა. არც კი ვიცოდი, რომ გვინეაში ის ფეხბურთს თამაშობდა.

ყურადღებას არ ვანიჭებდი, როცა მინდორზე წაყვანას მთხოვდა. ერთხელ, სამუშაოდან შინ დავბრუნდი და ესპანეთში ჩვენი სახლის კართან დავინახე მეზობლებისა და მოზარდების ბრბო, რომლებიც ჩემს ვაჟს აკვირდებოდნენ. მეზობლები აღფრთოვანებულნი იყვნენ: „შეხედე, როგორი ბიჭი გეზრდება! ამ ბავშვმა პროფესიულ კლუბში უნდა ითამაშოს“, - მოჰყვა ოჯახის უფროსმა რადიო COPE-სთან ინტერვიუში. ანსუს აღარ შეეძლო ლოდინი, ესპანეთში გადასვლიდან რამდენიმე დღის შემდეგ, ის ძმასთან ერთად უახლოეს სტადიონზე გაემგზავრა.

ადგილობრივ კლუბ „ერერაში“ მისთვის მაშინვე მოინახა ადგილი. „დაუჯერებელი ბავშვია. გვინეაში ანსუს ბურთი არ ჰქონდა, მაგრამ მას წინდებისგან აკეთებდა. პრაქტიკულად ყოველგვარი ახსნისა და სწავლის გარეშე ქმნიდა სახიფათო მომენტებს. ძალიან მალე შეეწყო გუნდში პარტნიორებს. ერთხელ ჭრილობა მიიღო და ექიმებმა დასვენება ურჩიეს, მაგრამ მინდორზე გავიდა და იმ მატჩში გაიტანა“, - აღნიშნა ანსუს პირველმა მწვრთნელმა იორდი ფიგეროამ.

ორი თვეც არ იყო გასული, რომ საუკეთესო კლუბების წარმომადგენლებმა ფატის კარზე სიარული დაიწყეს. პირველი იყო პაბლო ბლანკო, „სევილიას“ ახალგაზრდული გუნდის დირექტორი. ერთ-ერთ საბავშვო ტურნირზე მან ანსუში დიდი პოტენციალი დაინახა და სახელიან კლუბში მიიყვანა

. შემდეგ მივიდნენ პაკო დე გრასია „რეალიდან“ და ალბერტ პუიგი „ბარსელონადან“. „რეალმა“ სარფიანი წინადადება გაუკეთა, კარგი ფული შესთავაზა, მაგრამ ვალდებებასაში არ იყო საერთო საცხოვრებელი. არ მინდოდა ბიჭს „სევილიას“ კანტერა დაეტოვებინა. პუიგმა კი უთხრა, რომ „ლა მასიაში“ ყველა პირობა იყო შექმნილი, ისინი იზრუნებდნენ ანსუზე და მისთვის სპეციალური პროექტიც ჰქონდათ მომზადებული. საბოლოოდ, მე „ბარსელონა“ ავირჩიე“, - იხსენებდა Rac 1-სთვის მიცემულ ინტერვიუში ბორი. „სევილიას“ პრეზიდენტმა ხოსე მარია დელ ნიდომ კატალონელებთან შეთანხმებაზე შეიტყო, ძალიან გაბრაზდა და ბიჭი ცხრა თვით ჩამოაცილა თამაშებს. ანსუს ფორმა რომ არ დაეკარგა, „რეალის“ გულშემატკივართა ფანკლუბთან „სექსტაკამპეონეს დე ერერასთან“ ვარჯიშობდა.

დრო შეუმჩნევლად გარბოდა და 10 წლის გარემარბი მორიგ გადაბარგებასა და „ბარსელონას“ სკოლაში ახალ ცხოვრებას ელოდა. მოთამაშის აგენტის ხოსეპ მარია მინგელის წყალობით, ანსუს დედამ რამდენიმე თვე გაატარა კატალონიაში, რათა ბავშვს იოლად გაევლო ადაპტაცია. და ბავშვთა „A“ გუნდში პარტნიორებზე ერთი წლით პატარა ფატიმ 56 გოლი გაიტანა, შემდეგ მოიგო პრესტიჟული ტურნირი MIC და საუკეთესო ბომბარდირის ტიტულიც (7 გოლი) დაისაკუთრა.

2015 წლის ბოლოს, მან მძიმე ტრავმა მიიღო (მარჯვენა ფეხზე ორმაგი მოტეხილობა), მაგრამ ამან არ გატეხა ფატი. როცა ანსუ იუნიორთა „B“ გუნდამდე მივიდა, მამა ძველი სამსახურიდან წავიდა და მისი აგენტი გახდა. მთელ თავისუფალ დროს ფეხბურთელი მშობლებთან ერთად ატარებდა ნაქირავებ ბინაში - ის მდებარეობდა ბარსელონადან 10 კილომეტრის მოშორებით მუშათა რაიონში. სიჯიუტე და ხასიათი დაეხმარა ანსუს - საუკეთესო ფორვარდად დაესრულებინა შარშანდელი სეზონი იუნიორთა „A“ გუნდში (15 გოლი). მოგვიანებით, „ლა მასიამ“ ბიჭის ორი ძმა შეიკედლა: უფროსი (21 წლის) იჯარით „კალაორეში“ თამაშობს, უმცროსი ლიონელ მესის ვაჟთან ერთად ვარჯიშობს.

„ბარსელონას“ მთავარი მწვრთნელი ერნესტო ვალვერდე „ბეტისთან“ პრიმერას მეორე ტურის წინ მესის, ლუის სუარესისა და უსმან დემბელეს გარეშე დარჩა.

პირველად დიდი ხნის შემდეგ, მან მზერა მიაპყრო მეორე შემადგენლობას. ესპანელი სპეციალისტი U19-ის გუნდში 16 წლის ფატის შთამბეჭდავი წინასასეზონო მომზადების შთაბეჭდილების ქვეშ იყო და ვუნდერკინდი თამაშზე გამოიძახა. „ანსუ პარტნიორებზე სამი წლით უმცროსია, მაგრამ მათ არაფერში ჩამოუვარდება. მე ვხედავ, როგორ შეუძლია დაეხმაროს პირველ გუნდს. მომწონს, როგორ შედის თამაშში და სწრაფად კრეფს სიჩქარეს“, - ახსნა მწვრთნელმა.

შეხვედრამდე რამდენიმე საათით ადრე, „ბარსელონას“ ყოფილმა მეკარემ და ამჟამად, იუნიორთა „A“ გუნდის მწვრთნელმა ვიქტორ ვალდესმა მოთამაშეს უთხრა: „თუ „კამპ ნოუზე“ გახვალ, დაკტბი თითოეული წუთით, უბრალოდ, აკეთე ის, რაც იცი“.

78-ე წუთზე, როცა „ბარსელონას“ უკვე მიჰყავდა ანგარიში, ანსუმ ფეხი შედგა „კამპ ნოუს“ ბალახზე - მან მეორე შემადგენლობის მეორე წევრი კარლეს პერესი შეცვალა. ბიჭს სულ რაღაც ათი წუთი ეყო იმისთვის, რომ ვალვერდეს გადაწყვეტილების სისწორე დაემტკიცებინა.

„მე ყველაზე ბედნიერი ადამიანი ვარ. ახლა შემიძლია მშვიდად მოვკვდე. ვიცი, რაოდენ ძალისხმევად დაგვიჯდა ეს“, - გული აუჩუყდა მამას, რომელიც ზეიმობდა ტრიბუნაზე მთელს ოჯახთან ერთად. მისი ვაჟი მინდორზე 16 წლისა და 298 დღის ასაკში გავიდა. ეს მეორე მაჩვენებელია კატალონური კლუბის ისტორიაში ვისენს მარტინესის შემდეგ. „ბარსელონას“ ხელმძღვანელობას მოუწია ფატის მშობლებისგან ოფიციალური ნებართვის აღებამ, რადგან ლა ლიგას შეზღუდული აქვს არასრულწლოვანი ფეხბურთელებისთვის გვიან მატჩებში მონაწილეობა.

ანსუს დიდი ხანი არ უნდოდა მატჩის შემდეგ მინდვრის მიტოვება, მან ყველაზე მღელვარე მომენტი გადაიტანა ცხოვრებაში. „ძალიან ვნერვიულობდი. მადლობელი ვარ კლუბის და ყველა გულშემატკივრის. მადლობა, რომ ასე თბილად მიმიღეს“, - აღიარა ფორვარდმა. მესიმაც კი ვერ შეიკავა თავი და ბიჭს გადაეხვია. „ახლა შენ ერთ-ერთი ჩვენგანი ხარ“, - უთხრა ლეომ. „ინსტაგრამში“ ახალგაზრდა ფეხბურთელის პოპულარობა მაშინვე ავარდა 55 ათასიდან თითქმის 870 ათას ხელმოწერამდე.

„ოსასუნასთან“ მატჩში ანსუ ისევ მოხვდა განაცხადში. მინდორზე გავიდა შესვენების შემდეგ, თავით გაიტანა და ისტორიაში შევიდა, როგორც პრიმერაში გოლის ყველაზე ახალგაზრდა ავტორი. ივლისში ფატიმ ხელი მოაწერა კლუბთან ახალ კონტრაქტს 2022 წლამდე - გამოსასყიდ თანხად დასახელდა 100 მილიონი ევრო. ეს თანხა შეიძლება გაიზარდოს. ფატის აქვს უფლება ითამაშოს პორტუგალიის ნაკრებში, თუ მიწვევას მიიღებს, მაგრამ ის მოუთმენლად ელოდება ესპანეთის მოქალაქეობას, რათა მოხვდეს იმ ქვეყნის ნაკრებში, რომელმაც მას ყველაფერი მისცა.

ყოველდღიური სპორტული გაზეთი "ლელო"
3789
მკითხველის კომენტარები / 0 /
მსგავსი ამბები
რუბრიკის სხვა სიახლეები
;