ანტალიის ტურნირის ანალიზი. ლუკა მაისურაძის სააპრილო გაელვება

...შეხვედრის დასრულებამდე წუთზე ოდნავ მეტი რჩებოდა, როცა ლუკა მაისურაძემ (81) წელიდან აიტაცა რუსთა ინგუში ოლიმპიური ჩემპიონი ხასან ხალმურზაევი და მარჯვენა მხარეს გდებით გორგალივით დაატრიალა.

შეხვედრის არბიტრმა მყისვე აჩვენა ვაზარი, თუმცა მის ზემდგომთ მაინც შეეპარათ ეჭვი და ეპიზოდი ვიდეოფირზე გადაახვიეს. ოღონდ რა საჭიროება იყო, ნამდვილად ვერ გეტყვით, ქართველმა ილეთი იმდენად უნაკლოდ შეასრულა. საბედნიეროდ, მსაჯებმა სინდისზე ხელი არ აიღეს და შეფასება ძალაში დატოვეს, მაისურაძემ კი არც მერე დაუთმო რამე ტიტულოვან კონკურენტს, წარმატების ყველა გზა გადაუკეტა და მშვიდად მიიყვანა საქმე გამარჯვებამდე.

ეს ამბავი შაბათს ანტალიაში მიმდინარე ძიუდოისტთა გრან პრიზე, 81 კილოგრამის ნახევარფინალში მოხდა და, ვგონებთ, ჩვენი გუნდისთვის ერთ-ერთი ყველაზე დასამახსოვრებელი მომენტი იყო. საბოლოოდ, მაისურაძე ამ ტურნირის ჩემპიონი გახდა და ჯერჯერობით კარიერის ყველაზე დიდი წარმატებაც მოიპოვა.

მართალია, ანტალიაში დასამახსოვრებელი ეპიზოდები სხვაც ბევრი იყო, მაგრამ ოლიმპიურ ჩემპიონთან გამარჯვებას და თანაც ასე დამაჯერებლად, ასე ძლევამოსილად, სულ სხვა ფასი აქვს. თუმცა ხალმურზაევის გარდა, მაისურაძემ წონის ლამის მთელი ელიტა დაამარცხა და ანტალიაში სხვაც ბევრი მოიპოვა სახელოვანი „სკალპი“: კანადელი ოლიმპიური პრიზიორი და მსოფლიოს ფინალისტი ანტუან ვალუა-ფორტიე, ახალგაზრდული ნაკრებებიდან საკმაოდ ტიტულოვანი ბელგიელი მატიას კასე და უკრაინელი ბოჰდან ზუსკო...

ამათ წინა ტურნირზე ეკატერინბურგში დამარცხებულ ჰოლანდიელ ფრანკ დე ვიტსაც თუ დავუმატებთ, სურათი უფრო მკაფიო გამოვა... თან ისიც ვთქვათ, რომ მაისურაძე მეორედ ჭიდაობდა ეროვნულ ნაკრებში ამ რანგის შეჯიბრებას და მეორე მედალი მოიპოვა - ეკატერინბურგში ბრინჯაო დაიმსახურა და რეიტინგშიც გვარიანი ნახტომი გააკეთა.

ისე კი თურქულ ტურნირზე ხალმურზაევებს ჭირად ვექეცით: მაისურაძის გამარჯვებიდან მეორე დღეს ხასანის უმცროსი ძმა, ევროპის ორგზის მესამე პრიზიორი ხუსეინ ხალმურზაევი გიორგი პაპუნაშვილმაც დაამარცხა და წაგებულის მწვავე რეაქციით თუ ვიმსჯელებთ, ნამდვილი მეხიც დასცა თავს (აი, ხასანმა კი მშვიდად მიიღო მარცხი).

და ვიდრე ტურნირის პერიპეტიებს შევეხებით, მანამ საქართველოს ანტალიური მონაგარიც დავაჯამოთ: 5 მედალი: 1 ოქრო და 2-2 ვერცხლ-ბრინჯაო. მაისურაძის გარდა, ფინალში გიორგი პაპუნაშვილი (90) და ლევან მატიაშვილიც (+100) გავიდნენ, თუმცა ისინი ვერცხლის მედლებს დასჯერდნენ, ხოლო ბრინჯაოს ბაგრატ ნინიაშვილი (66) და ავთანდილ ჭრიკიშვილი (90) დაეუფლნენ. საქართველომ გაიმარჯვა საერთო გუნდურ ჩათვლაში, რაც მთლიანად ბიჭების ნაკრების დამსახურებაა - სამწუხაროდ, ქალები ამჯერადაც უმედლოდ დაგვირჩნენ.

როგორც ზემოთ ვთქვით, მაისურაძემ ანტალიაში წონის რამდენიმე ლიდერი დაამარცხა. თან ყველა შეხვედრა იპონით მოიგო. ლიდერთა ფონზე პირველივე წრეში ჰოლანდიელ ჯიმ ჰაიხმანთან მოგება გასაკვირიც არაა - ჩვენებურმა პირველივე წამებზე ჩააგდო ტატამზე, ხოლო 31-ე წამზე საფირმო გარეფეხით იპონზე დააგდო.

ბელგიელ კასეს დამატებით დროში აჯობა - ჯამში 7 წუთზე მეტი ეჭიდავა, რაღაც მომენტებში მეტოქე თითქოს ინიციატივასაც დაეუფლა და ქართველმა ორი გაფრთხილებაც მიიღო, მაგრამ ბოლოს ისევ გარეფეხით მაინც გადაჩეხა იპონზე და რევანშიც აუღო ეკატერინბურგში მარცხისთვის.

მაისურაძემ ზუსკოსთანაც წმინდად მოიგო, მაგრამ, ვიდრე მოგვერდით საიპონედ გადმოიღებდა, მანამ ვაზარიზეც ჩაატრიალა. კანადელი ქამრიდან გადავლებით ორჯერ ვაზარიზე ჩაატრიალა, რასაც ხალმურზაევის დამარცხება მიაყოლა, ფინალში კი იტალიელი კრისტიან პარლატი კვლავაც ჩახვეული გარეფეხით დააიპონა.

90 კილოგრამში ჩვენი ორივე მონაწილე ნახევარფინალში გავიდა, თუმცა თურქთა ნატურალიზებული სლოვენიელი მსოფლიოს ფინალისტი მიხაელ ოზერლერი (ზგანკი) ორივეს ბედისწერად ექცა - ნახევარფინალში ჭრიკიშვილს მოუგო, ფინალში - პაპუნაშვილს. მან ზეპრაგმატული ჭიდაობა იჭიდავა - გაფრთხილებებზე მცდელობდა და მიაღწია კიდეც მიზანს. ოღონდ ჭრიკიშვილი გაფრთხილებებით მოახსნევინა, პაპუნაშვილი კი მოგვერდით ბეჭებზე დააგდო.

პაპუნაშვილმა თავიდან ყირგიზი ფარუხ ბულეკულოვი დაამარცხა ვაზარით, მერე ხალმურზაევს აწყევლინა თავ-ბედი, როცა დასრულებამდე 11 წამით ადრე ჩახტომით კისრულზე გადმოიღო, მეოთხედფინალში კი ბოლო ორ კვირაში უკვე მეორედ მოუგო სერბთა ევროპის ჩემპიონ ალექსანდრ კუკოლს (მას თბილისშიც აჯობა) - ამოსმულისას ცოტა უცნაურად ამოსდო ფეხი ლაჯებში, რაზეც სერბი გაფრთხილებას მოითხოვდა, მსაჯმა კი ვაზარად შეაფასა, თუმცა ვიდეოგამეორებისას ქართველის მოძრაობა არათუ დარღვევად მიიჩნიეს, სულაც იპონად გადააკეთეს. ნახევარფინალში პაპუნაშვილმა ებრაელი იტაი გოლანი დაამარცხა წმინდად.

ჭრიკიშვილმა კანადელი მაქსიმ კოტე წმინდად, ყირგიზი ერლან შეროვი და ტაჯიკი კომრონშოკ უსტოპირიონი ვაზარებით დაამარცხა, ხოლო ბრინჯაოსთვის პაექრობაში მანაც მოუგო კუკოლს - ვაზარ-იპონით.

მატიაშვილმა, საუდელ არაბ რაკან ზაიდანისთან იოლი მოგების შემდეგ, საკმაოდ ძლიერი კონკურენტები დაამარცხა - უკრაინელ იაკივ ხამოსაც და ბრაზილიელ მსოფლიოს ფინალისტ დავიდ მოურასაც წმინდად მოუგო, ნახევარფინალში მსოფლიოს კიდევ ერთი ვიცე-ჩემპიონი, აზერბაიჯანელთა ქართველი უშანგი კოკაური გაფრთხილებებით მოახსნევინა, ფინალში კი ჰოლანდიელ ევროპის მედალოსან როი მეიერთან ვაზარით წააგო.

ნინიაშვილი ამ ტურნირის შარშანდელი გამარჯვებულია და ახლაც გაიწია ოქროსკენ, მაგრამ ნახევარფინალში რუსთა მსოფლიოს სამგზის ფინალისტმა მიხაელ პულიაევმა შეაჩერა. ქართველმა თავიდან თურქი აბდულაჰ ბერკინ ოზქანი დააიპონა, ბრაზილიელ ჩარლეს ჩიბანას ვაზარით, პორტუგალიელ ჟოაო კრისოსტომოს ისევ წმინდად აჯობა, ბრინჯაოსთვის პაექრობაში გაფრთხილებებით მოახსნევინა რუსი აბდულა აბდულჟალილოვი.

ჩვენი სხვა მონაწილეებიდან დამამშვიდებელ წრეში მხოლოდ ივანე მახათაძე (66) გადავიდა, ამ გამოუცდელი ფალავანისთვის კი სადებიუტო შეჯიბრებაში ეს ურიგო შედეგი არაა. თანაც, ბოტსვანელ გავინ მოგოპასა და ჩინელ ჭიქიან ვუს შემდეგ მან საკმაოდ გამოცდილი თურქი სინან სანდალიც დაამარცხა, თავად კი ტურნირის მომავალ გამარჯვებულთან, მოლდოველ დენის ვიერუსთან წააგო, ვინც ახლა ფინალში პულიაევსაც მოუგო, წლეულს კი ვაჟა მარგველაშვილიც დაგვიმარცხა. დამამშვიდებელში ის აბდულჟალილოვთან დამარცხდა.

60 კილოგრამში ჯაბა პაპინაშვილიც და ირაკლი კუპატაძეც პირველივე შეხვედრიდან გამოვარდნენ, როგორც ვალერი ახალკაცი (81), ზაურ კენჭაძე (100) და გიორგი ქავთარაძე (+100). თუმცა ახალკაცმა ჩვენი ტურნირის გერმანელ ფინალისტ ტიმო კაველიუსთან წააგო, კენჭაძე კი ფრანგთა ევროპის პრიზიორსა და ამ შეჯიბრების მომავალ ჩემპიონ ალექსანდრ იდირთან დამარცხდა. 73-ში ბექა შავდათუაშვილმაც და ლაშა გიუნაშვილმაც თითო შეხვედრა მოიგეს.

გოგოებიდან მხოლოდ მარიამ ჭანტურიამ (70) მოიგო ერთი შეხვედრა, ნატალია ყიფშიძე (48), ტატიანა ლევიცკა-შუკვანი (52), მარიამ ჯანაშვილი, ეთერ ლიპარტელიანი (ორივე - 57) და სოფიო სომხიშვილი (+78) პირველივე წრეში დამარცხდნენ.

ვაჟები

60 კგ.
1. იელდოშ სმეტოვი (ყაზახეთი); 2. კემრან ნურილაევი (უზბეკეთი); 3. მიჰრაჯ აკუსი (თურქეთი), ეშლი მაკენძი (ბრიტანეთი).

66 კგ.
1. დენის ვიერუ (მოლდოვა); 2. მიხაილ პულიაევი (რუსეთი); 3. ბაგრატ ნინიაშვილი (საქართველო), ალბერტო მარტინ გაიტერო (ესპანეთი).

73 კგ.
1. ჩანგრიმ ანი (კორეა); 2. რუსტამ ორუჯოვი (აზერბაიჯანი); 3. გეორგიოს აზოიდისი (საბერძნეთი), გიიომ ჩანი (საფრანგეთი).

81 კგ.
1. ლუკა მაისურაძე (საქართველო); 2. კრისტიან პარლატი (იტალია); 3. ანტოინ ვალუა-ფორტიე (კანადა), ხასან ხალმურზაევი (რუსეთი).

90 კგ.
1. მიხაილ ოზერლერი (თურქეთი); 2. გიორგი პაპუნაშვილი; 3. ავთანდილ ჭრიკიშვილი (ორივე - საქართველო), კომრონშოკ უსტოპირიონი (ტაჯიკეთი).

100 კგ.
1. ალექსანდრ იდირი (საფრანგეთი); 2. რაფაელ ბუზაკარინი (ბრაზილია); 3. ელმარ გასიმოვი (აზერბაიჯანი), ტომა ნიკიფოროვი (ბელგია).

1. +100 კგ.
როი მეიერი (ჰოლანდია); 2. ლევან მატიაშვილი (საქართველო); 3. ლუკაშ კრპალეკი (ჩეხეთი), ვლადუტ სიმიონესკუ (რუმინეთი).

ყოველდღიური სპორტული გაზეთი "ლელო"
627
მკითხველის კომენტარები / 0 /
მსგავსი ამბები
რუბრიკის სხვა სიახლეები
;