ანტალიის ტურნირი: ყველანი ფლეი ოფში

ანტალიაში გუშინ დაიწყო მშვილდოსანთა მსოფლიოს თასის რიგით მესამე ეტაპი, რომელიც მეტად წარმომადგენლობითი ტურნირია - 51 ქვეყანა მონაწილეობს, მშვილდოსანთა რაოდენობა კი მხოლოდ ოლიმპიურ დისციპლინებში 239-ია - 110 ქალი და 129 - ვაჟი. 

გუშინ გაიმართა საკვალიფიკაციო ეტაპი პირად პირველობაში და ჩვენები პლეი ოფში კი მოხვდნენ, მაგრამ არცთუ კარგი სასტარტო პოზიციებით. 
ქალებში ჩვენგან საუკეთესო შედეგი გუნდურში ევროპის ორგზის ვიცე-ჩემპიონსა და საქართველოს მშვილდოსნობის ფედერაციის პრეზიდენტ ხათუნა ნარიმანიძეს ჰქონდა, ვინც 632 ქულა დააგროვა, რაც 61-ე შედეგი აღმოჩნდა. ამდენივე ქულა ჰქონდა ბელარუს ელენა იაჩნიკსაც, მაგრამ ჩვენებურმა მას უფრო მეტი 10-იანებით გაუსწრო. 

ნარიმანიძეს კარგა ხანს კვალში თავისი შვილი ციკო ფუტკარაძე ედგა, თუმცა მარათონული სერიის დასასრულს (საკვალიფიკაციოში მშვილდოსნები 72 ისარს ისვრიან) ცოტა ჩამორჩა და 627 ქულით 69-ე ადგილზე გავიდა. მანაც 10-იანთა უკეთესი ბალანსით ჩამოიტოვა თანაბარქულიანი პოლონელი კაროლინა ფარასივიზი. ირა არჯევანიძე 596 ქულით 96-ზე გავიდა. 

ვაჟებში ჩვენი გუნდიდან საუკეთესო ამჯერად ლაშა ფხაკაძე აღმოჩნდა - 660 ქულით 47-ე აღმოჩნდა. მანაც დამატებითი მაჩვენებლებით აჯობა ჩინელ შაოხუან ვეის. ჯაბა მოსეშვილმა 652 ქულა დააგროვა და 71-ზე გავიდა. ის უკვე თვითონ ჩამორჩა ამდენივექულიან სლოვენიელ დენ ჰაბიან მალავასიჩს. ზურაბ მესტვირიშვილმა 634 ქულით დაასრულა გამოსვლა და ბოლო ადგილით შევიდა პლეი ოფში - 104-ე იყო. 634 ქულა ჰქონდა ბრაზილიელ ედსონ კიმსაც, თუმცა მას მეტი 10-იანიც აღმოაჩნდა. 

გუნდურ ჩათვლაში ჩვენი ორივე ნაკრები 21-ე ადგილზე გავიდა. ოღონდ ვაჟების სამეულმა 1946 ქულა დააგროვა, ქალთა ტრიომ კი - 1855. ბუნებრივია, პლეი ოფში ორივეს მეტოქედ მე-12 ადგილზე გასული გუნდი ერგო. ვაჟებში ეს ბრაზილია აღმოჩნდა, ქალებში - დიდი ბრიტანეთი. გუნდურში პლეი ოფები დღეს გაიმართება. ვაჟები გამარჯვების შემთხვევაში ტაივანს შეხვდებიან, ქალები - უკრაინას. 

შერეული წყვილი ჩვენგან ნარიმანიძემ და ფხაკაძემ შეადგინეს (შეგახსენებთ: ოთხი წლის წინ პირველ ევროპულ თამაშებზე ბაქოში სწორედ ამ დუეტმა მოიპოვა პირველი მედალი - ვერცხლი). მათ ჯამში 1292 ქულა დაუგროვდათ და 23-ე ადგილზე გავიდნენ. ამ დისციპლინაში გუშინვე დაიწყო პლეი ოფი, თუმცა ჩვენებმა წარუმატებლად იასპარეზეს - პირველ წრეში ინდურ დუეტს შეხვდნენ და 1:5 წააგეს. ჩვენებმა მხოლოდ მეორე სერია დაასრულეს ფრედ - 36:36, პირველი 37:38 წააგეს, მესამე კი - 35:36.

პირადი პირველობის პლეი ოფებიც დღეს დაიწყება და უკლებლივ ყველა ჩვენებური - ქალებშიც და ვაჟებშიც პირველივე წრიდან ჩაებმება შეჯიბრებაში. ნარიმანიძე დანიელ კრისტინე ანდერსენს ხვდება, ხოლო ამათში მოგებული იტალიელ ტატიანა ანდრეოლისა და აზერბაიჯანელ სვეტლანა სიმონოვას შორის გამარჯვებულს შეხვდება. ჩვენი ქალებიდან ყველაზე ძლიერი მეტოქე ფუტკარაძეს ერგო - ბრიტანელი ნაომი ფოლკარდი. მის დამარცხებას თუ შეძლებს, მერე, შესაძლოა, კიდევ უფრო ძლიერი მეტოქე შეხვდეს - მექსიკელი ოლიმპიური პრიზიორი აიდა რომანი. ყოველ შემთხვევაში, ის შვედ ელინ კატსტრომთან შეხვედრაში ფავორიტია. თუმცა არც არჯევანიძეს ჰყავს ნაკლები მეტოქე - ახმახი უკრაინელი ლიდია სიჩენიკოვა. აი, ამათში მოგებულს მომდევნო ეტაპზე არც ისე ძლიერი კონკურენტი ეყოლება: ფრანგი მარიონ ბარდარი ან ესპანელი მონიკა გალისტეო.

ფხაკაძე პირველ ეტაპზე პოლონელ მათეუშ ოგროდოვჟიკს გაეჯიბრება, მასთან მოგების შემთხვევაში კი ახალ მეტოქედ მონღოლ ადიასურენ ბაასანკხუუსა და იაპონელ ტაცუია ბიზჯაკის დუეტიდან ერთ-ერთი ეყოლება. მოსეშვილი თავიდან მექსიკელ დავიდ ანგელ სანტინ ალვარადოს ხვდება, ამ დუეტში გამარჯვებული კი ფინელ ანტი ოლავი ვიკსტრომს ან პოლონელ ოსკარ კასპროვსკის შეხვდება. მესტვირიშვილი თავიდან ფრანგი კლემენტ ჟაქუს დამარცხებას შეეცდება, ხოლო ამას თუ შეძლებს, მერე მეტოქედ კიდევ ერთი ფრანგის - პიერ პლიოსა და ბრაზილიელ ბერნარდო ოლივეირას წყვილიდან გასული ეყოლება. 

ყოველდღიური სპორტული გაზეთი "ლელო"
410
მკითხველის კომენტარები / 0 /
მსგავსი ამბები
რუბრიკის სხვა სიახლეები
;