[VIDEO] ალ პაჩინოს უკვდავი მონოლოგი, რომელიც გვარდიოლამ და სიმეონემ ფეხბურთელებს გასახდელში უჩვენეს

“ჩვენ ან გავიმარჯვებთ, ან მთელი გუნდით დავიღუპებით!
არც კი ვიცი, რა გითხრათ...
სამი წუთის შემდეგ დაიწყება ყველაზე სასტიკი შერკინება ჩვენი პროფესიული კარიერის განმავლობაში...
დღეს ყველაფერი გადაწყდება! ან გუნდი ვართ, ან გავტყდებით საბოლოოდ...
ჩვენ სადღაც ჯოჯოხეთში ვართ, ჯენტლმენებო!..
თუ ჩვენ ამას შევურიგდებით, ყველასთვის ვიქნებით იატაკის ჩვრები და მეტი არაფერი.
ან არა და, ჩვენ ვუჩვენებთ მათ დიდ ბრძოლას და ერთად გავალთ მზის შუქზე”!..

გეცნოთ ეს მონოლოგი? ის ცნობილმა ტონი დ’ამატომ წარმოთქვა პლეი ოფის მნიშვნელოვანი მატჩის წინ. ეჭვგარეშეა, თუ თქვენ არ გინახავთ ეს უკვდავი ფილმი ალ პაჩინოს მონაწილეობით, ჭიანჭველების მოზღვავება იგრძენით ტანზე. გინდათ, ეკრანში შევარდეთ და დაეხმაროთ “ზვიგენებს” გამარჯვებაში...

ტონი დ’ამატოს მონოლოგი ეკუთვნის ცნობილ მწვრთნელ მარტი შოტენჰაიმერს. ის მან წარმოთქვა 80-იან წლებში, როცა ამერიკული ფეხბურთის კლუბ “კლივლენდ ბრაუნზს” წვრთნიდა.

ეს არის ალ პაჩინოს ერთ-ერთი გამორჩეული როლი. ფილმი კი ყველამ იცის. მას ჰქვია “ყოველ კვირა დღეს”. ალბათ, ბევრმა არ იცის, რომ თავისუფლად შეიძლებოდა, ლეგენდარულ მსახიობს ამ ფილმში არ ეთამაშა. თავდაპირველად, კინოკამპანია Warner Brothers-მა ამ როლის სათამაშოდ მეორე ლეგენდა - კლინტ ისტვუდი მიიწვია. 

ისტვუდს სცენარი იმდენად მოეწონა, მან ფილმის რეჟისორობაც მოინდომა. საბოლოოდ, ისტვუდს უარი უთხრეს. ფილმის რეჟისორად დარჩა ოლივერ სტოუნი. ის მთავარი როლისთვის ორ კანდიდატურას ხედავდა - ალ პაჩინოს და რობერტ დე ნიროს. დე ნირომ უარი განაცხადა გადაღებაზე.

სტოუნი ხალხს გამოუტყდა, რომ ჯერ კიდევ ფილმის გადაღებამდე მაგრად უყვარდა სპორტი: “მე მიყვარს სპორტი და სპორტსმენები. ისინი არანაკლებ მნიშვნელოვან ადამიანებად მიმაჩნია, ვიდრე პოლიტიკოსები. მაგალითად, ავიღოთ ფეხბურთელები. შეუძლებელია, აღტაცებული არ დარჩე იმით, თუ რამდენს შრომობენ ისინი”, - ამბობდა.

გადაღების დაწყებამდე სტოუნმა მთელი გუნდი სტივენ სპილბერგის ფილმის (“რიგითი რაიანის გადასარჩენად”) სანახავად წაიყვანა. თავიდან ამან მსახიობებში გაუგებრობა გამოიწვია, მაგრამ მერე ყველა მიხვდა, თუ რატომ მოიქცა ასე სტოუნი. მან ხალხს სპორტისა და ცხოვრების რთული მხარეებიც აჩვენა. მაგალითად, როგორია, როცა სიცხისგან იწვები და იძულებული ხარ, მთელი 12 საათი ატარო ფეხბურთელის ეკიპირება.

ეროვნულ საფეხბურთო ლიგასთან უთანხმოების გამო, ფილმის ეკრანებზე გამოსვლა ოთხჯერ გადაიდო. პროდიუსერებს უნდოდათ, რომ ფილმში ლიგის ლოგო გამოეყენებინათ.

“თავიდან, როცა გადაღება დავიწყეთ, ლიგა მაგრად მოგვეხმარა სხვადასხვა მასალით. მერე სიუჟეტის თაობაზე გაიგეს და ჩვენთან კონტრაქტი საერთოდ შეწყვიტეს”, - ამბობს პროდიუსერი.

ტექნიკური კონსულტანტი ჯეიმს უილიამსი ამბობს: “ლიგას არ უნდოდა, მაყურებელს ეს ბიჭები ჩვეულებრივი სახით ენახა. მათ უნდოდათ, რომ ისინი სუპერგმირებად დარჩენილიყვნენ. არადა, ისინი ჩვეულებრივი ადამიანები არიან. ერთობიან მთელი კვირა, ფულის მესამედს ნარკოტიკებში ხარჯავენ და ყოველ კვირას ისე ჩანან მოედანზე, როგორც ნამდვილი სუპერგმირები”.



არის თუ არა  ალ პაჩინოს  მონოლოგი  ეფექტური?

ბევრის აზრია, რომ ალ პაჩინოს გმირის მონოლოგი მოტივაციის მხრივ საუკეთესოა მსოფლიოში. არიან ისეთებიც, ვინც ასე საერთდ არ ფიქრობენ. მაგალითად, არგენტინელი მწვრთნელი პაბლო ერნან ტოლედო. ის ბავშვებს ავარჯიშებდა ამერიკის შეერთებულ შტატებში.

ის მიიჩნევს, რომ ალ პაჩინოს მონოლოგი მოქმედებს მხოლოდ ემოციაზე, ზედმეტი ემოცია კი საქმეს ვნებს. ამის დასამტკიცებლად მას მოჰყავს ორი მაგალითი.

2007 წელს საფრანგეთმა რაგბის მსოფლიოს ჩემპიონატს უმასპინძლა. გახსნით შეხვედრაში ფრანგები შედარებით სუსტ არგენტინას ეთამაშებოდნენ. არის აზრი, რომ არგენტინელებს სწორედ ამ მონოლოგით მიმართეს. მათ ძალიან ემოციურად შეასრულეს ჰიმნი. იტირეს, ერთმანეთს ეხვეოდნენ და... მოიგეს.

ზოგადად, არგენტინა იმ ჩემპიონატზე ნახევარფინალამდე მივიდა. ერთ-ერთი შეხვედრის პირველ წუთებზე ერთ-ერთმა არგენტინელმა ყვითელი ბარათი მიიღო. მწვრთნელმა ის ეგრევე შეცვალა. მან თავისი საქციელი იმით ახსნა, რომ სპორტსმენი ძალიან აღგზნებული იყო.

დაახლოებით ასეთი რამ მოხდა 2009 წლის ჩემპიონთა ლიგის ფინალის წინ. პეპ გვარდიოლამ “მანჩესტერ იუნაიტედთან” გადამწყვეტი მატჩის დაწყებამდე ფეხბურთელებს ფილმ “გლადიატორის” ყველაზე “ცხელი” მომენტები აჩვენა. 

ბოლოს ეკრანზე გამოჩნდა კატალონიური კლუბის ერთ-ერთი სპონსორი. “ჩვენ ვართ შემტევები, რომლებიც იცავენ თასს და დამცველები, რომლებიც უტევენ! ჩვენი ყველა გოლი ეკუთვნის თითოეულ ჩვენგანს. ჩვენ ერთიანები ვართ!”

როცა “ბარსელონას” ფეხბურთელებმა დაასრულეს ვიდეოს ყურება, რამდენიმე წუთს დუმდნენ, მერე კი წამოხტნენ, ყვირილი და ტაშის კვრა დაიწყეს. გვარდიოლას მათთვის აღარაფერი უთქვამს...

დაიწყო თამაში და სამუელ ეტო’ომ მე-10 წუთზე შეაგდო. მერე “ბარსამ” რამდენიმე, მისთვის უჩვეულო შეცდომა დაუშვა. შესვენებაზე გვარდიოლამ ფეხბურთელები დააწყნარა.

“არ ვიცი, ამ ვიდეოს ბრალი იყო, თუ სხვა რამის, მაგრამ გატანილი გოლის მიუხედავად, ჩვენ ძალიან ცუდად ვითამაშეთ ფინალის დასაწყისში”, - თქვა მოგვიანებით ანდრეს ინიესტამ.

სიმეონე და ანჩელოტი

ამ ფილმის ერთ-ერთი მთავარი დამფასებელი დიეგო სიმეონეა. ის ჯერ კიდევ მაშინ ახდენდა ფეხბურთელების მოტივირებას, როცა “ესტუდიანტესში” მუშაობდა. 2006 წლის შემოდგომაზე, ჩემპიონატის დასრულებამდე კარგა ხნით ადრე, გაზეთ “ოლეს” მკითხველებმა სიმეონე არგენტინის პირველობის საუკეთესო მწვრთნელად დაასახელეს. “ჩოლოს” გუნდმა სულ მალე დერბიში 7:0 გადაუარა “ხიმნასიას”. ამ თამაშის წინ დიეგომ ფეხბურთელებს ალ პაჩინოს მონოლოგი ჩაურთო...

ანალოგიური რამ განმეორდა მერეც, როცა სიმეონე სამუშაოდ იტალიაში გადაბარგდა და “კატანია” ჩაიბარა: “მან ალ პაჩინოს მონოლოგი ჩართო. ეს იყო “პალერმოსთან” სიცილიური დერბის წინ. ჩვენ გავედით მინდორზე და, უბრალოდ, ვიფრინეთ”, - განაცხადა მაშინდელი “კატანიას” არგენტინელმა ლიდერმა გილერმო ბაროს შელოტომ, გაიხსენა რა 2011 წლის ამბები.

ის სიცილური დერბი “კატანიამ” 4:0 მოიგო...

ჩვენ უკვე დაგვავიწყდა, რომ “ატლეტიკოს” სიმეონეს მისვლამდეც ჰქონდა დიდებული სეზონები. 2010 წელს კიკე სანჩეს ფლორესის გუნდმა ევროპალიგა მოიგო და ითამაშა ესპანეთის თასის ფინალში. ყველა მატჩის წინ კიკე ფეხბურთელებს ალ პაჩინოს უკვდავ მონოლოგს ურთავდა...

2003 წელს კარლო ანჩელოტიმ “მილანთან” ერთად ჩემპიონთა ლიგა მოიგო. “როსონერიმ” ფინალში 11-მეტრიანების სერიაში აჯობა მარჩელო ლიპის “იუვენტუსს”. “პაპა კარლომ” თავის ავტობიოგრაფიულ წიგნში გაიხსენა:

“როცა სიტუაციის კონტროლი იყო საჭირო, მაგალითად 2003 წელს, “იუვენტუსთან” შეხვედრაში, მუდამ ორ რამეს ვაკეთებდი - ფეხბურთელებს მოვუწოდებდი ერთიანობისკენ და ვრთავდი ალ პაჩინოს მონოლოგს”.

სხვათა შორის, ამ მონოლოგის მსგავსი სიტყვა ერთხელ არსენ ვენგერმაც წარმოთქვა. ამის თაობაზე საკლუბო არხს “მეთოფეთა” ყოფილი ფეხბურთელი თეო უოლკოტი გამოუტყდა. მისი თქმით, მწვრთნელმა იმდენად მაგრად ილაპარაკა, რომ მას არ შეუძლია, ზუსტად მოახდინოს მისი ციტირება...

გახსოვთ “რომას” გმირობები ჩემპიონთა ლიგაში 2018 წელს? თუნდაც, არნახული “ქამბექი” “ბარსელონასთან”? “რომას” მაშინდელმა შემტევმა, ახლა კი “სამპდორიას” ფორვარდმა გრეგუარ დეფრელმა გაიხსენა, რომ საპასუხო საშინაო შეხვედრის წინ, რომელიც “რომამ” 3:0 მოუგო კატალონიურ გრანდს, ეუსებიო დი ფრანჩესკომ ბიჭებს ალ პაჩინოს მონოლოგი მოასმენინა. არადა, “რომას” პირველი მატჩი “კამპ ნოუზე” 1:4 ჰქონდა წაგებული...

ყოველდღიური სპორტული გაზეთი "ლელო"
5949
მკითხველის კომენტარები / 0 /
მსგავსი ამბები
რუბრიკის სხვა სიახლეები
;