არაბული მედლები მჩატე წონებში - აბუ დაბის გრანდ სლემი დასრულდა

აბუ დაბიში დასრულდა ძიუდოისტთა გრანდ სლემი, რომელშიც წარმატებით გამოვიდნენ ჩვენი ძიუდოისტები:

მათ ანგარიშზე სამი ოქროს მედალი და გუნდური პირველობაა - საერთოშიც და, ბუნებრივია, ვაჟებშიც, რადგან სამივე მედალი მათი მონაგარია, ხოლო ქალებში მონაწილე საერთოდ არ გვყოლია. ჩემპიონები ამირან პაპინაშვილი (60), ვაჟა მარგველაშვილი (66) და ლაშა შავდათუაშვილი (73) გახდნენ.

ჩვენი ნაკრებისთვის განსაკუთრებით წარმატებული პირველი ორი დღე გამოდგა, რადგან სამივე ოქრო იმ პერიოდში მოიპოვეს. აღსანიშნავია, რომ მაშინ ჩვენებმა ოთხი წონიდან სამში გაიმარჯვეს, გუშინ კი ხუთი ქართველი ჭიდაობდა, მაგრამ ყველამ წარუმატებლად დაასრულა გამოსვლა. მთლიანობაში, არაბეთში ჩვენმა მჩატეწონოსნებმა უფრო ივარგეს, ვიდრე - ზედაწონოსნებმა.

ევროპის ჩემპიონსა და მსოფლიოს აწ უკვე ორგზის მესამე პრიზიორ პაპინაშვილს (შეგახსენებთ, რომ პლანეტის მეორე ბრინჯაო მან სექტემბერში დაისაკუთრა) თითქოს მეორე სუნთქვა გაეხსნა და ბაქოში, მსოფლიოს ჩემპიონატზე მოპოვებული წარმატების შემდეგ კიდევ ერთი დიდი გამარჯვება იზეიმა.

თუმცა შედეგზე მეტად საგულისხმო სხვა რამეა - მოუგო მისთვის უხერხულ მეტოქეს, რუსთა ყაბარდოელ ოლიმპიურ ჩემპიონსა და ევროპის სამგზის გამარჯვებულს, მსოფლიოს ფინალისტ ბესლან მუდრანოვს, აგრეთვე - უზბეკ შარაფუდტინ ლუტფილაევს, ხოლო ფინალში დამატებით დროში ჩინებულ მოგვერდზე წამოიღო ესპანელთა ევროპის მედალოსანი ფრანსისკო გარიგოსი და ძალიან იოლად მოუგო.

პაპინაშვილი მუდრანოვს მისთვის პირველივე პაექრობაში შეხვდა და დამატებით დროში აჯობა. ესენი უკვე მეათედ შეხვდნენ ერთმანეთს და ჩვენებურმა მეორედ მოუგო.

ორთაბრძოლა ურთიერთდაზვერვით დაიწყო და მსაჯმა მალევე გააფრთხილა ორივე. თუმცა საკუთარ მოქმედებას უფრო მაინც პაპინაშვილი ზომავდა და მეორე წუთის მიწურულს მეორედაც გააფრთხილეს. 39 წამით ადრე მუდრანოვმა ვარდნაში ფეხი გამოჰკრა და გადააგდო, რაც მსაჯმა ვაზარად შეაფასა, თუმცა მალევე გააუქმებინეს და სამართლიანადაც. 42-ე წამზე ჩვენებურმა კისრულით ვარდნაში ისე წამოიღო, პირდაპირ თავით დაარჭო ტატამს და იპონიც დაიმსახურა. ის მომდევნო შეხვედრაში იოლად გაუსწორდა ბელგიელ ჟორე ვერსტრაეტენს, თუმცა მასთან ვაზარი კი გაუშვა, მაგრამ ისიც წმინდად დაამარცხა, ხოლო ნახევარფინალში წუთ-ნახევარში დააიპონა უზბეკთა მომავალი მესამე პრიზიორი ლუტფილაევი. არადა, მასთან მესამედ იჭიდავა და პირველად მოიგო. ამათ ფონზე ფინალში გარიგოსი განწირულიც კი ჩანდა მარცხისთვის და პაპინაშვილმა მართლაც ჩინებულად წამოიღო, ტურნირი კი ასევე ჩინებული შედეგით - ოთხი შეხვედრიდან ოთხი იპონით დაასრულა.

ფინალში დამატებით დროში იმარჯვა მარგველაშვილმაც. თანაც, ვისთან? ყაზახ იერლან სერიკჟანოვთან, ვინც სექტემბერში მსოფლიოს ჩემპიონატის ფინალში გავიდა და იქ იაპონელ უტა აბესთან დამარცხდა.

პაპინაშვილის მსგავსად, ევროპის ჩემპიონი და მსოფლიოს მესამე პრიზიორი მარგველაშვილიც განთესილი იყო და პირველ წრეში ისვენებდა. მეორეში ირლანდიელი ნათან ბურნსი დააიპონა, მესამეში კი შედარებით მძიმე ბრძოლაში ვაზარით აჯობა ბელარუს დმიტრი შერშანს. ნახევარფინალში რუს იაკუბ შამილოვთან დამატებით დროში კვლავაც წმინდად იმარჯვა, ხოლო ფინალში ასევე დამატებითში ვაზარზე გადმოიღო სერიკჟანოვი.

ჩვენი ტრიოდან ფინალში ძირითადში მხოლოდ შავდათუაშვილმა იმარჯვა კოსოვოელ აკილ გიაკოვასთან. სეზონის დასაწყისში გიაკოვასთან პარიზის ფინალში დამარცხდა, რისთვისაც ახლა სრულფასოვანი რევანში აუღო. ეს შეხვედრა დაახლოებით თანაბარ ბრძოლაში წარიმართა და ერთ მომენტში მეტოქეები აბსოლუტურად იდენტურ პოზიციაში შეეკვრნენ ერთმანეთს. ვერ იტყოდი, რომ რომელიმეს უკეთესი პოზიცია ჰქონდა - ისე ჩანდა, რომ უფრო ძლიერი წელის პატრონი მოიგებდა, ასეთი კი ჩვენებური აღმოჩნდა და ვაზარზე გადატეხა კიდეც მეტოქე.

რაც შეეხება შავდათუაშვილს, პირველ წრეში ისიც ისვენებდა განთესვის გამო, მეორეში კი ტურნირის მონაწილე ერთადერთი იაპონელი ტაკეში დოი დააიპონა. ამით ფრთაშესხმული მისდგა და ჩინელი რიგანგ ხუ, უკრაინელი არტემ ხომულა და ნახევარფინალში საკმაოდ ძლიერი შვედი ტომი მაკიასი იპონებზე დაყარა, ფინალში კი, როგორც გითხარით, გიაკოვას ვაზარით აჯობა. თან უკრაინელსა და შვედს იპონამდე თითო გდებაც გაუკეთა, თავად კი ერთადერთი ქულა მხოლოდ მაკიასთან დაკარგა.

გუშინ 90 კილოგრამში ჩვენი გუნდის ორი ლიდერი ჭიდაობდა - მსოფლიოს ბრინჯაოს მედალოსანი უშანგი მარგიანი და მსოფლიოს ჩემპიონი, ევროპის სამგზის გამარჯვებული ავთანდილ ჭრიკიშვილი.

ამათგან უფრო უკეთ მარგიანი გამოვიდა, ვინც ჯერ ვაზარით დაჯაბნა თურქმენი ტეიენ ტეჯენოვი, ხოლო ჰოლანდიელი იესპერ სმინკი დააიპონა. სამაგიეროდ, ნახევარფინალში თვითონ წააგო წმინდად აზერბაიჯანელთა მომავალ მესამე პრიზიორ მამადალი მეჰდიევთან, მერე კი სანუგეშოშიც პირველივე პაექრობა დათმო კიდევ ერთ მომავალ ბრინჯაოს პრიზიორთან, სერბ ევროპის შარშანდელ ჩემპიონ ალექსანდრ კუკოლთან.

ჭრიკიშვილმა საუდის არაბეთის წარმომადგენელ სალეჰ ალზუვაიდთან ვაზარ-იპონით კი მოიგო, მაგრამ უნგრელთა მომავალ ფინალისტთან, მსოფლიოსა და ევროპის ვიცე-ჩემპიონ კრისტიან ტოტთან ვერაფერს გახდა და გაფრთხილებებით მოხსნეს.

ჩვენი გუნდის სხვა წევრებიდან დამამშვიდებელ წრეში ლუხუმ ჩხვიმიანიც (60) გადავიდა. ჩინელ რილეგე სუსთან იპონის შემდეგ ის ჯერ ლუტფილაევთან ვაზარით დამარცხდა მეოთხედფინალში, სანუგეშოში კი ვერსტრაეტენთან წააგო წმინდად.

ფრიდონ გიგანმა (73) პირველივე პაექრობა დათმო ჩეხ იესპერ იესმინეკთან. თამაზ კირაკოზაშვილმა (81) გერმანელი ჰანეს კონრადი კი დააიპონა და თან ორჯერაც გააფრთხილებინა, მაგრამ გაფრთხილებებით მოხსნეს ირანელთა მსოფლიოს ცინცხალ ჩემპიონ საეიდ მოლაესთან. აქ სანუგეშოდ ის თუ გვექნება, რომ ირანელმა მას გდება ვერ გაუკეთა, თუმცა ეს დიდი ვერაფერი ნუგეშია.

ლაშა ტაველურმა 100-ში ჩინელ ბო ჭანს ქულებით კი აჯობა, მაგრამ იპონით წააგო ლატვიელ იევგენის ბოროდავკოსთან. ჩვენი მძიმეწონოსანთა დუეტი პირველ წრეში ისვენებდა, მეორეში კი ორივე დამარცხდა. ევროპული თამაშების ჩემპიონი, მსოფლიოს მესამე პრიზიორი ადამ ოქრუაშვილი გაფრთხილებებით მოხსნეს ბელარუს ულადისლაუ ტსიარპიცკისთან, ევროპის პრიზიორმა ლევან მატიაშვილმა კი ყირგიზ იური კრაკოვეცკისთან დათმო სუფთა გდებით.

ყოველდღიური სპორტული გაზეთი "ლელო"
820
მკითხველის კომენტარები / 0 /
მსგავსი ამბები
რუბრიკის სხვა სიახლეები
;