არადა, 'ტორპედოში' გადასული ვიყავი... ვოლკოვი ყვება, როგორ მოხვდა აზერბაიჯანში

დავით ვოლკოვი აზერბაიჯანში რომ ითამაშებს, ამბავი არახალია, მაგრამ მოულოდნელად კი გადაწყდა. 23 წლის ფეხბურთელი კარიერის გაგრძელებას ქუთაისის „ტორპედოში“ აპირებდა და ეს „ლელოსთანაც“ დაადასტურა...

თუმცა ბოლო მომენტში ვითარება შეიცვალა და ცნობილი გახდა, რომ ვოლკოვი ერთ-ერთ ამბიციურ აზერბაიჯანულ კლუბ „გაბალაში“ გადავიდა, რომელიც ორჯერ ევროპალიგის ჯგუფურ ეტაპზე გავიდა. იცით, რომ ქართველმა თავდამსხმელმა აზერბაიჯანულ კლუბთან ერთწლიანი კონტრაქტი გააფორმა.

„საბურთალოს“ გარდა, ვოლკოვი თამაშობდა „გაგრაში“, თბილისის „დინამოსა“ და ბოლნისის „სიონში“. გასულ სეზონში მან „საბურთალოში“ 28 მატჩი ითამაშა და 8 გოლი გაიტანა.

„გაბალა“ ქართველისთვის მეორე უცხოური კლუბია - 2017 წელს სერბულ „ზემუნში“ ჩაირიცხა, მაგრამ ტრავმის გამო მხოლოდ ერთხელ ითამაშა და გოლიც გაიტანა.

„შეიძლება ითქვას, არაოფიციალურად „ტორპედოს“ ფეხბურთელი ვიყავი. ამ დროს მიშა ხუციშვილი დამიკავშირდა და მითხრა, რომ ჩემით „გაბალა“ დაინტერესდა. აზერბაიჯანელებმა კონტრაქტი გამომიგზავნეს და მეც ხელი მოვაწერე“, - ამბობს ვოლკოვი.

რატომ და როგორ მოხვდა „ტორპედოს“ ნაცვლად აზერბაიჯანულ კლუბში? ვოლკოვი ამის შესახებაც გველაპარაკა: „ქუთაისის „ტორპედოსთან“ ყველაფერი მოგვარებული და გადაწყვეტილი იყო, კონტრაქტიც შეთანხმებული გვქონდა. ისიც გადაწყვეტილი იყო, ვარჯიშზე როდის უნდა მივსულიყავი. „გაბალა“ ამის შემდეგ გამოჩნდა.

„ტორპედოს“ მწვრთნელ კახა ჩხეტიანს დაველაპარაკე - კონტრაქტი გაფორმებულიც რომ გქონოდა, ხელს მაინც არ შეგიშლიდი, თავადაც ფეხბურთელი ვიყავი და მესმის, რომ ასეთ შანსზე უარის თქმა არ შეიძლებაო. ჩხეტიანის მსგავსი ადამიანი ბევრი არ მინახავს და მას ჩემი სიტუაციის გაგებისთვის მადლობა მინდა გადავუხადო“.

ყოველდღიური სპორტული გაზეთი "ლელო"
1165
მკითხველის კომენტარები / 0 /
მსგავსი ამბები
რუბრიკის სხვა სიახლეები
;