არავის სურს, რომ პირიქით მოხდეს... ახალ სტადიონზე ამბიციურმა კოლხეთმა უნდა ითამაშოს

ფოთის „კოლხეთმა“ სეზონისთვის მზადება დაიწყო და ამხანაგური შეხვედრაც გამართა. გუნდი, რომელსაც აზერბაიჯანელი ადილ მახმუტოვი და დავით მახარაძე ავარჯიშებენ, ბათუმის „დინამო 2-ს“ შეხვდა და ჭიაბერ ჭეჭელაშვილის მიერ მე-17 წუთზე გატანილი პენალტით 1:0 დაამარცხა.

„კოლხეთმა“ შემდეგი შემადგენლობით ითამაშა: ნანავა, ნოდია, ლემონჯავა, კირკიტაძე, კოკაია, ჭეჭელაშვილი, ლეჟავა, გოროზია, ხორხელი, გოგიძე, გაბელაია; შეცვლაზე: მაკარაშვილი, ნაპიშვილი, მახარაძე, ბერაია, გ. ბოკუჩავა, ხვიჩია, გრ. ბოკუჩავა.

სანამ გუნდი სეზონისთვის ემზადება, ფოთის ცენტრალური სტადიონის მშენებლობის პირველი ეტაპი დასასრულს მიუახლოვდა. ამაზე კლუბის პრესსამსახურის უფროსის, გია ეჯიბიას მიერ გამოქვეყნებული ფოტოკოლაჟი მეტყველებს: სტადიონზე აშენდა დასავლეთი ტრიბუნა, რომელიც გადახურულია და ინდივიდუალური სკამებიც დამონტაჟებულია.

მოეწყო VIP და მედიალოჟები, გასახდელები, საშხაპეები, სამსაჯო, სამედიცინო და დოპინგკონტროლის ოთახები.  თუმცა, ჯერ მაინც უცნობია, მოახერხებს თუ არა „კოლხეთი“ სეზონის საკუთარ არენაზე დაწყებას, რასაც წლებია ფოთელი გულშემატკივრები ელიან. საქმე ისაა, რომ სამუშაოები ჯერ კიდევ დასასრულებელია, მოედნის საფარი სასურველ მდგომარეობამდეა მისაყვანი, ბურთი კარგად რომ გაგორდეს. ბალახი შარშან დააგეს ფეხბურთის ფედერაციის ხარჯით და იმედია, მალე მოწესრიგდება. ამის თაობაზე სტადიონის დირექტორი ვახტანგ თოფურია გველაპარაკა:

„სტადიონის მშენებლობის პირველი ეტაპი, ფაქტობრივად, დასრულებულია, ისევე, როგორც ოთახების, გასახდელების, საშხაპეების მოწყობა, კონდიცირებისა და გათბობის სისტემის დამონტაჟება. დასავლეთ ტრიბუნაზე 1700 ინდივიდუალური სკამია და საკმაოდ ტევადი სტადიონი იქნება. მოედანი ფეხბურთის ფედერაციამ დააგო და წესრიგშია მოსაყვანი, რადგან ზამთრის შემდეგ პირდაპირ შესვლა და თამაში მიზანშეწონილი არ არის, თუმცა არც დიდი პრობლემაა“, - ამბობს თოფურია.

სტადიონის დირექტორი დარჩენილ სამუშაოებზეც გველაპარაკა: „დარჩენილია გადახურვის დამონტაჟების მცირე დეტალები. ასევე, მოსაგვარებელია კიდევ რამდენიმე საკითხი, რომლის გარეშეც სტადიონზე თამაშის ჩატარება შეუძლებელია. პირველი- სტადიონი და მოედანი მესრით უნდა შემოიღობოს, რაც უსაფრთხოების ნორმებიდანაა გამომდინარე. მეორე - ოთახებისთვის ავეჯია შესაძენი.

ამას გარდა, ტრიბუნებთან მისასვლელის მოასფალტებაა საჭირო და მოედნის გარშემო ხელოვნური საფარი უნდა დაიგოს. ახლა სამი ტრიბუნაა ასაშენებელი და ამისთვის ტენდერია გამოსაცხადებელი, ისევე, როგორც მოასფალტებისთვის, მესრის დასაყენებლად და ავეჯის შესაძენად. იმედი მაქვს, ყველაფერი ოპერატიულად გაკეთდება და საქმეც მოესწრება. მე კი უკვე დღეს კარის ძელების დამონტაჟებას ვიწყებ“.

ახლა არანაკლებ მნიშვნელოვანია თავად გუნდში არსებული ვითარება. „კოლხეთი“ ოფიციალურად ფოთის მერიის ბალანსზეა, რომელსაც ჯერ არც კლუბის დირექტორი დაუნიშნავს და არც - მთავარი მწვრთნელი. გუნდი ემზადება, მაგრამ ხელმძღვანელობის დანიშვნამდე გაურკვევლობაა და ყველა მოლოდინის რეჟიმშია

. მთავარია, ამ მშვენიერ სტადიონზე შესასვლელად „კოლხეთი“ სათანადოდ მომზადებული იყოს, თორემ წინა წლებში იყო გუნდი და არ იყო სტადიონი, ახლა კი არავის სურს, რომ პირიქით მოხდეს და სტადიონზე ისეთი გუნდი არ იხილონ, რომელიც ეროვნულ ლიგაში გადასასვლელად ვერ იბრძოლებს - ამბიციური ფოთელი გულშემატკივრები უამბიციო „კოლხეთს“ ვერ შეეგუებიან...

ყოველდღიური სპორტული გაზეთი "ლელო"
1137
მკითხველის კომენტარები / 0 /
მსგავსი ამბები
რუბრიკის სხვა სიახლეები
;