არა მარტო თასების თასი,  ჩემპიონთა ლიგაც მოგვეგოს...

საქარველოს ნაკრების ყოფილმა კაპიტანმა, თბილისის მერმა კახა კალაძემ თბილისის “დინამოს” 13 მაისის წარმატებასთან დაკავშირებით ქვეყნის მთავარ სპორტულ არენაზე გამარჯვების მონაწილე გუნდის ვეტერანებს უმასპინძლა...


“მადლობა იმისთვის, რაც კი გაგიკეთებიათ ჩვენი ქვეყნისთვის, ქართული სპორტისთვის, ფეხბურთისთვის და იმისთვის, რასაც ყოველდღიურ რეჟიმში აკეთებთ. ყველას კარგად გვახსოვს, ჩვენს ქვეყანას 1981 წლის 13-მა მაისმა რამხელა სიხარული მოუტანა.

ეს არ იყო მხოლოდ სპორტული ტრიუმფი, ეს სახელმწიფოებრივად მნიშვნელოვანი გამარჯვება იყო. ერთი რამ შემიძლია ვთქვა, რომ მიზნისკენ სწრაფვას, შრომას, თავდადებას, ყოველთვის მოაქვს შედეგი. საკუთარ თავზე მაქვს ეს ყველაფერი გამოცდილი. აქ არიან ადამიანები, ვისაც უდიდესი წვლილი და როლი აქვს შეტანილი ჩემს წარმატებულ საფეხბურთო კარიერაში.

მინდა, კიდევ ერთხელ ძალიან დიდი მადლობა გადავუხადო მათ! დღეს ისინი ჩვენს სპორტს, მომავალ თაობებს ემსახურებიან. დარწმუნებული ვარ, მომდევნო წლების განმავლობაში ისინი შეძლებენ, ახალი, წარმატებული თაობები გაზარდონ და არა მხოლოდ თასების თასი, არამედ ჩემპიონთა ლიგის თასებიც მოიგონ”, - თქვა კახა კალაძემ.

მან ზოგადად სპორტის მნიშვნელობაზეც ილაპარაკა: “მინდა დავამატო ერთი ძალიან მნიშვნელოვანი რამ - ზოგადად, ჩვენი ერთ-ერთი პრინციპი და მიმართულება ჯანსაღი ცხოვრების წესის დანერგვაა. რა თქმა უნდა, ერთიანი ძალისხმევა უნდა იყოს მიმართული იმისკენ, რომ ჩვენს შვილებს, მომავალ თაობებს ავუხსნათ, თუ რამდენად მნიშვნელოვანია სპორტი, რამდენად მნიშვნელოვანია, იცხოვრო ჯანსაღი წესით. არ არის აუცილებელი, რომ ყველა პროფესიონალი ფეხბურთელი ან მოჭიდავე გამოვიდეს. მთავარია, ეს ყოველდღიურობაში იყოს გადატანილი და სადაც არ უნდა ვიყოთ, რა საქმიანობითაც არ უნდა ვიყოთ დაკავებული, აუცილებლად, ყველგან და ყველაფერში დაგვეხმარება.

აქ შეკრებილ სპორტის სხვადასხვა სახეობის წარმომადგენლებსაც მინდა, მადლობა გადავუხადო თავიანთი საქმიანობისთვის, თუმცა დღევანდელი დღე, 13 მაისი, ქართული ფეხბურთის დღეა. ყველა პატარის ოცნებაა, იმ კლუბში მოხვდეს, რომელსაც თბილისის “დინამო” ჰქვია.

ამ კლუბთან არის დაკავშირებული ქართული ფეხბურთის ყველა წარმატება, ზუსტად იმ ადამიანების დამსახურებით, რომლებიც დღეს აქ არიან შეკრებილი. მინდა, ჯანმრთელობა, დიდხანს სიცოცხლე და წარმატებები გისურვოთ იმ ყოველდღიურ საქმიანობაში, რასაც ქართული სპორტისთვის, ფეხბურთისთვის და ჩვენი ქვეყნისთვის აკეთებთ”.

ყოველდღიური სპორტული გაზეთი "ლელო"
597
მკითხველის კომენტარები / 0 /
მსგავსი ამბები
რუბრიკის სხვა სიახლეები
;