არგენტინა საფრთხეშია... ვიმკითხაოთ: მესია თუ მესა?

არგენტინა - ხორვატია 0:3
21.06. ნიჟნი ნოვგოროდი. ნიჟნი ნოვგოროდ არენა.
გოლები: 0:1 რებიჩი (53), 2:0 მოდრიჩი (81), 0:3 რაკიტიჩი (90)
არგენტინა (4-3-3): კაბალიერო - მერკადო, ოტამენდი, ტალიაფიკო - სალვიო (56. პავონი), მასკერანო, პერესი (68. დიბალა), აკუნია - მესი, აგერო (54. იგუაინი), მესა
მთავარი მწვრთნელი: ხორხე სამპაოლი
ხორვატია (4-2-3-1): სუბაშიჩი - ვრსალკო, ლოვრენი, ვიდა, სტრინიჩი - რაკიტიჩი, ბროზოვიჩი - რებიჩი (57. კრამარიჩი), მოდრიჩი, პერიშიჩი (82. კოვაჩიჩი) - მანჯუკიჩი
მთავარი მწვრთნელი: ზლატკო დალიჩი
გაფრთხილება: რებიჩი (39), მერკადო (51), მანჯუკიჩი (59), ვრსალკო (67), ოტამენდი (85), აკუნია(87), ბროზოვიჩი (90)
არბიტრი: რავშან ირმატოვი (უზბეკეთი)

დასაწყისიდანვე მაღალ ტემპს ველოდით და ასეც მოხდა. ანგარიში კინაღამ გახსნა ხორვატიამ. ივან პერიშიჩის მიერ ძლიერად და ეშმაკურად დარტყმული ბურთი შესანიშნავ ნახტომში მოიგერია ვილი კაბალიერომ.

ზოგადად, არგენტინელთა სამმცველიან დაცვაში ხშირად ჩნდებოდა ხვრელები და ხორვატები მოხერხებულად ცდილობდნენ მათში ბურთის გაძვრენას. ცოტა ხანში მეტოქის კარს თვალი არგენტინელებმაც შეავლეს. მასიმილიანო მესას დარტყმა ხორვატმა მცველმა დაბლოკა.

ტაიმის დასრულებას თხუთმეტი წუთი რომ დააკლდა, არგენტინამ ასპროცენტიანი შანსი გაფლანგა. ხორვატთა მცველებმა და მეკარემ შეუთანხმებლად ითამაშეს. ენცო პერესი ცარიელი კარის წინ აღმოჩნდა და დაარტყა, მაგრამ კაცმა არ იცის, როგორ ვერ გაიტანა. სულ მალე მარიო მანჯუკიჩმა ააცილა თავური - გოლი თითქოს გარდაუვალი ჩანდა.

ხორვატია კურიოზული გოლით დაწინაურდა. ვილი კაბალიერომ ვერ აიტანა ბურთი, ჩააბარა ის რებიჩს და ანტემაც საგოლე შანსი ხელიდან არ გაუშვა. ხორვატია დაწინაურდა. გოლი მთლიანად კაბალეროს სინდისზეა.

არგენტინა გარკვეული ხნის შემდეგ გამოფხიზლდა. პერესს სუბაშიჩმა არ გაატანინა და დამატებაზე ვერც მესიმ შეაგდო. დიდებული შანსი იყო ანგარიშის გასათანაბრებლად. მალევე მანჯუკიჩმა ვერ გაიტანა ახლოდან.

არგენტინას მეორე ლუკა მოდრიჩმა გაიტანა. "რეალის" საყრდენმა საჯარიმოს წინა ხაზთან მიიღო ბურთი, მახილგონივრულ მანევრს კი დიდებული დარტყმა მოაყოლა და ულამაზესი გოლი შეაგდო.დარჩენილ დროში ივან რაკიტიჩმა არგენტინელთა კარის ხარიხა "მოიკითხა". სულ ბოლოს კი ხორვატთა კონტრშეტევა რაკიტიჩის გოლით დასრულდა. არგენტინელთა დაცვა ერთხელაც გაბითურდა.

არგენტინის ნაკრები ახლა საკუთარ თავზე აღარაა დამოკიდებული. მას პლეი - ოფში გასვლა ძალიან გაუჭირდება. ფაქტია, "ალბისელესტეს" ასეთი თამაშით პლეი - ოფში არც არაფერი ესაქმება.

ანტიგმირი
მოდით, ნუ გადავტეხთ ჯოხს მხოლოდ მეკარე კაბალიეროზე, ან ლიონელ მესიზე, რომელმაც მორიგი უფერული შეხვედრა ჩაატარა ნაკრებში და ძალიან ძნელი გასარჩევი იყო, რომელი გახლდათ მესი და რომელი მესა. ხორხე სამპაოლიმ ვერ შეძლო რუსეთში საშუალოდ მომზადებული გუნდის ჩაყვანა მაინც.გასაგებია, რომ შემადგენლობით ხორვატია არგენტინაზე უარესი სულაც არაა, მაგრამ ასეთ გაბითურებას ალბათ მაინც არავინ ელოდა. როცა ამ მასშტაბის ფიასკო ხდება, დამნაშავე ყოველთვის მწვრთნელია.

გმირი
ხორვატიის მთელმა ნაკრებმაშესანიშნავად ითამაშა, მაგრამ მინდორზე მაინც იყო ერთი ფეხბურთელი, რომელიც მთელ შეხვედრას წარმართავდა. ლუკა მოდრიჩმა მართლაც რომ დიდებულად ითამაშა. შესაბამისად, ის ამ შეხვედრის მთავარი გმირია - ხორვატიის ნაკრები ბედნიერია იმით, რომ ასეთი დონის შემსრულებელი ჰყავს.

გადამწყვეტი
სამპაოლიმ ექსპერიმენტების გაგრძელება მსოფლიოს ჩემპიონატზეც გააგრძელა, ასეთი რამ კი დაუშვებელია. ჩვენ ყველამ ვნახეთ დაშლილი და დემორალიზებული არგენტინა. ყველამ ვნახეთ, რა სახე ჰქონდა ,ესის, როცა ის ეროვნულ ჰიმნს ასრულებდა. ასეთი რამ შემთხვევით არ ხდება. როცა გუნდი ერთიანი არაა, ის ვერაფერს მოიგებს. ეს აქსიომაა.

1218
მკითხველის კომენტარები / 0 /
;