არგენტინული ფიასკოს მიზეზები. ანუ, როცა ყველაფერში დამნაშავე კორუფციაა. გამაოგნებელი ფაქტები, რომელზეც დღემდე ყველა თვალს ხუჭავს

არგენტინა სავსეა უმაღლესი დონის მწვრთნელებით, ეროვნულ გუნდს კი ახალბედა სკალონი თავკაცობს

ლიონელ მესი ისევ ტიტულის გარეშე დარჩა. არგენტინის ნაკრები ნახევარფინალში გამოეთიშა "კოპა ამერიკას". "ალბისელესტეს" გულშემატკივრებს კიდევ ერთხელ გაუცრუვდათ იმედები. საინტერესოა, რა ხდება რეალურად არგენტინულ ფეხბურთში?

ცუდი თვითმფრინავები, ქრთამი, ეკონომია... ნაკრები ჩინოვნიკების გამო იტანჯება

2014 წელს არგენტინული ფეხბურთის შეფი ხულიო გრონდონა გულის უკმარისობით გარდაიცვალა ზედ ოპერაციის წინ. ამ ამბიდან ერთი წლის შემდეგ გაიმართა საფეხბურთო ასოციაციის არჩევნები. კანდიდატი იყო 2, ამომრჩეველი - 75.

პირველი იყო გრონდონას მემკვიდრე ლუის სეგურა, მეორე კი - ცვლილებების მომხრე მარსელო ტინელი. ორივე მათგანმა 38-38 ხმა მიიღო. შედეგები გაუქმდა, არჩევნები კი 2016 წლის ივლისისთვის დაინიშნა. მანამდე, არგენტინული ფეხბურთის სათავეში სეგურა დარჩა, თუმცა ივნისში ის გადადგა. მას ბრალად ედებოდა ტელეკონტრაქტებთან დაკავშირებული თაღლითობები.

როცა გუნდისა თუ ცალკეული ფეხბურთელების ჩავადნაზე ლაპარაკობენ, ბევრს ავიწყდება, რომ ფეხბურთელები არ არიან რობოტები და მათთვის არანაკლებად მნიშვნელოვანია პირობები. როცა ლიონელ მესი მინდორზე გადის, მისგან ყველა სასწაულს ელის, მაგრამ რა უნდა ვუყოთ სისტემურ პრობლემებს?

ისტორია, რომლითაც დავიწყეთ ჩვენი წერილი, ძალიან კარგად აღწერს იმ ქაოსს, რომელიც დღეს არგენტინულ ფეხბურთშია გამეფებული. ყველაფერში ეკონომიას აკეთებენ, მათ შორის, მწვრთნელის საკითხშიც.

ხულიო გრონდონა

დიქტატურის 35 წელი და დაგროვებული მილიონები

როცა არგენტინამ მოიგო ბოლო ტიტული ("კოპა ამერიკა" 1993 წელს), მაშინ მესი ჯერ სკოლაშიც არ დადიოდა. პრობლემები მის დაბადებამდე კარგა ხნით ადრე დაიწყო - 1979 წელს, როცა არგენტინულ ფეხბურთს სათავეში ჩაუდგა ხულიო გრონდონა.

არგენტინა მაშინ მსოფლიოს მოქმედი ჩემპიონი იყო. ამ ქვეყნის ნაკრებში თამაშობდნენ დიეგო მარადონა და მარიო კემპესი. არგენტინის ჩემპიონატი მსოფლიოში ერთ-ერთი გამორჩეული იყო. მომავალი ჩანდა. მაშინ არავინ იცოდა, რომ არგენტინული ფეხბურთის სათავეში მოვიდა ადამიანი, ვისთვისაც ყველაზე ძვირფასი იყო საკუთარი ინტერესები.

ახალმა პრეზიდენტმა საკვანძო თანამდებობებზე თავისი ახლობლები დანიშნა. საპასუხისმგებლო პოსტები დაურიგა თავის ორ შვილს. რაც მთავარია, ამ კაცის ხელში აღმოჩნდა უდიდესი გავლენა.

1988 წელს გრონდონა ფიფას ვიცე-პრეზიდენტი გახდა, 10 წლის შემდეგ კი ახლო მეგობარ ზეპ ბლატერს დაეხმარა თანამდებობის ხელში ჩაგდებაში. გრონდონამ ჩაიბარა ფიფას ფინანსური კომიტეტი და რამდენიმე ათეული წლის განმავლობაში ის მსოფლიო ფეხბურთში მეორე კაცად რჩებოდა. ეს იმის მიუხედავად, რომ... არც ეკონომიკა იცოდა და არც... ინგლისური.

არგენტინაში გრონდონას მმართველობა გაჯერებული იყო მაფიოზური მეთოდებით. ის ყველანაირი ხერხით იძენდა მოყვრებს და სჯიდა მტრებს. გრონდონა აკონტროლებდა ტელეკონტრაქტებს, საპრიზო ფონდებსა და ყველა შემოსავალს, რომელიც არსებობდა არგენტინულ ფეხბურთში.

დიდი კლუბები მილიონიან ვალებში ვარდებოდნენ. პატარები საერთოდ კვდებოდნენ, მაგრამ გრონდონას საზოგადოდ არავინ აკრიტიკებდა. როცა გამოძიება გრონდონამდე მიდიოდა, მისი სიკვდილის შემდეგაც კი, სახელით მას არავინ იხსენიებდა, უწოდებდნენ "საფეხბურთო ჩინოსან ნომერ ერთს" და "ფიფას ვიცე-პრეზიდენტს". ერთი სიტყვით, სიკვდილის შემდეგაც ძალიან ეშინოდათ მისი.

ერთ-ერთი ასეთი მოწმე იყო შვეიცარიელი ბანკირი ხორხე არსუაგა. მისი თქმით, მხოლოდ 2010-14 წლებში გრონდონამ მისი გავლით მიიღო ქრთამი 25 მილიონი დოლარის ოდენობით. როცა გრონდონა მოკვდა, ბანკირმა ფული მის მემკვიდრეებს გადაურიცხა.

მანამდე, ბევრი თვლიდა, რომ გრონდონამ 10 მილიონი დოლარი აიღო ქრთამად იმისთვის, რომ მუნდიალისთვის სამხრეთ აფრიკას ემასპინძლა. ოფიციალურად ეს ფული გადაირიცხა იმისთვის, რომ კარიბის ზღვის წარმოშობით აფრიკელ მოსახლეობას მხარი დაეჭირა სამხრეთაფრიკული კამპანიისთვის.

მოგვიანებით, გრონდონას თანაშემწე კარლოს ავილა გამოტყდა, რომ გრონდონას არაერთი ანგარიში ჰქონდა გახსნილი არგენტინის საფეხბურთო კავშირის თანამშრომლის სახელზე, რომელიც კარგა ხნის... გარდაცვლილი გახლდათ. ამ ანგარიშებზე აღმოჩნდა 30 მილიონი დოლარი!

არგენტინული ფეხბურთი თანდათან ეშვებოდა უფსკრულში, ამასობაში კი გრონდონა და მისი გარემოცვა მდიდრდებოდა. მან სამსახურიდან გაათავისუფლა ჟურნალისტი, რომელმაც მისთვის არასასიამოვნო კითხვა დასვა, ასევე გააუქმებინა კონტრაქტი სახელმწიფო ტელევიზიასთან. კერძო ტელეარხები შედარებით ნაკლებს იხდიდნენ, მაგრამ იხდიდნენ მაშინვე...

არსებობს საფუძვლიანი ეჭვი იმისა, რომ ზოგჯერ გრონდონა, კლუბების ხელმძღვანელების ინიციატივით, ახდენდა არგენტინის ჩემპიონატის შეხვედრების შედეგების მანიპულირებას. გააჩნია, ვინ რამდენს გადაიხდიდა.

"ბარა ბრავა" - ასე ერქვა თავის დროზე ფანატურ და მერე მაფიოზულ ამბებში გადაზრდილ ორგანიზაციას, რომელიც გრონდონას მითითებით გუნდებს შიგნიდან აკონტროლებდნენ. "ჩემზე გაცილებით მეტი დასმენაა შესული, ვიდრე ალ კაპონეზე, მაგრამ აქამდე ვერაფერი მიპოვეს", - ამბობდა თავის დროზე "ჩინოსანი ნომერი ერთი".

გრონდონას მხარდამჭერი, რამდენჯერმე ნასამართლები...

აღარ არის გრონდონა, მაგრამ არგენტინულ ფეხბურთში საქმეები უფრო ცუდად არის, ვიდრე იყო ადრე. პირველივე არჩევნებზე გვერდზე გაწიეს ცვლილებების მომხრეები და გავლენა ხელში ისევ გრონდონას მემკვიდრეებმა ჩაიგდეს. სეგურას გადადგომის შემდეგ არგენტინის ფეხბურთის ფედერაციის პრეზიდენტი გახდა კლაუდიო ტაპია, მეტსახელად - "ჩიკი".

"ჩემი პიროვნება შექმნა გრონდონამ. სანამ ცოცხალი ვარ, მისი საქმეების ბოლომდე მისაყვანად ვიბრძოლებ", - განაცხადა მან. ადრე ტაპიას ბევრი არ იცნობდა, არჩევნებში გამარჯვების შემდეგ კი მან გავლენის დაგროვება დაიწყო. მას ცოლად ჰყავს პროფკავშირების ხელმძღვანელისა და "ინდეპენდიენტეს" პრეზიდენტის, უგო მოანოს ქალიშვილი. სწორედ მოანომ დაუფინანსა სიძეს საარჩევნო კამპანია.

პრეზიდენტის წინაღმდეგ სხვადასხვა დროს სისხლის სამართლის ორი საქმე აღიძრა. პირველი იმიტომ, რომ ეკოლოგიის სამსახურში მუშაობდა და ამავე დროს ხელფასს ერთ-ერთი კომპანიიდანაც იღებდა. მეორე საქმე კი იმის გამო აღიძრა, რომ სამართალდამცავთა აზრით, ტაპია ეკოლოგიის სამსახურის უფროსობას საარჩევნოდ იყენებდა.

მისი მარჯვენა ხელია სანტიაგო ტოვიგრინო - არგენტინის საფეხბურთო ასოციაციის აღმასრულებელი მდივანი რომელსაც ჯერ იმისთვის აღუძრეს საქმე, რომ 2017 წელს არჩევნებს აყალბებდა, მერე კი მას ბრალად უარესი დასდეს - ნარკოფაბრიკის შექმნა.

ფედერაცია ვაჭრობს არგენტინის ნაკრების შედეგებით

ფაქტია, რომ ასეთი ხალხი ხელიდან არ გაუშვებს შანსს, ნაკრების მეშვეობითაც იშოვოს ფული. არგენტინის ნაკრებში თამაშობს მსოფლიოს ორი საუკეთესო ფეხბურთელიდან ერთ-ერთი. გარდა ამისა, იქ კიდევ არიან სხვა ვარსკვლავებიც - სერხიო აგუერო, პაულო დიბალა...

არგენტინასთან თამაში მილიონ დოლარამდე ღირს. ასეთ თანხას გადაიხდიან მხოლოდ ისინი, ვისთვისაც მესის წინააღმდეგ თამაში უკვე მიღწევაა და არავითარ შემთხვევაში - ტოპნაკრებები. არგენტინის ფეხბურთის ფედერაციას მთელი მსოფლიოს მასშტაბით დაჰყავს ნაკრები, ათამაშებს სუსტ მეტოქეებთან და აკეთებს მილიონებს.

ეს არის ერთ-ერთი მთავარი მიზეზი იმისა, რომ "ალბისელესტე" მოუმზადებელი ხვდება ხოლმე დიდ ტურნირებს. ფიფას რეიტინგის მეორე ასეულის გუნდებს საერთო არაფერი აქვთ არგენტინელთა რეალურ კონკურენტებთან. მსოფლიოს 2018 წლის ჩემპიონატის წინ არგენტინამ მხოლოდ ერთი საწვრთნელი მატჩი ჩაატარა და ისიც... ჰაიტის წინააღმდეგ. "კოპა ამერიკის" წინ კი ნიკარაგუასთან "მოსინჯა ძალები".

ეს ყველაფერი არაა. არგენტინა არის ერთადერთი ნაკრები, რომლის მიერ დაფიქსირებული შედეგების რეალურობას ძალიან ხშირად აყენებენ ეჭვქვეშ. დიდი სკანდალი მოხდა 2011 წელს, როცა "ალბისელესტემ" გასვლაზე 1:4 წააგო ნიგერიასთან.

ერთადერთი გოლი სამხრეთამერიკელებმა... 98-ე წუთზე გაიტანეს. მოგვიანებით გაირკვა, რომ დიდი ფული იყო დადებული 4,5-ზე მეტ გოლზე. 8 წლის შემდეგ ფიფამ დისკვალიფიკაციით დასაჯა ამ მატჩის ნიგერიელი მსაჯი.

არგენტინის ფეხბურთის ფედერაციის პრეზიდენტი კლაუდიო ტაპია (მარჯვნივ) და
ნაკრებში კონსულტანტად მიწვეული ლეგენდარული ლუის სესარ მენოტი.
მარცხნივ ალბისელესტეს მწვრთნელი ლიონელ სკალონი

არგენტინას არ აქვს ფული, ეკონომია და ისევ ეკონომია...

არგენტინელი მწვრთნელები მთელ მსოფლიოში ერთ-ერთ საუკეთესოებად ითვლებიან. "კოპა ამერიკაზე" კი ნაკრებს ხელმძღვანელობდა სპეციალისტი, რომელიც პირველად მუშაობს მთავარი მწვრთნელის პოსტზე. მაურისიო პოჩეტინოსა და დიეგო სიმეონეს სამსახური წელიწადში 15-20 მილიონი ევრო  ღირს. ეს ფული საფეხბურთო ასოციაციას არ აქვს.

თავის დროზე, არგენტინის ფეხბურთის ფედერაციამ ძლივს გამოძებნა თანხა ხორხე სამპაოლის დასანიშნად. მანამდე გუნდს ედგარდო ბაუსა ხელმძღვანელობდა, ვინც არგენტინა კინაღამ მუნდიალის გარეშე დატოვა. მერე სამპაოლი გაუშვეს და ახლა მისთვის მისაცემი ფულის მოძიება გახდა პრობლემა. ყველამ იცის, რატომ წავიდა ეროვნული გუნდიდან ტატა მარტინო - მას 7 თვის ხელფასი არ გადაუხადეს.

რაზეა ლაპარაკი, როცა არგენტინის ნაკრები ძალიან ცუდი თვითმფრინავებით დაფრინავს და თან - ტრანზიტებით, ჩერდება არაერთ აეროპორტში. ეს ყველამ იცის და ესეცაა ერთ-ერთი მიზეზი იმისა, რომ ასეთ ვითარებაში ტოპმწვრთნელები მის გაწვრთნას არ დათანხმდებიან...

1379
მკითხველის კომენტარები / 1 /
Ng
0
რა დეტალურად არის აღწერილი ყველაფერი, იქნებ ასე გულდასმით ჩვენი ფეხბურთის და ზოგადად ფედერაციის მუშაობაზე დაგეწერა, არამგონია ნაკლები მაშტაბები იყოს კორუფციის.
მსგავსი ამბები
რუბრიკის სხვა სიახლეები
;