წყალბურთი: თბილისის არენა უკრაინის ჩემპიონია

ქართველ წყალბურთელებს ჯერ კიდევ გასული საუკუნის 90-იან წლებში არაერთხელ გამოუჩენიათ თავი რუსეთისა და უკრაინის პირველობებში. ცნობილი მწვრთნელის - სოსო მაისურაძის ხელმძღვანელობით ჩვენმა ბიჭებმა ოთხჯერ რუსეთის ახალგაზრდული პირველობა მოიგეს და ერთხელ მეორე ადგილი დაიკავეს; მოზარდებმა ორჯერ უკრაინის ჩემპიონობა მოიპოვეს, უფროსებმა კი ამ ქვეყნის ჩემპიონატებში ერთი ვერცხლისა და სამი ბრინჯაოს მედალი მოიხვეჭეს.

დღეს ის ბიჭები ეროვნული ნაკრების ძირითად ბირთვს შეადგენენ.

და აი, სოსო მაისურაძის თავკაცობით (მწვრთნელები - ირაკლი გოგელია და ნოდარ ჩხარტიშვილი) ახლა 2003 წელს დაბადებულმა წყალბურთელებმა გამოიჩინეს თავი - თბილისის "არენა" (დიმიტრი ჭუმბურიძე, დავით თუთბერიძე, ლუკა თავყელიშვილი, ნიკა ლაზარიშვილი, ლუკა ჩიქოვანი, დავით ჩხეიძე, ცოტნე ჯიბლაძე, ილია ოგანჯანოვი, ბესო ახვლედიანი, გიორგი ერისთავი, საბა გოგიჩაიშვილი, გიორგი აზარაშვილი, ლუკა მელიქიძე) ამ ასაკში უკრაინის ჩემპიონი გახდა.

- შარშან ჰოლანდიაში 19-წლამდელთა ევროპის ჩემპიონიტისას შევხვდი უკრაინის წყალბურთის მესვეურებსა და მწვრთნელებს და ვკითხე, თავიანთი ქვეყნის პირველობაზე თუ დაგვიშვებდნენ, - გვითხრა დნეპროპეტროვსკიდან დაბრუნებულმა სოსო მაისურაძემ. - სიამოვნებით დამთანხმდნენ. ეს იდეა 2003 წელს დაბადებულ შეგირდებსა და მათს მშობლებს გავანდე.

მართალია, "არენას" საქართველოს ჩემპიონობა უკვე ორჯერ ჰქონდა მოპოვებული, მაგრამ ამ წყალბურთელთა შესაძლებლობებს არავინ იცნობდა, ამიტომ დაფინანსება ვერავის ვთხოვეთ. მოტივაცია იმდენად დიდი იყო, რომ მშობლებმა თავად გადაწყვიტეს ხარჯების დაფარვა. ასე წავედით ხარკოვში შესარჩევ ტურნირზე...

2003 წელს დაბადებულთა უკრაინის ჩემპიონატში მასპინძელთა 17 გუნდი და თბილისის "არენა" ჩაებნენ. ორგანიზატორებმა ისინი სამ ექვს-ექვსგუნდა ქვეჯგუფში გადაანაწილეს. ჩვენებმა შესარჩევ ეტაპზე ოთხი შეხვედრა მოიგეს და ერთი წააგეს ხარკოვის ოლქის ნაკრებთან - 9:10, მაგრამ ნახევარფინალ ტურნირში მაინც გავიდნენ. აქ კი 12 გუნდი ორ ნაწილად გაიყო. წრიულმა ორთაბრძოლებმა 10 ფინალისტი გამოავლინა. "არენამ" ხუთივე პაექრობაში წარმატებას მიაღწია, მათ შორის - ხარკოვის ოლქის ნაკრებთან, რომელთანაც რევანში აიღო - 11:2, კიევის "დინამოს" 25:3 სძლია, ორგზის ოლიმპიური ჩემპიონის - ალექსეი ბარკალოვის კლუბის წარმომადგენლები 30:0 (!) გაანადგურა, კიევის მეორე გუნდი და "კლოჩკოვოი", შესაბამისად, 15:6 და 9:5 დაამარცხა და ფინალურ ეტაპზე თამაშის უფლება მოიპოვა კიდევ ოთხ გუნდთან ერთად. მეორე ჯგუფიდან, ასევე, უდანაკარგოდ განვლო გზა უჟგოროდის "დინამომ".

გადამწყვეტ პაექრობებს დნეპროპეტროვსკმა უმასპინძლა. სოსო მაისურაძის შეგირდებმა აქაც ზედიზედ აჯობეს ლვოვის "ევროსპორტს" (26:3), "ოდესას" (23:5), "დნიპროს" (24:8), უჟგოროდის "დინამოს" (14:7), "ლვოვს" (5:3) და 27 ქულით ჩემპიონობა მოიპოვეს. 24 ქულით ვერცხლი უჟგოროდის "დინამოს", ხოლო 19 ქულით ბრინჯაო ხარკოვის ოლქის გუნდს ერგო.

- შესარჩევ ეტაპზე გამგზავრების წინ სხვადასხვა გუნდებიდან სამი წყალბურთელი დავიმატეთ. ხარკოვში მიღწეული წარმატების შემდეგ როგორც უკარინელების, ისე ქართველთა ყურადღება მივიპყარით. ნახევარფინალურ რაუნდზე გასამგზავრებლად თბილისის მერიის სპორტის სამსახური დაგვიდგა გვერდით. ფინალურ ეტაპზე წასასვლელი ბილეთები კი საწყლოსნო სახეობათა ეროვნულმა ფედერაციამ შეგვიძინა.

დნეპროპეტროვსკში იმ იმედით ჩავედით, რომ უმედლოდ არ დავბრუნდებოდით. ჩემპიონობამ ძალიან გაგვახარა. ყველა გუნდს, ფაქტობრივად, დიდი ანგარიშებით ვძლიეთ. მას შემდეგ, რაც მთავარი კონკურენტი უჟგოროდის "დინამო" დავამარცხეთ, ოქროს მედლები გავინაღდეთ და ეიფორიაში მყოფ ბიჭებს ბოლო ტურში "ლვოვთან" ემოციების მოთოკვა გაუჭირდათ, ამიტომაც 5:3-ით გამარჯვებას დავჯერდით.

- ტურნირის შემდეგ უკრაინელებმა თქვენი მიწვევა ხომ არ ინანეს?
-არა, რას ამბობთ. აქ ხომ მთავარი გამარჯვება არ იყო - უკრაინელებს გამოცდილება გავუზიარეთ და რაღაც ვასწავლეთ, მათგან კი ჩვენც რაღაც შევიძინეთ. ასე რომ, ერთმანეთი გავამდიდრეთ. ნიჭიერი თაობა მოდის და ამ ბიჭებს მეტი ყურადღება სჭირდება. სპონსორი და საერთაშორისო ტურნირებში თამაშის მეტი გამოცდილება გვინდა.

არადა, ოთხი წელიწადი სწრაფად გაირბენს და ამ წყალბურთელებს ევროპის პირველობა ექნებათ სათამაშო. უკრაინელები გაისად ბარკალოვის სახელობის საერთაშორისო ტურნირს ატარებენ მოზარდებისთვის ნაკრები გუნდების დონეზე და ჩვენც მიგვიწვიეს ბელარუსებთან, თურქებსა და აზერბაიჯანელებთან ერთად. ისიც გვითხრეს, უკრაინის პირველობებში სხვა ასაკის წყალბურთელებითაც ჩამოდითო. სახსრები თუ იქნა, გამორიცხული არაფერია.

- "არენას" მომავალ გეგმებზე რას იტყვით?
- ის წარმატება უკვე ისტორიის კუთვნილება გახდა, ასე რომ, იწყება თავდაუზოგავი ვარჯიშები, სამომავლო შეჯიბრებებისთვის მზადება. ნოემბერში ერთი წლით უფროსების - 2002 წელს დაბადებულ წყალბურთელთა საქართველოს პირველობაში ჩავებმებით. დანარჩენი კი ვნახოთ...

ყოველდღიური სპორტული გაზეთი "ლელო"
1270
მკითხველის კომენტარები / 0 /
რუბრიკის სხვა სიახლეები
;