მშვენიერი არინა საბალენკას დაპირება

ვიდრე ავსტრალიის დიდი ნაწილი ხანძარში გახვეულა და გამოსავალს ეძებს, ამ ქვეყნის სამხრეთში მდებარე ქალაქი ადელაიდა საჩოგბურთო ტურნირს მასპინძლობს. მასში ბელარუსი არინა საბალენკა ასპარეზობს და უკვე ნახევარფინალს უწია.

21 წლის გოგონამ გუშინ ტურნირზე მეორე ნომრად განთესილი რუმინელი სიმონა ჰალეპი დაამარცხა და დღეს ფინალის საგზურის მოსაპოვებლად უკრაინელ დარინა იასტრემსკას შეხვდება.

{jcomments off}

საბალენკა მსოფლიოს მე–12 ჩოგანია. ჯერჯერობით მას დიდი ტიტულებით არ დაუკვეხნია, მაგრამ WTA –ს 8 ტურნირი კი აქვს მოგებული.

მისი ყველაზე დიდი მიღწევა შარშან წყვილთა თანრიგში ბელგიელ ელის მერტენსთან ერთად დიდი მუზარადის ტურნირის მოგება იყო. მაშინ ბელარუსულ – ბელგიურმა წყვილმა ამერიკის ღია პირველობა ჩაამთავრა ტრიუმფით, დაამარცხა –რა ფინალურ დაპირისპირებაში კიდევ ერთი ბელარუსის ვიქტორია აზარენკას და ავსტრალიელი ეშლი ბარტის წყვილი.

აღსანიშნავია, რომ ბარტი ადელაიდაშიც ასპარეზობს და იქ საბალენკას დარად ხვალ თავადაც ფინალში გასასვლელად იბრძოლებს მეორე ნახევარფინალურ წყვილში (ამერიკელ დანიელ კოლინზს შეხვდება).

დავუბრუნდეთ არინა საბალენკას, რომელიც ლამაზია და სოციალურ ქსელებში (ინსტაგრამი, ტვიტერი, ფეისბუქი) ბევრი ქომაგი, თუ მნახველი ჰყავს. ამ ფლანგზე მის პოპულარობას თავისივე აქტიურობაც დიდწილად განაპირობებს, რადგან არინა გვარიანად ანებივრებს თაყვანისმცემლებს ფოტოებით და ვიდეობით მსოფლიოს სხვადასხვა წერტილებიდან. რაც საინტერესოა...

საინტერესო ისიცაა, რომ არინა ჩოგბურთზე შემთხვევით მოხვდა. დიახ, შემთხვევით, რადგან სპორტის ამ სახეობაზე არჩევანი მაშინ გააკეთა, როდესაც 6 წლის გოგონა მამასთან ერთად მინსკში მანქანით სეირნობდა და ასე შემთხვევით მათ კორტებთან გაიარეს. მერე შეიარეს, ბავშვს მოეწონა და შერჩა კორტებს.

სპორტის სიყვარული არინას მამისგან სერგეი საბალენკასაგან აქვს, რომელიც თავად ჰოკეისტი გახლდათ. ინტერვიუებში იგი მამის თაობაზე ყოველთვის დიდი სითბოთი საუბრობდა. მისგან მუდამ გრძნობდა მაქსიმალურ მხარდაჭერას. ბოლოს კი დიდი ტკივილით მოუწია შეხებოდა ამ თემას. ნოემბერში არინას მამა გულის შეტევით გარდაიცვალა. არადა კაცი მხოლოდ 44 წლის იყო.

,,მას ძალიან უნდოდა მე პირველი ჩოგანი გავმხდარიყავი" – ამბობს საბალენკა და პირობას დებს, რომ ყველაფერს გააკეთებს მამის სურვილის შესასრულებლად.
საინტერესოა, რომ საბალენკას მეგობარი ბიჭი მატვეი ბოჟკოც სპორტის იმ სახეობას ანიჭებს უპირატესობას, რასაც არინას ახლახანს გარდაცვლილი მამა. ბოჟკო სანკტ პეტერბურგის ჰოკეის გუნდში თამაშობს. წყვილს რამდენიმე წელიწადია ურთიერთობა აქვთ, რამდენიმე თვის წინათ კი დაინიშნენ.

,,ნიშნობა შედგა, ოღონდ ქორწილი არ იქნება" – თქვა არინამ ფაქტის კომენტირებისას. გოგონას უბრალოდ ქორწილი არ ჰყვარებია. 

სხვათაშორის, როდესაც პირველად მის შეყვარებულზე და მოსალოდნელ ნიშნობაზე გაჟღერდა მედიაში, ჩათვალეს რომ საბალენკას საქმრო მისი მწვრთნელი დიმიტრი ტურსუნოვი იქნებოდა.

ეს საბალენკამ უმალ უარყო და მერე თავისი რჩეულიც გამოაჩინა.

საბალენკას ხელზე ვეფხვი აქვს გამოსახული. ქალი ტატუზე არა, მაგრამ თურმე ამ ცხოველზე გიჟდება. ტატუს გაკეთებასაც მხოლოდ იმ შემთხვევაში თვლიდა საჭიროდ, თუ ვეფხვს გამოისახავდა. ჰყვება, რომ ტატუ მშობლებისგან ჩუმად გაიკეთა და სახლში რომ დაბრუნდა და მათ ვეფხვი აჩვენა – მამამ გაიცინა, დედა კი მთელი კვირა აღარ ელაპარაკებოდა.

არინა საბალენკა ადელაიდაში თუ მოიგებს ტურნირს ერთ პატარა ნაბიჯსაც გადადგამს პირველი ჩოგნობისკენ და შესაბამისად მამის სურვილის შესრულებისკენ.

7754
მკითხველის კომენტარები / 0 /
მსგავსი ამბები
რუბრიკის სხვა სიახლეები
;