არის თუ არა  ეს მაქინაცია? ანუ როგორ ააწყო აგენტმა ზაჰავიმ სატრანსფერო სქემა რეალის  ახალი ვარსკვლავისთვის 

სერბი ფორვარდი ლუკა იოვიჩი მადრიდის “რეალის” პირველი შენაძენი გახდა ახალი სეზონის წინ. “სამეფო კლუბმა” 21 წლის ფეხბურთელში 60 მილიონი ევრო გადაიხადა. Football Leaks-ი საინტერესო სატრანსფერო ისტორიას გვიამბობს...

Football Leaks-ი სკანდალური გამოცემაა, რომელიც ევროპის სხვადასხვა ქვეყნის ჟურნალისტებს აერთიანებს. ისინი მსოფლიო ფეხბურთში არსებულ ათასგვარ დარღვევას ამხელენ. მაგალითად, ლუკა იოვიჩის ერთ-ერთ ტრანსფერთან დაკავშირებით ისინი წერენ, რომ ეს იყო ცნობილი ებრაელი საფეხბურთო აგენტის, პინი ზაჰავის მიერ მოფიქრებული სქემა. 

2015 წლის მაისში ფიფამ სერიოზულად შეცვალა სატრანსფერო წესები. მესამე პირებს აეკრძალათ, ჰქონოდათ ფეხბურთელებზე უფლებები. უნდა შეცვლილიყო ასევე ის რეალობა, რომლის მიხედვითაც არაერთი ფეხბურთელი ეკუთვნოდა ერთბაშად ორ კლუბს.

იოვიჩის გარემოცვამ და მისმა აგენტებმა 6 თვით ადრე იცოდნენ ამ სიახლის თაობაზე. სწორედ აკრძალვამდე 6 თვით ადრე “ცრვენა ზვეზდამ” ფეხბურთელზე უფლებების 70 პროცენტი 1,4 მილიონ ევროდ მიჰყიდა კვიპროსულ “აპოლონს”, დანარჩენი 30 პროცენტის გამოსასყიდ თანხად კი 600 ათასი ევრო დაითქვა.

მაშინ სერბულ კლუბში ამბობდნენ, რომ ეს იყო ვალების გადახდისა და უეფას ლიცენზიის მიღების ერთადერთი საშუალება.

იოვიჩს კიდევ ერთი წლის განმავლობაში ჰქონდა კონტრაქტი “ცრვენა ზვეზდასთან”. მას “აპოლონის” შემადგენლობაში ერთი მატჩიც არ ჩაუტარებია. ის კი არა, შეიძლება, საერთოდ არც ჩასულა კვიპროსში...

ერთი წლის შემდეგ “ბენფიკამ” იოვიჩი 6.65 მილიონ ევროდ გამოისყიდა. აქედან 4,65 მილიონი მიიღო “აპოლონმა”, სადღაც ორ მილიონამდე კი “ცრვენა ზვეზდას” დარჩა.

ასეთივე სქემა გაიარა კიდევ სამმა ფეხბურთელმა - მიატ გაჩინოვიჩმა (ახლა”აინტრახტში”თამაშობს), ნიკოლა მაქსიმოვიჩმა (“ნაპოლი”) და მარკო პავლოვსკიმ (“ვოჟდოვაცი”, სერბეთი).

რატომ დასჭირდა ეს “ცრვენა ზვეზდას”, უცნობია. არსებობს მხოლოდ Football Leaks-ის ვარაუდი.

ზვეზდან ტერზიჩი

სერბეთის ფეხბურთის ფედერაციის პრეზიდენტი იყო 2005-08 წლებში. ამ პოსტზე ტერზიჩის საქმიანობა მოულოდნელად შეწყდა. მას ოთხი ტრანსფერიდან ფულის მითვისება დაბრალდა. ის 2000-იან წლებში “ოფკ ბელგრადის” პრეზიდენტი იყო და ბრალდებაც იქიდან მოდიოდა. ტერზიჩი ორი წლის განმავლობაში იმალებოდა. 

ის 2009 წელს დააკავა პოლიციამ ჩერნოგორიაში... ერთ-ერთ საფეხბურთო მატჩზე. ერთი წლის შემდეგ ტერზიჩმა მილიონი ევრო გადაიხადა გირაოდ და გაათავისუფლეს. მალე ის ფეხბურთს დაუბრუნდა და “ცრვენა ზვეზდას” პრეზიდენტი გახდა. ეს კი ის კლუბია, სადაც იოვიჩი თამაშობდა...

ნიკოლა დამიანაცი

ტერზიჩის დის ქმარი. “პარტიზანის” ყოფილი მეკარე. Football Leaks-ის ცნობით, მონაწილეობდა “ბენფიკასთან” მოლაპარაკებაში და მიიღო 100 ათასი ევრო. არის იმ სააგენტოს (Lian Sports) თანამფლობელი, რომელიც კურირებს იოვიჩის სატრანსფერო საქმეებს.

მარკ როტენბერგი

შვეიცარიის მოქალაქე. კომპანია Lian Sports-ის კიდევ ერთი თანამფლობელი. 2016 წლის იანვარში შეხვდა “ბენფიკას” პრეზიდენტ ლუიშ ფელიპე ვიეირას. მისი მიზანი იყო ტრანსფერის ბოლომდე მოგვარება ფინანსური კუთხით. არის ბელგიური “მუსკრონის” კონსულტანტი.

ფალი რამადანი

Lian Sports-ის მთავარი მფლობელი. ყოფილი ფოტოგრაფი, მერე კი რესტორნების ქსელის მფლობელი გერმანიაში. აღმოსავლეთ ევროპის ერთ-ერთი ყველაზე გავლენიანი საფეხბურთო აგენტი. არის “ფიორენტინას” კონსულტანტი. რამდენჯერმე მისმა გვარმა გაიჟღერა საფეხბურთო აფერისტობებთან დაკავშირებით.

პინი ზაჰავი

გავლენიანი, მაგრამ ბნელით მოცული საფეხბურთო აგენტი. დაკავშირებულია როგორც “აპოლონთან”, ისე “მუსკრონთან”. თავის მხრივ, ეს კლუბებიც მჭიდროდ არიან დაკავშირებულები ერთმანეთთან. მაგალითად, თავის დროზე “მუსკრონმა” სამი ფეხბურთელი ინათხოვრა “აპოლონისგან”.

იოვიჩის ყიდვიდან ნახევარი წლის შემდეგ “ბენფიკამ” ის ორი წლით გაანათხოვრა “აინტრახტში”. გარიგების საფასური 200 ათას ევრო იყო, გამოსყიდვის შემთხვევაში კი გერმანულ კლუბს 7 მილიონი უნდა გადაეხადა. 

“აინტრახტმა” ეს ოფცია 2019 წლის გაზაფხულისთვის გაააქტიურა. იმ დროისთვის ფეხბურთელმა 15 გოლი გაიტანა და ტოპკლუბები დააინტერესა. “ბენფიკამ” მიიღო 7 მილიონი და პერსპექტივაში 30 პროცენტი მომავალი ტრანსფერიდან. ივნისში “რეალმა” ფეხბურთელში 60 მილიონი ევრო გადაიხადა თავისი ბონუსებით.

3 მილიონი ევრო გამოიმუშავა “ცრვენა ზვეზდამ”, 5-ზე მეტი - “აპოლონმა”, 18-ზე მეტი “ბენფიკამ”, 35-ზე მეტი “აინტრახტმა”. საიდუმლოა მხოლოდ ერთი რამ - რამდენი გამოიმუშავა ზაჰავიმ?

ყოველდღიური სპორტული გაზეთი "ლელო"
478
მკითხველის კომენტარები / 0 /
მსგავსი ამბები
რუბრიკის სხვა სიახლეები
;