არის იდეა! 32 წლის გერმანელი მანჩესტერ იუნაიტედის მწვრთნელად

"მანჩესტერ იუნაიტედი" ოლე გუნარ სულშერის შემცვლელს ეძებს. "წითელი ეშმაკები" მიმდინარე პრემიერლიგაში მე-12 ადგილზე არიან. კრიტიკას ვერ უძლებს სულშერის გუნდის თამაშის ხარისხიც.

არადა, 2019 წლის მარტში ნორვეგიელთან 3-წლიანი კონტრაქტი გაფორმდა და მაშინ ყველა ამბობდა, რომ ედ ვუდვორდმა იჩქარა, რადგან სწორედ კონტრაქტის გაფორმების შემდეგ წავიდა "იუნაიტედის" საქმეები კიდევ უფრო უკან.

კი ბატონო, სულშერს თავიდან ჰქონდა შედეგი, "მანჩესტერმა" ყველა ფრონტზე მოგებები მიაწყო ერთმანეთს, მაგრამ მერე მონასტერი აირია და ამ სეზონის სტარტმაც დაადასტურა, რომ ცვლილებებია საჭირო.

უკვე ვწერდით, რომ "იუნაიტედში" მასიმილიანო ალეგრისა და მაურისიო პოჩეტინოს კანდიდატურებს განიხილავენ, მაგრამ აი, გაჩნდა ახალი იდეაც - იულიან ნაგელსმანი. 32 წლის ნიჭიერი გერმანელი სპეციალისტი ბოლო წლებში არაერთ გრანდს დაუკავშირეს, თვით "რეალსაც" კი, როცა ზინედინ ზიდანმა მოულოდნელად დატოვა პოსტი...

თავის დროზე, ნაგელსმანი წარმატებით მუშაობდა "ჰოფენჰაიმში". რიგითი გერმანული კლუბი დაბა (ბევრისთვის - სოფელ) ზინსჰაიმიდან ერთთავად ლიდერთა სიახლოვეს ტრიალებდა და ბევრსაც ამწარებდა. ახლა ის "ლაიპციგში" მუშაობს და არცთუ ურიგოდ. დღეიდანვე ჩანს, რომ აღმოსავლეთგერმანული კლუბი ჩემპიონობის ერთ-ერთი კანდიდატი იქნება...

მთავარი, რაც ექსპერტ-სპეციალისტებს ამ ახალგაზრდა კაცში ხიბლავთ, არის მისი ტაქტიკური განსწავლულობა და საფეხბურთო ფილოსოფია - შემტევი ფეხბურთი! ასე თამაშობდა "ჰოფენჰაიმი" და ასე ირჯება "ლაიპციგიც".

"დეილი მეილის" ინფორმაციით, "იუნაიტედში" ფიქრობენ, რომ ნაგელსმანს ლეგენდარულ კლუბში ხანგრძლივი მომავალი შეიძლება ჰქონდეს. ფეხბურთელობისას ის არ იყო რაიმეთი გამორჩეული. თამაშობდა "აუგსბურგში", მაგრამ სერიოზულმა ტრავმამ აიძულა, 20(!) წლისას ფეხბურთელობაზე უარი ეთქვა. ამის შემდეგ მან სამწვრთნელო განათლება მიიღო და, როგორც ხედავთ, ამ საქმეში უფრო უმართლებს.

მოკლედ, ვნახოთ. ლაიპციგი მას ასე იოლად ვერ შეელავა. "იუნაიტედის" მხრიდან კი ეს კიდევ ერთი ექსპერიმენტი იქნება, რომლის ჩაშლის შემთხვევაში უკვე ვუდვორდს მოუწევს აღმასრულებელი დირექტორის პოსტიდან წასვლა... 

ყოველდღიური სპორტული გაზეთი "ლელო"
768
მკითხველის კომენტარები / 0 /
მსგავსი ამბები
რუბრიკის სხვა სიახლეები
;