არჩილ არველაძე: არ ვერევი ვაისის საქმეში, მაგრამ მე ასე მოვიქცეოდი...

საქართველოს ეროვნული ნაკრების ორი მატჩის შეფასება ვთხოვეთ არჩილ არველაძეს. ახლო წარსულში ეროვნული გუნდის ფორვარდს, ვინც ამჟამად ტყუპისცალ შოთას ტაშკენტის "ფახთაქორის" გაწვრთნაში ეხმარება...

- მე უფრო მგონია, რომ ამ ორ შეხვედრაში, უბრალოდ, ვერ ვითამაშეთ. ვგულისხმობ ორი ფაქტორის ერთობლიობას - თორნიკე ოქრიაშვილი არ იყო მზად სათამაშოდ, გიორგი ჩაკვეტაძე კი ტრავმირებულია. ორივე ეს ფეხბურთელი დიდ ძალას წარმოადგენს ნაკრებისთვის. როცა ჯანო ანანიძე ვერ არის ოპტიმალურ ფორმაში, როცა ვაკო ყაზაიშვილი ვერ აჩვენებს საუკეთესო თამაშს... როცა ქვილითაიას ახალმოშუშებული აქვს ტრავმა, ბევრს ცდილობს, მაგრამ არ არის ისიც ბოლომდე ფორმაში... მოკლედ, იყო რიგი ობიექტური მიზეზებისა. არა მგონია, ბოლო შეხვედრების შემდეგ ნაკრებში რაღაც რადიკლურად შეცვლილიყო უარყოფითისკენ. ირლანდიასთან მატჩის მეორე ტაიმი საქართველოს ნაკრებმა კარგად ითამაშა და ეს ფაქტია. კი, არ იყო კარგი დასაწყისი შესარჩევი ციკლისა, მაგრამ ჩვენ წინ გვაქვს ორი უმნიშვნელოვანესი თამაში - ერთა ლიგის პლეი ოფი და მაქსაიმალურად თავდაჯერებულები უნდა ვიყოთ ამ ორი მატჩისთვის, რათა ევროპის ჩემპიონატზე გავიდეთ.

- ხომ არ იქნებოდა უპრიანი, საქართველოს ნაკრების სათამაშო მოდელი ორივე შეხვედრაში ცოტა უფრო შემტევი ყოფილიყო?

- მანდ მივდივარ სწორედ. ჩემი აზრით, კრიზისი ყველაზე მეტად შემტევ ფეხბურთელებს შეეხოთ. ზოგიერთი არ იყო ოპტიმალურ ფორმაში, ზოგიც დაშავებული გახლდათ და ვერ ითამაშა საერთოდ... ერთადერთი, შემიძლია, ჩემი აზრი გითხრათ, როგორც გულშემატკივარმა და ამით არანაირად არ ვერევი ვაისის კომპეტენციაში - ირლანდიასთან ცენტრში დავაყენებდი ოთარ კიტეიშვილს და მარცხნიდან დავაყენებდი ყაზაიშვილს. ეს მიუხედავად იმისა, რომ ვაკომ შვეიცარიასთან ვერ ითამაშა თბილისში ისე, როგორც მისგან ველოდით.

- როგორ შეაფასებდით ვატო არველაძის თამაშს ირლანდიის ნაკრებთან შეხვედრაში? ფაქტია, მას მცირე ტრავმის ფონზე მოუხდა მინდორზე გასვლა...

- ვატოს ფეხი აწუხებდა და ამიტომაც ვარჯიშობდა ინდივიდუალურად. მას დებიუტი ჰქონდა საქართველოს ნაკრების შემადგენლობაში და თუ გავითვალისწინებთ სასტარტო მატჩისთვის დამახასიათებელ მღელვარებას, ვფიქრობ, ძალიან ნორმალური დებიუტი გამოუვიდა. ცოტა აქტიური რომ ყოფილიყო, პირადად მე 10-ბალიანი სისტემით 7,5-ს დავუწერდი. თუ შეამჩნიეთ, მას პოზიციის შეცვლა მოუხდა. ირლანდიელებმა რომ შემოგვიტიეს, ფლანგიდან დაიწყო თამაში.

- ფაქტია, თითქმის აღარ გვაქვს ამ ჯგუფიდან გასვლის შანსი. როგორი უნდა იყოს ჩვენი სატურნირო სტრატეგია?

- ახლა არ აქვს მნიშვნელობა იმას, გვაქვს თუ არა გასვლის შანსი. მიზანი უნდა იყოს, ავიღოთ რაც შეიძლება მეტი ქულა, ვიბრძოლოთ თითოეული მატჩის გამარჯვებისთვის, რადგან თავდაჯერებისთვის ეს ძალიან მნიშვნელოვანია. ერთა ლიგის პლეი ოფებისთვის მზად უნდა ვიყოთ.

ყოველდღიური სპორტული გაზეთი "ლელო"
9916
მკითხველის კომენტარები / 0 /
მსგავსი ამბები
რუბრიკის სხვა სიახლეები
;