არჩილ არველაძე: პირველად რომ დავაჭირე ხელი Live-ს, მოედნის მორწყვა დაიწყეს... ირანში ნამღერი 'ლალეს' ისტორია

საქართველოს ეროვნულ ნაკრებში წლების შემდეგ ისევ ითამაშებს არველაძე - ეროვნულ გუნდში ვლადიმირ ვაისმა ვატო არველაძეს უხმო, რევაზ არველაძის ვაჟს, ვინც ბოლო შეხვედრებში უბრალოდ შეუჩერებელია პოლონურ ექსტრაკლასაში...

ტაშკენტის "ფახთაქორი" კი ძლიერად თამაშობს აზიის ჩემპიონთა ლიგაში. გარდა ამისა, საქართველოს ეროვნული ნაკრები სულ მალე შვეიცარიასთან საშინაო მატჩით გახსნის ევროპის ჩემპიონატის ახალ შესარჩევ ციკლს...

ამასწინათ, სოციალურ ქსელში გავრცელდა შოთა და არჩილ არველაძეების ნამღერი "ლალე" გოჩა ტყებუჩავასთან ტრიოში. ვიდეო ჩაწერილია ირანში, "ფახთაქორისა" და "პერსეპოლისის" მატჩის შემდეგ. თუ ქართველი ხარ და ძარღვებში სისხლი გიდუღს, ძალიან ძნელია, ამ კადრების ყურება ემოციის გარეშე...

ალბათ, დროა, არჩილ არველაძესთან ინტერვიუზე გადავიდეთ, სადაც ამ ყველაფერზე და კიდევ სხვა თემებზე უფრო ვრცლად ვილაპარაკებთ...

- მოდი, დავიწყოთ "ფახთაქორით". გუნდის საქმეები კარგად მიდის. ამის დასტურია თუნდაც წარმატებული სტარტი აზიის ჩემპიონთა ლიგაში...

- პრინციპში, ასეც შეიძლება ითქვას, რომ საქმეები კარგად მიდის. ორი მატჩი ჩავატარეთ აზიის ჩემპიონთა ლიგაში. ჯერ ძალიან ძლიერ "პერსეპოლისთან" ვითამაშეთ ფრედ გასვლით შეხვედრაში, მერე კი შინ მოვუგეთ "ალ აჰლის", რომელიც ასევე ძალიან ძლიერი გუნდია. თუ გავითვალისწინებთ აზიის ჩემპიონთა ლიგის დონეს, შემიძლია ვთქვა, რომ "სიკვდილის ჯგუფში" მოვხვდით. ეს მხოლოდ ჩემი აზრი არ არის. ასე შეაფასეს ეს ჯგუფი ექსპერტებმა და მედიამ.

- ირანულ მატჩზე ცალკე მოგვიყვევით...

- "პერსეპოლისზე" უკვე გითხარით, რომ ძალიან ძლიერი გუნდია, ორჯერ იყო აზიის ჩემპიონთა ლიგის ფინალში და ამით ბევრი რამაა ნათქვამი. მეორე გუნდი, რომელიც შინ დავამარცხეთ, ასევე ძლიერია - შარშან ფინალში იყო და იქ დამარცხდა. 70 ათასი მაყურებელი მოვიდა "პერსეპოლისთან" მატჩზე. ირანში ფეხბურთზე მუდამ უამრავი ხალხი დადის. ასე იყო ამჯერადაც. ფრედ ვითამაშეთ და შეგვიძლია, ეს კარგ შედეგად ჩავთვალოთ.

[VIDEO] ქართული ლალე თეირანში... არველაძეების შესრულებით...

- ...და ამ თამაშის შემდეგ იმღერეთ "ლალე". ეს სიმღერა სოციალურ ქსელში გავრცელდა და ძნელია, კაცმა ემოციის გარეშე უყურო შუაგულ ირანში ნამღერ ქართულ "ლალეს"...

- ცოტა ხნის წინ, ჩვენმა მეგობარმა, ნოდარ დუმბაძის შვილიშვილმა, ნოდარ მაჭარაშვილმა, ძალიან კარგი წიგნი დაწერა. სიმართლე გითხრათ, ამ წიგნის შთაბეჭდილების ქვეშ გახლდით. დღენახევარი დავყავით ირანში. ყველაფერი ძალიან დასამახსოვრებელი იყო. მაგალითად, ჩვენთან მოდიოდნენ ფერეიდნელი ქართველები... თამაში რომ მორჩა, უცბად დამარტყა თავში ამ იდეამ - მე, შოთი და გოჩა ტყებუჩავა ვიყავით. პირველად რომ დავაჭირე ხელი "ლაივს", მოედნის მორწყვა დაიწყეს. მეორე ჩართვაზე უკვე ძალიან კარგად გამოვიდა ყველაფერი. სტადიონის პერსონალი, მუშები გვიყურებდნენ. ალბათ, ვერც გაიგეს, რას ვაკეთებდით. საბოლოოდ, გამოვიდა ის, რაც გამოვიდა...

- უზბეკეთის ჩემპიონატი ახლახან დაიწყეთ...

- მანამდეც უნდა გვეთამაშა, მაგრამ აზიის ჩემპიონთა ლიგის მატჩების გამო გადაგვედო თამაშები. პირველი მატჩი მოვიგეთ და კარგ დასაწყისს, იმედია, ასეთივე გაგრძელება მოჰყვება.

- როგორ ფიქრობთ, "ფახთაქორი" საჩემპიონოდ მომწიფებულია?

- როცა საქმე ეხება უზბეკურ ფეხბურთს, შეუძლებელია, "ფახთაქორს", ჩემპიონობის გარდა, რაიმე სხვა მიზანი ჰქონდეს. ჩვენთვის ძალიან მნიშვნელოვანია ის, რომ ბოლო მატჩზე 25 ათასი მაყურებელი მოვიდა. როგორც იცით, "ფახთაქორი" ძალიან დიდ სტადიონზე თამაშობს, მაგრამ ადრე იყო ხოლმე შემთხვევები, როცა თამაშზე დაახლოებით 2-დან 5 ათასამდე ქომაგი მოდიოდა. ხომ იცით, როგორცაა - იგებ თამაშებს და ხალხიც მოდის სტადიონზე. რა თქმა უნდა, ეს დიდი სტიმულია ჩვენთვის.

არჩილ არველაძე: იმედი მაქვს, ვატო ისე ითამაშებს ნაკრებში, როგორც ეკუთვნის ქვეყნის მთავარ გუნდს, ქართველ ქომაგს და ჩვენს გვარს!..

- კარს მოგვადგა მატჩი შვეიცარიის ნაკრებთან. რას ფიქრობთ ევროპის ჩემპიონატის შესარჩევი ციკლის სასტარტო დაპირისპირების წინ?

- დიდი იმედი მაქვს, ყველაფერი კარგად იქნება. რა თქმა უნდა, ჩემი განწყობა ოპტიმისტურია. ცოტა ვწუხვარ იმაზე, რომ ყველა ფეხბურთელი ჯანმრთელად არ არის, მაგალითად - გიორგი ჩაკვეტაძე, რომელიც ბოლო დროს ნაკრების ლიდერი იყო. მახარებს ჯანო ანანიძის ათამაშება. თორნიკე ოქრიაშვილი ამ ეტაპზე უკლუბოდაა და, შესაძლოა, არ იყოს ოპტიმალურ ფორმაში, მაგრამ ვლადიმირ ვაისმა მას მაინც დაუძახა ნაკრებში და თავისთავად, იცის, როგორ გამოიყენოს ის. და ბოლოს, ვატო არველაძეზე ვიტყვი. ჩვენთვის ძალიან საამაყოა, რომ ისტორია გრძელდება. იმედი გვაქვს, ვატო ისე ითამაშებს ნაკრებში, როგორც ეკუთვნის საქართველოს ნაკრებს, ქართველ ქომაგსა და ჩვენს გვარს. ეს დიდი პატივი და, ამავე დროს, დიდი პასუხისმგებლობაცაა.

- ვატოს ნიჭი არასოდეს აკლდა, მაგრამ პოლონეთში გადასვლის შემდეგ რაღაცნაირად უცებ "იფეთქა". რა მოხდა თქვენი აზრით?

- ვინც ვატოს თამაშებს უყურებს, კარგად იცის, რა არის მისი კოზირები და რაში უჭირს. პლუსებიდან უნდა გამოვყო მისი საფეხბურთო გემოვნება, ტექნიკა, გოლის ალღო... ის ერთბაშად გაიზარდა, ტანი აიყარა და გარკვეულწილად, ეს პრობლემაა ხოლმე კონკრეტულ მომენტში. პოლონურ კლუბში ვატოს მაგრად ენდობა მწვრთნელი და ესეც განსაკუთრებული მომენტია. თუ მწვრთნელის ნდობა არ გაქვს, ძალიან ძნელია...

- დამეთანხმებით, ძალიან ემოციური მომენტია: რას განიცდით მისი თამაშის ყურებისას?

- ამის გადმოცემა შეუძლებელია. ასევე მჭირს შოთის თამაშებზეც... ვატომ ზუსტად იცის, რასაც ნიშნავს საქართველოს ღირსების დაცვა.

- დაბოლოს, როგორ შვეიცარიის ნაკრებს ელით თბილისში?

- ჩემი აზრით, საქართველოს ნაკრებს უფრო უადვილდება ისეთ ნაკრებებთან თამაში, რომლებიც წარმოადგენენ რომელიმე კონკრეტულ სტილს. მაგალითად, ბრიტანულს და ასე შემდეგ. შვეიცარიის ნაკრები არ არის ისეთი გუნდი, რომ ერთმნიშვნელოვნად მივაკუთვნოთ რომელიმე სათამაშო სტილს. ალბათ ამ შემთხვევაში უფრო გერმანულ სტილთან არიან ახლოს, თამაშობენ ათლეტურ, ძალიან კარგ ფეხბურთს. შვეიცარიის ნაკრები საინტერესო ნაზავია შვეიცარიელი, ბალკანელი და აფრიკელი ფეხბურთელების. არაერთხელ ვნახეთ, რომ აწყობილი გუნდია... და მაინც, ნაკრები თბილისში თამაშობს, ექნება ქომაგების დიდი მხარდაჭერა და თავისას ეცდება...

ყოველდღიური სპორტული გაზეთი "ლელო"
5088
მკითხველის კომენტარები / 0 /
მსგავსი ამბები
რუბრიკის სხვა სიახლეები
;