არჩილ ბერიძე ბათუმის დინამოში დიდ გეგმებს აანონსებს - 9 მილიონზე მეტი ინვესტიცია, ევროტურნირის ჯგუფურ ეტაპზე მოხვედრა...

9 მილიონზე მეტი ინვესტიცია, ევროტურნირის ჯგუფურ ეტაპზე  მოხვედრა, მოლაპარაკებები საქართველოს ნაკრების ფეხბურთელებთან... 

ზუსტად ერთი წელი გავიდა მას მერე, რაც სამშენებლო კომპანია “ლამინი გრუპი” ბათუმის “დინამოს” სპონსორი გახდა. კომპანია ჯერ კლუბის ოფიციალური მფლობელი არ არის, ეს საკითხი ახლა წყდება, მაგრამ პარტნიორობამ გუნდს შედეგი უკვე მოუტანა - “დინამო” ეროვნულ ლიგაში დაბრუნდა, დღეს კი იქაც ლიდერებშია და ჩემპიონობისთვის იბრძვის. 

თუმცა, არანაკლებ მნიშვნელოვანი შედეგი ტრიბუნებზე ჩანს - აჭარულმა “დინამომ” ის მოახერხა, რასაც ბოლო 30 წელიწადში მხოლოდ ერთეულები ახერხებდნენ - ტრიბუნაზე ხალხი მიიზიდა. ბათუმელთა თამაშებზე ახლა მივიწყებული და ასე ნანატრი საფეხბურთო ატმოსფეროა.

...მანამდე ბათუმის “დინამოთი” ერთ-ერთი ქართული ჰოლდინგი იყო დაინტერესებული, თუმცა ნახევარმილიონიანმა სახელფასო დავალიანებამ საფეხბურთო კლუბის ყიდვის სურვილი გაუქრო, “ლამინი გრუპმა” კი დავალიანება გაისტუმრა და თუკი “დინამო” მფლობელობაში გადაეცემა, მომდევნო სამი წლის განმავლობაში სერიოზულ ინვესტიციას გეგმავს.

ფაქტია, ბათუმის “დინამოს” ეს აღმავლობა “ლამინი გრუპის” ხელმძღვანელების - ჯონი ბაკურაძისა და არჩილ ბერიძის უდიდესი დამსახურებაცაა. რა მიზნით მოვიდნენ კლუბში, რა გეგმები აქვთ და რა სიახლეს სთავაზობენ გულშემატკივრებს? ამას “ლელოსთან” არჩილ ბერიძის ექსკლუზიური ინტერვიუდან შეიტყობთ...

მიდგომები შეიცვალა

- დავიწყოთ თავიდან. ბათუმის “დინამოს” პატრონობა რატომ გადაწყვიტეთ?

- უპირველესად იმიტომ, რომ ჩემი დიდი ხნის ოცნება იყო, ბათუმის “დინამოში” ვყოფილიყავი. ბავშვობიდან ფეხბურთის გულშემატკივარი ვარ და ეს სურვილი ბიზნესში ჩართვის მერე გამიჩნდა. მაგრამ აქამდე ამის შანსს ვერ ვხედავდი. 

- ანუ?

- ფეხბურთში მისასვლელად გარკვეული გარემოა საჭირო, ზოგადად ქართულ ფეხბურთში კი არასწორი მიდგომები იყო. ახლა მიდგომებიც შეიცვალა და ფეხბურთში მისვლის სურვილიც გამიძლიერდა. 

- ასეთი რა შეიცვალა?

- გადამწყვეტი ის არის, რომ ახლა ქართულ ფეხბურთში კორუფცია აღარ არის. დარწმუნებულიც ვარ, დღეს ქართული საკლუბო ფეხბურთი მომგებიანი თუ არ არის, წამგებიანი მაინც არ უნდა იყოს. ეს დღევანდელი მდგომარეობით შესაძლებელი მგონია.

- თუმცა ყველა ბიზნესმენი, სანამ ინვესტიციას განახორციელებს, მაინც მოგებაზე ფიქრობს...

- ფეხბურთი და ბათუმის “დინამო” სიგიჟემდე მიყვარს და პერსპექტივასაც ვხედავ. ამ სფეროში გარდატეხა ქართული ფეხბურთის განვითარების ფონდის დაარსებამ შეიტანა. საბაზისო დაფინანსება კლუბების განვითარებისთვის უმნიშვნელოვანესი დახმარება იყო. ბათუმის “დინამოსთვის” მნიშვნელოვანია აჭარის ხელმძღვანელობის არა უბრალოდ თანადგომა, არამედ, გულშემატკივრობა. გადამწყვეტი როლი ამ ფაქტორებმა ითამაშა.

9 მილიონის გარდა, სხვა თანხაც დაიხარჯება

- თქვენი სიტყვებია: თუკი ბათუმის “დინამო” თქვენს კომპანიას გადაეცემა, “ლამინი გრუპი” მზადაა, მომდევნო სამი წლის განმავლობაში 25-მილიონიანი ინვესტიცია განახორციელოს...

- დიახ, ლაპარაკია 9-მილიონიან ინვესტიციაზე, მაგრამ აქვე დავაკონკრეტებ, რომ ეს თანხა მხოლოდ ინფრასტრუქტურის განვითარებაზე დაიხარჯება. კლუბს კი დამატებით სხვა ფინანსები მოხმარდება. 

- დაახლოებით რა თანხას გულისხმობთ? 

- რაც კლუბს ევროტურნირებზე გასვლისთვის დასჭირდება - 5, 10 თუ 20 მილიონს. ამის წინასწარ თქმა ახლა შეუძლებელია.

- ამ ინვესტიციის ფარგლებში, კონკრეტულად რა ინფრასტრუქტურის მოწყობაზე ფიქრობთ?

- ლაპარაკია იმ სპორტულ ინფრასტრუქტურაზე, რაც დასავლეთ საქართველოში საუკეთესო პროექტი იქნება და კლუბის გამართულ ფუნქციონერებას შეუწყობს ხელს - აუცილებელია სავარჯიშო დარბაზები, საფეხბურთო აკადემიისთვის მოედნები, “ანგისას” ბაზაზე სასტუმროს აშენება და 2 მოედნის დამატება, რაც ბავშვების სრულფასოვნად მომზადების საშუალებას მოგვცემს. ამ ყოველივეს მიზანია, რომ ბათუმის “დინამოს” სპორტული კომპლექსი რეგიონში უალტერნატივოდ საუკეთესო გახდეს.

- საფეხბურთო კლუბის 100%-იანი წილის მფლობელი ბათუმის მერიაა. თქვენი სამშენებლო კომპანიის შეთავაზებაზე დადებითი პასუხი მიიღეთ?

- საკითხს განიხილავენ და “დინამოს” განკერძოებაზე გადაწყვეტილებას მალე მიიღებენ. დიდი იმედი მაქვს, კლუბისთვის ახალი ეტაპი სწორედ ამის შემდეგ დაიწყება. ახლა ჩვენს ფეხბურთში დიდი პროცესები დაიწყო, ბათუმი ფეხბურთით ცხოვრობს და ვართ აგერ, ფეხბურთის გიჟები და გვერდში დგომა გვსურს. ყველაფერი იქითკენ მიდის, რომ კლუბის გადმოცემის საკითხი მალე უნდა გადაწყდეს. თუ ასე არ მოხდება, ბათუმის “დინამოს” სიყვარულს ხომ მაინც ვერავინ წამართმევს?! 

ქართულ ფეხბურთში პერსპექტივას ვხედავ 

- სულ რაღაც ორი წლის წინ ბათუმის საფეხბურთო სკოლაში 400-მდე ბავშვის შეკრებაც კარგ შედეგად ითვლებოდა. როგორც შევიტყვეთ, ახლა ნამდვილი საფეხბურთო ბუმია და მათი რაოდენობა სამჯერ გაიზარდა...

- დიახ, ასეა, საფეხბურთო სკოლაში ძალიან ბევრი ბავშვი მოვიდა. თუკი ჩანაფიქრი განხორციელდა და ბათუმის “დინამო” ჩვენს საკუთრებაში გადმოვა, ახალი მოედნების მოწყობის შემთხვევაში აკადემია 3000-მდე ბავშვის მიღებას შეძლებს. ამდენი ბავშვი კი არცერთ აკადემიაში არ ვარჯიშობს. აჭარაში ამის პოტენციალი არსებობს. 

- კლუბში ჯერ არ მისულხართ სრულფასოვნად, მაგრამ თქვენი თანადგომისა და გია გეგუჩაძის მისვლის შემდეგ ბათუმის “დინამომ” ხალხი სტადიონისკენ შემოატრიალა...

- ეს ყველაზე მნიშვნელოვანია. ჩვენი გუნდის ამბიციასა და ზრდაზე მნიშნელოვანი გავლენა გია გეგუჩაძის ჩამოსვლამ მოახდინა. მას გუნდის განვითარებაში დიდი როლი აქვს და მისი ძალიან გვეიმედება. გია არა მხოლოდ გუნდის მთავარი მწვრთნელია, არამედ, კლუბის სტრუქტურაში საფეხბურთო აკადემიის ჩამოყალიბებაში დიდი როლი ენიჭება. ბევრი რამაა დამოკიდებული ქომაგებზე. შეიძლება, გუნდისთვის ააშენო სტადიონები, ბაზები, მაგრამ სწორად თუ არ მართე და მაყურებელი ვერ მიიზიდე, ყველაფერი აზრს დაკარგავს. თუ ეს პროცესი გაგრძელდება და მაყურებელი ფეხბურთისკენ შემოტრიალდება, რამდენიმე წელიწადში ჩვენ საშუალოევროპული დონის ჩემპიონატი გვექნება. ამ ყველაფერის შედეგად, დარწმუნებული ვარ, მალე საქართველოში ძლიერი პროფლიგის აღორძინების აუცილებლობაც დადგება. სხვაგვარად, ფეხბურთში არც მოვიდოდი. ბათუმის “დინამოსა” და, ზოგადად, ქართულ ფეხბურთში პერსპექტივას ვხედავ. 

აქციები  ფანკლუბს

- სწორად მართვა ახსენეთ. ეს ყველას თავისებურად ესმის. 

- კლუბის მართვა ხალხთან ერთად უნდა მოხდეს. ესაა ყველაზე სწორი მართვა და დღევანდელობის უპირველესი მოთხოვნა. 

- კონკრეტულად რას გულისხმობთ?

- თუ კლუბი გადმოგვეცემა, გვინდა, ბათუმის “დინამოს” აქციები გამოვუშვათ, 5 ან 10 პროცენტი კი ფანკლუბს გადავცეთ. როცა კლუბის მართვაში გულშემატკივარიც მონაწილეობს, ეს დიდი ბედნიერებაა. 

- მსგავსი რამ საქართველოში არასოდეს მომხდარა... 

- ამიტომაა, ხალხი თავს ქართულ კლუბთან რომ არ აიგივებს. არადა, ესაა ადამიანების ჯგუფი, რომელიც ფეხბურთით ცხოვრობს. მას გადაწყვეტილებები არა მხოლოდ უნდა დაუსაბუთო, ამ პროცესში თავადაც უნდა ჩართო - უნდა იყვნენ კლუბის აქციონერები და მართვაში მონაწილეობდნენ.

- კონკრეტულად რა პროცესებში?

- მაგალითად, პრეზიდენტის არჩევნებსა და სხვა მნიშვნელოვანი გადაწყვეტილების მიღებაში. მათთვის ბათუმის “დინამო” საკუთარი კლუბი უნდა იყოს, მათ შორის, იურიდიულადაც. იმედია, ეს სისტემა საქართველოშიც ამოქმედდება და როგორც კი საკლუბო სისტემა გაიმართება და კლუბი აქციების გაყიდვას დაიწყებს, მე განზე გავდგები. საერთოდ, მიმაჩნია, რომ ბათუმის “დინამო” მხოლოდ ჩემი კლუბი ვერ გახდება და არც შეიძლება გახდეს.

- ვერ გავიგე: წეღან არ თქვით, მერიასთან მოლაპარაკება კარგად მიმდინარეობსო?!

- სხვა რამეს ვგულისხმობ. კლუბი შეიძლება იყიდო, მაგრამ ბათუმის “დინამო” ყველა ბათუმელისაა და არ შეიძლება, საკუთრების გამო, მას ფანობა ჩამოაშორო. პირიქით, მათ კლუბის მართვაში მონაწილეობის საშუალება უნდა მისცე.

ნაკრების მოთამაშეებთან მოლაპარაკება მიმდინარეობს

- ბათუმის “დინამოს” ჩემპიონთა ან თუნდაც ევროპალიგაზე გასვლა რეალურად წარმოგიდგენიათ?

- სხვაგვარად, კლუბში მისვლას რა აზრი ექნება?! დიახ, სწორედ ეს წარმომიდგენია და ამის პერსპექტივით მსურს, რომ გუნდი ავიყვანოთ და ხალხს სიხარული მივანიჭოთ. დარწმუნებული ვარ, ამ მიზნის მიღწევა დროის საკითხია. 

- სატრანსფერო ამბებზეც გკითხავთ. გაძლიერებას თუ გეგმავთ?

- რა თქმა უნდა! ორი-სამი ძლიერი მოთამაშის დამატება აუცილებლად გვჭირდება. 

- გუნდი აშკარად გაძლიერდა და თქვენს ამბიციებზე ბათუმის “დინამოში” გიორგი ნავალოვსკის მოსვლაც მიუთითებს... 

- ახლაც ორ ისეთ ფეხბურთელთან ვაწარმოებთ მოლაპარაკებას, რომლებიც ევროპაში თამაშობენ და საქართველოს ნაკრების წევრები არიან...

- ...და ისინი ჩამოსვლაზე დაგთანხმდნენ?!

- ყოველ შემთხვევაში, ამის იმედი გვაქვს. ახლა სხვას ვერაფერს ვიტყვი და მათ გვარებსაც არ დავაკონკრეტებ, მაგრამ ჩვენ რეალურად ამბიციური გუნდის ჩამოყალიბება გვსურს და არა - მესამეხარისხოვანი მოთამაშეების დამატება. მთავარი ისაა, რომ ქართულ ფეხბურთში გარემო შეიცვალა და უკეთესობის იმედი გამოჩნდა.

- თუმცა, ბევრად მეტია გასაკეთებელი: თქვენი აზრით, უპირველესად, რა არის შესაცვლელი?

- იმდენი სასიკეთო რამ გაკეთდა, რომ ახლა გულშემატკივრის დასწრებამდეც მივედით! ეს ფაქტია. ამ კუთხით მდგომარეობა ბათუმის, ქუთაისისა და სამტრედიას გარდა, სხვა ქალაქებშიც თუ შეიცვლება, ჩვენს ჩემპიონატში ბევრი რამ გამოსწორდება. მთავარი მიდგომაა და ხალხმა უნდა გააცნობიეროს, რომ გუნდი ჩემი და ვინმეს კი არა, მათია და ჩვენ მას ერთად უნდა ვუპატრონოთ.

ყოველდღიური სპორტული გაზეთი "ლელო"
6435
მკითხველის კომენტარები / 1 /
იმედა შერიფაძე
0
მოგესალმებით ძვირფასო გულშემატკივრებო!
მინდა მოგახსენოთ, დღეს მე პირადა, როგორც ბათუმის დინამოს ქომაგი და არა მარტო ბათუმის დინამოსი, არამედ მთლიანად ქართული ფეხბურთის ქომაგი, ვხედავ ქართულ ფეხბურთში ძალიან დიდ ძვრებს. ამაში ლომის წილი მიუძღვნის თავად ბიზნესმენ არჩილ ბერიძეს. მე ფეხბურთის გულშემატკივარი ვარ 1980-იანი წლეებიდან და მსოფლიო ნაკრებებში ჩემი ფავორიტი მყავს, ეს არის ბრაზილიის ნაკრები, ხოლო ევროპაში ჰოლანდიის ნაკრები. იმიტომ, რომ ისინი თამაშობენ ლამაზ ფეხბურთს და მათი ყურება ძალიან დიდ სიამოვნებას მანიჭებს. მინდა მოგახსენოთ, რომ ჰოლანდიაში, კერძოთ კი აიაქსს გააჩნია მსოფლიოში ყველაზე საუკეთესო საფეხბურთო ბაზა და საფეხბურთო აკადემია. მინდა შეგახსენოთ ძვირფასო გულშემატკივრებო, აიაქსის აღზრდილი გრანდები, როგორიც იყვნენ: ვან ბასტენი, გულიტი და სხვანი და სხვანი. ეს მეგობრებო ციდან არ მოსულა. აიაქსის საფეხბურთო კლუბის ჩამოყალიბება და თვით საფეხბურთო აკადემიის შექმნაში, ლომის წილი მიუძღვნის ადგილობრივ ბიზნესმენებს. ან თუნდაც ერთ კონკრეტულ ბიზნესმენს. ამით იმის თქმა მინდა მეგობრებო, რომ ბიზნესს და ბიზნესმენებს შესწევს იმის უნარი, ქართული ფეხბურთი გამოაფხიზლოს და ააღორძინოს, რათა ჩვენი ქალაქის გუნდი ვიხილოთ ევროპის გრანდების გვერდით. მე როგორც უბრალო, ბათუმის დინამოს ქომაგი, ძალიან დიდი იმედი მაქვს დღევანდელი ხელისუფლების, რომ მაქსიმალურად ხელს შეუწყობს ბათუმის დინამოს სპონსორს, გუნდის აყვავებაში. ამით გაახარებთ, გუნდის ქომაგებს, ასევე უბრალო ხალხსაც, იმათ ვისაც ფეხბურთი საერთოდ არ აინტერესებთ. ალბად დაგებადებათ კითხვა, თუ როგორ გაახარებთ იმათ გულებს, ვისაც ფეხბურთი საერთოდ არ აინტერესებს. ამასთან დაკავშირებით მოვიყვან ერთ მაგალითს. აი მაგალითად: საფეხბურთო კლუბი ჩელსი, მისი მფლობელი რომან აბრამოვიჩია, ალბად ყველამ იცის. მან როცა კლუბი იყიდა, აგრეთვა მან გამოუშვა აქციები, რომელიც შეიძინა უბრალო ხალხამა და ამით მათ გაუჩნდათ დამატებითი შემოსავლის წყარო. აი ასე შეიძლება ბათუმის დინამოს აყვავებამ გაუჩინოს უბრალო ადამიანებს დამატებითი შემოსავლის წყარო. მე, პირადად ამის ძალიან დიდი იმედი მაქვს. უფალი ფარავდეს ბათუმის დინამოს და სრულიად საქართველოს. ამინ....
პატივისცემით, ბათუმის დინამოს უძველესი ქომაგი იმედა შერიფაძე
მსგავსი ამბები
რუბრიკის სხვა სიახლეები
;