არ ვარ ის კაცი, ვინც იანვარში წავა... აზარმა კლუბსა და ფანებს სიტყვა მისცა

"ჩელსის" ბელგიელმა ვარსკვლავმა ედენ აზარმა არ გამორიცხა მადრიდის "რეალში" გადასვლა, თუმცა ისიც უთხრა ინგლისურ მედიას, რომ "ჩელსი" ძალიან უყვარს და სულაც არ იქნება სასწაული, თუ მთელ კარიერას ამ კლუბში გაატარებს.

"ივნისში უნდა მივიღო გადაწყვეტილება. ივნისამდე ჯერ შორია. არ ვიქნები თვალთმაქცი და არ ვიტყვი, რომ ჩემი წასვლა გამორიცხულია. არ ვარ ის ადამიანი, რომ წავიდე იანვარში. მე ამას არ გავუკეთებ იმ კლუბს, რომელმაც ძალიან ბევრი მომცა და არც იმ ფანებს, რომელთაგანაც უდიდეს სიყვარულს ვგრძნობ. არის ზაფხულში წასვლის შესაძლებლობა, მაგრამ ისიც არ არის გამორიცხული, რომ დავრჩე "ჩელსიში" და კარიერის ბოლომდე აქ ვითამაშო...

რაც შეეხება "პარი სენ-ჟერმენს", არ დავმალავ, მქონდა ამ კლუბთან კონტაქტი, მაგრამ არ მომხიბლა იქ გადასვლის პერსპექტივამ. არაერთხელ მითქვამს, რომ თუ საფრანგეთში დავბრუნდები სათამაშოდ, დავბრუნდები მხოლოდ "ლილში, რომელმაც ბევრი მომცა, და არსად სხვაგან. მე ბოლომდე ვარ ჩემი სიტყვის ერთგული", - თქვა აზარმა.

როგორც ცნობილია, "რეალის" უპირველესი სატრანსფერო პრიორიტეტი სწორედ აზარის შეძენაა. ფლორენტინო პერესი ბელგიელი სუპერვარსკვლავის ყიდვას აქამდეც აპირებდა, მაგრამ "არისტოკრატებმა" შეძლეს ფეხბურთელის შენარჩუნება.

ყოველდღიური სპორტული გაზეთი "ლელო"
673
მკითხველის კომენტარები / 0 /
მსგავსი ამბები
რუბრიკის სხვა სიახლეები
;