...ასე გამოვა ქართული ფეხბურთი კრიზისიდან!.. 3 პუნქტი, რომელიც აუცილებლად უნდა შესრულდეს

ირაკლი ხვედელიანს ქართულ საფეხბურთო წრეებში კარგად იცნობენ. ცნობილმა მენეჯერმა კრიზისული პერიოდისთვის მეტად საინტერესო გეგმან შეიმუშავა, რომელსაც ქვემოთ გთავაზობთ და შეიძლება საყურადღებო იყოს ჩვენი საფეხბურთო საზოგადოებისთვისაც, პირველ რიგში კი, რა თქმა უნდა, ჩვენი ფეხბურთის მესვეურებს ვგულისხმობთ:

"ახალი კორონავირუსი მსოფლიოს ახალი რეალობის წინაშე აყენებს და ამ მხრივ გამონაკლისი არც საქართველოა. ახლა, როცა საქართველოს მთავრობამ საგანგებო მდგომარეობა გამოაცხადა და რომელიც ძალაში იქნება მინიმუმ 2020 წლის 21 აპრილამდე, ალბათ, სწორი იქნება, დავფიქრდეთ მომავალზე, ამ შემთხვევაში - საფეხბურთო მომავალზე!

საგანგებო მდგომარეობის შესახებ გამოქვეყნებულ დოკუმენტში ვკითხულობთ შემდეგს:

მუხლი 4, პუნქტი ვ: საგანგებო მდგომარეობის მოქმედების ტერიტორიაზე აკრძალოს კრებების, მიტინგების, ქუჩის მსვლელობებისა და დემონსტრაციების, აგრეთვე სანახაობრივი, სპორტული და სხვა მასობრივი ღონისძიებების მოწყობა.

ბოლო წლებში ჩვენთან საფეხბურთო სეზონი იწყება თებერვლის ბოლოსა და მარტის დასაწყისში, ხოლო მთავრდება დეკემბერში.

თავის დროზე, ამ სისტემაზე გადასვლა განპირობებული იყო საკლუბო ფეხბურთის ხელშეწყობით. ყველაზე მყარ არგუმენტად მოჰყავდათ შემდეგი მოსაზრება - რომ საკვალიფიკაციო ეტაპის წინ კლუბები ბევრად უფრო ოპტიმალურ ფორმაში იქნებოდნენ და გაცილებით უკეთეს სპორტულ შედეგებს აჩვენებდნენ...

რეალურად კი ჩემპიონატის ჩატარების სისტემის შეცვლა განაპირობა სახელმწიფო პროგრამის გამოჩენამ.

საქართველოს მთავრობის სტრუქტურის, უფლებამოსილებისა და საქმიანობის წესის შესახებ საქართველოს კანონის მე-5 მუხლის "ვ" პუნქტის საფუძველზე, დამტკიცდა საქართველოში ფეხბურთის განვითარების სახელმწიფო პროგრამა, რომელიც 2016 წელს ამოქმედდა და დასრულების ვადად განსაზღვრულ იქნა - 2020 წელი. მოგვიანებით კი შევიდა შესწორება და პროგრამა გახანგრძლივდა 2021 წლამდე...

ვინაიდან, სახელმწიფო ბიუჯეტის დამტკიცება და განკარგვა ხდება კალენდარული წლის მიხედვით, დადგა საჭიროება იმისა, რომ ფეხბურთი მოქცეულიყო ისეთ კალაპოტში, რომლის მიხედვითაც შეძლებდა თანხების ათვისებას სახელმწიფო ბიუჯეტიდან.

იქიდან გამომდინარე, რომ:

  1. ა(ა)იპ ქართული ფეხბურთის განვითარების ფონდის მოქმედების ვადად განსაზღვრული იყო 2016-2020 წლები და მოგვიანებით დაფიქსირებული შესწორების თანახმად ვადა გახანგრძლივდა 2021 წლამდე;
  2. დღემდე, არ განსაზღვრულა და განხილულა ხსენებული სახელმწიფო პროგრამის მოქმედების ვადის ამოწურვის შემდგომი პერიოდი და ფონდის სამომავლო სამოქმედო გეგმა;
  3. გამოცხადებული საგანგებო მდგომარეობიდან გამომდინარე, საქართველოს ეროვნული ჩემპიონატი ფეხბურთში ვერ გაგრძელდება მინიმუმ 2020 წლის 21 აპრილამდე (ამ დროისთვის უნდა გამართულიყო ეროვნული ლიგისა და ლიგა 2-ის 8 ტური, აღარ ვლაპარაკობთ სხვა, რანგით დაბალ ლიგებზე.
  4. ცნობილია ყველა ქართული კლუბი, რომელიც მონაწილეობას მიიღებს მომდევნო, 2020/2021 წლების სეზონის ევროტურნირებზე.

გამოვდივარ ინციატივით, რომ საქართველოს ფეხბურთის ფედერაციამ მოიწვიოს აღმასრულებელი კომიტეტის სხდომა, სადაც განიხილავენ შემდეგს:

  1. შეიცვალოს საფეხბურთო ჩემპიონატის ჩატარების არსებული ვადები და სისტემა, შესაბამისად, გადავიდეს "შემოდგომა-გაზაფხულის" ფორმატზე.
  2. აქამდე გამართული მატჩების შედეგები შენარჩუნებულ იქნეს და ივლისის ბოლო-აგვისტოს დასაწყისისთვის გაგრძელდეს სეზონი, რომლის გამარჯვებულიც ცნობილი გახდება 2021 წლისთვის.
  3. საქართველოში ფეხბურთის განვითარების სახელმწიფო პროგრამით 2021 წლისთვის გათვალისწინებული თანხების განკარგვასთან დაკავშირებით, სფფ-ის ინიციატივით შეიქმნას სამუშაო ჯგუფი, რომელიც გამართავს კონსულტაციებს ა(ა)იპ ქართული ფეხბურთის განვითარების ფონდთან და მოხდეს შეთანხმება შემდეგზე, რომ: 2021 წლისთვის გათვალისწინებული თანხები სრულად გადანაწილდეს საპრიზო ფონდზე და კლუბებმა მიიღონ შესაბამისი ფინანსური სარგებელი 2021/2022 წლების სეზონში ნაჩვენები სპორტული შედეგის მიხედვით", - წერს ირაკლი ხვედელიანი.
1593
მკითხველის კომენტარები / 3 /
ასევე
0
ასეთი უაზრო არგუმენტების მოყვანას,რომ მითომდა ამით ეშველება ქართულ ფეხბურთს!? ჯობია მართლა განვითარებაზე იფიქროთ.და აი როგორ 1) ფეხბურთელს დაუდე მინიმუმ 3-წლიანი კონტრაქტი
2)არცერთ შემთხვევაში არ უნდა გაუშვას კლუბმა ისეთ ჩემპიონატში ფეხბურთელი რომელიც საქ.ჩემპიონატს 2 თავით მაინც არ აღემატება(ამისთვის რო ფეხბურთელი არ გაიქცეს მიმწვევზე არანაკლები ხელფასი უნდა ჰქონდეს)
3)შემცირდეს დაბეგვრა კერძო ინვესტორისთვის(რათა ფეხბურთით დაინტერესდეს)
აი გამოსავალი თუ გინდა...
ზურა
0
აი რატომ, რატომ, რატომ ართულებთ?
თუ შემოდგომა-გაზაფხულზე გადასვლას ემხრობით რა შუაშია მაგასთან კორონავირუსი?
რეებს იგონებთ, რა ეხლა დაიწყოს და 2021 წლის გაზაფხულზე დამთავრდეს?
ან სახელმწიფოს მიერ გამოყოფილი თანხები რა შუაშია? თუ ე.წ. პროგრამის გაგრძელებაზეა საუბარი ისეც გაგრძელდება ან არ გაგრძელდება ამ პრობლემის მიუხედავად ხომ?
ევროტურნირებზე გამსვლელი გუნდები სხვა ქვეყნებისგან განსხვავებით ხომ ისედაც გარკვეულია და მათგან განსხვავებით ამ მხრივ პრობლემა ხომ არ გვაქვს?
წლევანდელ ჩემპიონატს რაც შეეხება ხომ უნდა გამართულიყო 4 წრე? ხოდა გაიმართება 3 წრე ან 2 წრე იმის მიხედვით თუ როგორ მოესწრება, ყველაფერი იქნება ხოშიანად და დამთავრდება იმ დროს როცა უნდა დამთავრებულიყო ყველანაირი გართულებების გარეშე და ობიექტურობის და სამართლიანობის დაცვით!
რახან ინტერვიუს გართმევენ, ტრიბუნა გაქვთ და აზრს გეკითხებიან აუცილებელი კი არის უარზობები ილაპარაკოთ და აბსურდში გადახვიდეთ...
მსგავსი ამბები
რუბრიკის სხვა სიახლეები
;