ასე დასრულდა საგა: კატალონიელი გრიზმანი და  ატლეტიკო რკინის ქალამნებით - ყველაფერი მეგატრანსფერის შესახებ

ზაფხულის ყველაზე დამაინტრიგებელი ტრანსფერი, ბოლოს და ბოლოს, შედგა - ანტუან გრიზმანი “ბარსელონაში” გადავიდა და გუშინ პრეზენტაციაც გაიმართა.

ასე დასრულდა საგა, რომელიც ჯერ კიდევ შარშან ზაფხულს დაიწყო და მას შემდეგ მის თაობაზე ძალიან ბევრს ლაპარაკობდნენ საფეხბურთო სამყაროში.

“ბარსელონამ” თავის ტვიტერზე გაავრცელა მოკლე ვიდეორგოლი, რომლის მთავარი მოქმედი პირიც გახლავთ 28 წლის ფრანგი ფორვარდი. კატალონიურმა კლუბმა ამ ვიდეორგოლს შესაბამისი წარწერაც მოუფიქრა - “ჩვენ ამას დიდი ხნის განმავლობაში ველოდით”. 

ამ ვიდეორგოლში გრიზმანი “ბარსელონას” ფორმაშია გამოწყობილი. და მაინც, რამდენ ხანს გაგრძელდა გრიზმანის სატრანსფერო საგა?

ანტუან გრიზმანს ჯერ კიდევ შარშან ზაფხულს სურდა “ბარსელონაში” გადასვლა. მსოფლიოს ჩემპიონატის დაწყებამდე ყველა ამ ტრანსფერის მოლოდინში იყო, მაგრამ... გარიგება ყველასთვის მოულოდნელად უკანასკნელ წამს ჩაიშალა. ზედ მსოფლიოს ჩემპიონატის დაწყების წინ გრიზმანმა პრესკონფერენცია ჩაატარა და სახალხოდ განაცხადა, რომ გადაიფიქრა კატალონიურ გრანდში გადასვლა. ამან მსოფლიო საფეხბურთო თემი ნამდვილ შოკში ჩააგდო...

გრიზმანმა “ათლეტებთან” კონტრაქტი 2023 წლამდე გაახანგრძლივა. სხვათა შორის, დაიწერა ისიც, რომ ის ვალდებული იყო, ეგრეთ წოდებული, “პირსაგამტეხლო” გადაეხადა “ბარსელონასთვის” 20 მილიონი ევროს ოდენობით, მაგრამ მოგვიანებით “ელ მუნდო დეპორტივომ” დაწერა, რომ ეს ინფორმაცია სინამდვილეს არ შეესაბამებოდა. აგვისტოში გრიზმანმა “ათლეტებთან” ერთად მისი ბოლო ტიტული - სუპერთასი მოიგო. მაშინ ალბათ ის საერთოდ არ ნანობდა, რომ მადრიდულ კლუბში დარჩა...

მერე და მერე ცნობილი გახდა, რომ დიდი სურვილისა და ჟინის მიუხედავად, ახლაც და სამომავლოდაც დიეგო სიმეონეს გუნდს გაუჭირდებოდა მთავარი ევროპული ტიტულებისთვის ბრძოლა და გრიზმანმა მოლაპარაკება განაახლა კატალონიურ კლუბთან.

ტრანსფერი ბოლო დრომდე კითხვის ნიშნის ქვეშ იდგა. საქმე ისაა, რომ “ბარსელონას” წამყვანი ფეხბურთელები გუნდში ანტუანის მისვლის წინააღმდეგები იყვნენ. ისინი მიიჩნევდნენ, რომ გრიზმანმა ერთხელ უკვე უარყო “ბარსელონა” და ამის გათვალისწინებით, ის არ იყო იმის ღირსი, რომ დაეცვა კატალონიური კლუბის ღირსება.

რა თქმა უნდა, ამ ხმებმა თავად გრიზმანამდეც მიაღწია. მსოფლიოს მოქმედი ჩემპიონი სერიოზულად დაფიქრდა იმის თაობაზე, ღირდა თუ არა “ბარსაში” გადასვლა. სანამ გრიზმანი ფიქრობდა, ვითარება შეიცვალა. “ბარსელონამ” ჩემპიონთა ლიგაში თავის გამოჩენა ვერ მოახერხა და ყველა, მათ შორის “ბარსას” ლიდერებიც, მიხვდა, რომ გუნდს ძალიან სჭირდებოდა “ახალი სისხლი”.

“მარკას” ინფორმაციით, უახლოესი 5 წლის განმავლობაში გრიზმანი “ბარსელონაში” 105 მილიონ ევროს გამოიმუშავებს. საშუალო ხელფასს თუ ავიღებთ, ის დაახლოებით იგივე იქნება, რაც მას “ატლეტიკოში” ჰქონდა.

როგორ იბრძოდნენ ბარსელონა და  ატლეტიკო  გრიზმანისთვის...

მაისის შუა რიცხვებში გრიზმანმა მორიგი განცხადება გაავრცელა, რომელშიც აღნიშნა, რომ ტოვებს მადრიდის “ატლეტიკოს”. არავის ეპარებოდა ეჭვი, რომ ფრანგი შემტევი კარიერას “ბლაუგრანაში” გააგრძელებდა, მაგრამ თავად მას არაფერი უთქვამს ამის თაობაზე. 

კატალონიელები ელოდნენ ივლისის დასაწყისს. გრიზმანისა და “ატლეტიკოს” შორის გაფორმებული კონტრაქტის საფუძველზე გამოსასყიდი თანხა ამ დროისთვის 200 მილიონი ევროდან 120 მილიონ ევრომდე დაიწევდა. “ბარსელონას” ნამდვილად არ ეხალისებოდა ზედმეტი 80 მილიონი ევროს გადახდა...
ფეხბურთელის ბუნდოვანი განცხადებით ისარგებლეს “პარი სენ-ჟერმენმა”, “მანჩესტერ იუნაიტედმა” და “სიტიმ”. ისინი ფრანგი ვარსკვლავისთვის ბრძოლაში ჩაერთვნენ. დაიწერა იმის თაობაზეც, თითქოს, “ბარსას” ძალიან სურდა ნეიმარის დაბრუნება და გრიზმანს ამ საქმის მოსაგვარებლად გამოიყენებდა.

“ბარსელონამ” ფეხბურთელისთვის ფასის დაწევაზე უარი განაცხადა. კლუბებს შორის ბრძოლა ძალიან გამწვავდა. ერთი კვირის წინ “ატლეტიკომ” ოფიციალური განცხადება გაავრცელა და პირდაპირ დაადანაშაულა “ბარსა” იმაში, რომ ისინი ჩუმად, კლუბის გვერდის ავლით მართავდნენ მოლაპარაკებას გრიზმანთან. მოლაპარაკება კი დაიწყო ჯერ კიდევ მარტში, როცა გუნდები გამალებით იბრძოდნენ ტიტულების მოსაგებად.

“ატლეტიკოს” განცხადებაში ნათქვამია, რომ “ბარსელონას” ხელმძღვანელობამ ითხოვა ფეხბურთელის ფასის დაწევა 120 მილიონ ევრომდე, მაგრამ უარი მიიღო, რადგან “ათლეტები” გაბრაზებულნი არიან იმის გამო, თუ როგორ მოიქცა “ბარსა”.

როგორ გაატარა გრიზმანმა ბოლო ორი კვირა...

“ატლეტიკომ” ახალი სეზონისთვის სამზადისი 7 ივლისს დაიწყო. “მარკას” მტკიცებით, კლუბის ხელმძღვანელობა აპირებდა, სანქციები მიეღო გრიზმანთან დაკავშირებით იმ შემთხვევაში, თუ ის თავიდანვე არ იქნებოდა გუნდთან ერთად შეკრებაზე. 

ამასობაში, გრიზმანმა ყველას დაასწრო და “ატლეტიკოს” ხელმძღვანელობას კონკრეტული წინადადებით მიმართა - მას სურდა, რომ გააქტიურებულიყო კონტრაქტში არსებული პუნქტი, რომელიც მის გამოსყიდვას 120 მილიონ ევროდ ითვალისწინებდა. ასეთ შემთხვევაში, მან შეძლო და ინდივიდუალურად განაახლა ვარჯიში.

რა თქმა უნდა, გრიზმანს კონტრაქტის გამოსასყიდ ფულს “ბარსელონა” აძლევდა. კატალონიელებმა ყველაფერი გააკეთეს იმისთვის, რომ ეს თანხა, რაც შეიძლებოდა, მალე გადაეხადათ. ესპანურ მედიაში გავრცელდა ინფორმაცია, რომ გრიზმანის ტრანსფერის გამო მთელი სამი დღით დაუგვიანეს ხელფასი კლუბის თანამშრომელთა უმრავლესობას.

ამასობაში, “ატლეტიკომ” კიდევ ერთი განცხადება გამოაქვეყნა, სადაც ნათქვამია, რომ მადრიდულ კლუბს ხელთ აქვს მტკიცებულებები, რომლის მიხედვითაც “ბარსელონასა” და გრიზმანს შორის კონტრაქტი ჯერ კიდევ 1 ივლისამდე გაფორმდა. აქედან გამომდინარე, “ათლეტები” ბოლომდე იბრძოლებენ იმისთვის, რომ კუთვნილი 80 მილიონი ევრო არ დაკარგონ. ამ მოტივით მადრიდული კლუბი სასამართლოში მიდის.

რას ამბობენ გრიზმანის შესახებ...

“რა თქმა უნდა, ფეხბურთელები გაბრაზებულები არიან იმის გამო, რომ გასულ ზაფხულს გრიზმანი არ გადავიდა “ბარსელონაში”. ვგულისხმობ “ბლაუგრანას” მოთამაშეებს. არადა, ანტუანი დიდებული ფეხბურთელია. თუ აქ მხოლოდ ეს მიზეზია, მე მზად ვარ დაველაპარაკო “ბარსას” ფეხბურთელებს და ავუხსნა, რა კარგი პიროვნებაა ანტუანი. და იმ შემთხვევაში რა ვქნათ, თუ მწვრთნელის სტილში არ ჯდება ის? ეს თუ ასეა, მაშინ საქმე უფრო გართულებულია”, - აცხადებს ჩავი.

“ერთხელ, “ბარსელონას” პრეზიდენტმა აზრი მკითხა გრიზმანის თაობაზე. მე მას პირდაპირ ვუთხარი, რომ არ ვიყიდდი ფრანგს ამ კონკრეტულ სიტუაციაში. ეს არ ნიშნავს იმას, რომ ის ცუდი ფეხბურთელია. უბრალოდ, “ბარსელონაში” ამ პოზიციაზე თამაშობს ლიონელ მესი და ეს არის საკითხი, რომელიც განსაკუთრებულ მიდგომას მოითხოვს”, - განაცხადა “ბარსელონას” ყოფილმა მთავარმა მწვრთნელმა კარლეს რექსაჩმა.

“ერთი ფეხბურთელი რომ ამარჩევინონ “ბარსელონასთვის”, პირადად მე ავირჩევდი ნეიმარს. რა თქმა უნდა, გრიზმანი შესანიშნავი მოთამაშეა. მან წლების განმავლობაში დაამტკიცა, რომ უმაღლეს დონეზე შეუძლია თამაში, მაგრამ ნეიმარს აქვს ერთი კონკრეტული უპირატესობა - მას აქვს “ბარსაში” თამაშის გამოცდილება.

გრიზმანს კი არასოდეს უთამაშია ლუის სუარესსა და ლიონელ მესისთან ერთად. მიმაჩნია, რომ ეს მნიშვნელოვანი ფაქტორია, თუმცა ერთხელაც უნდა ვთქვა, რომ გრიზმანი დიდებული ფეხბურთელია. ის შესანიშნავია იმითაც, რომ ძალიან კარგად თამაშობს გუნდურ ფეხბურთს”, - ბრძანა “ბარსას” ექსვარსკვლავმა რივალდომ.

ყოველდღიური სპორტული გაზეთი "ლელო"
428
მკითხველის კომენტარები / 0 /
მსგავსი ამბები
რუბრიკის სხვა სიახლეები
;