ასლან ბალაძე: ამ გუნდის პოტენციალის მჯერა!

"ლელო" უკვე წერდა, რომ ბათუმის "დინამოს" სეზონის ბოლომდე ასლან ბალაძე გაწვრთნის იური მამინაშვილთან ერთად.

რა იმედებით მივიდა ჩემპიონატის დასრულებამდე 5 ტურით ადრე კლუბში, რომელიც 31 ტურის შემდეგ 32 ქულით მე-8 ადგილზეა და ლიგაში ადგილის შესანარჩუნებლად იბრძვის, გუნდში რის შეცვლას აპირებს და როგორ წარმოუდგენია ვითარების გამოსწორება. ამ და სხვა თემებზე ბალაძემ "ლელოსთან" ინტერვიუში ილაპარაკა...

- გუნდი მძიმე სატურნირო მდგომარეობაში ჩაიბარეთ, რაც დიდი პასუხისმგებლობა და რისკია.
- ეს ყველაფერი გასაგებია, ცხრილს რომ შეხედავ, გული მოგიკვდება - მაგრამ სხვა გზა არაა. ყველაფერი უნდა გავაკეთოთ, ბათუმის "დინამომ" მომავალ სეზონშიც ეროვნულ ლიგაში რომ ითამაშოს.

- ასეთ ვითარებაში მუშაობას რისი იმედით დათანხმდით, გუნდს გადათამაშების გარეშე დარჩენის რა შანსი გააჩნია?
- შანსი ისაა, რომ ყველა დარჩენილი შეხვედრა მობილიზებით ჩავატაროთ და ქულების მაქსიმალური რაოდენობა დავაგროვოთ. უიმედოდ ნამდვილად არ ვარ. მჯერა, "დინამო" ამ კრიზისს თავს დააღწევს და ლიგაში ადგილს შევინარჩუნებთ.

- რაიმე ცვლილებებს გეგმავთ?
- ახალი მწვრთნელი უკვე ცვლილებას ნიშნავს. მაგრამ ჩემპიონატის დასრულებამდე 5 ტურია დარჩენილი და ცვლილებებზე მეტად არსებული რესურსის სწორად გამოყენებაზე ვფიქრობთ. არავინ მიდის და არავინ მოდის.

- რეალურად ვითარების შესაცვლელად დროც არ გაქვთ.
- ეს მეც კარგად მესმის. აქ პრობლემა არა იმდენად შემადგენლობაში, არამედ მოთამაშეთა ფსიქოლოგიურ მდგომარეობაშია - ბიჭებს უკვე ველაპარაკე და მივხვდი, რომ წაგებებმა მათზე ძალიან ცუდად იმოქმედა. ამიტომ გულშემატკივარს ვთხოვ, ბოლომდე მხარი დაგვიჭიროს - ეს ახლა "დინამოს" ძალიან სჭირდება. ვითარების შესაცვლელად დროც არ გვაქვს, მაგრამ გვყავს მარცვალაძე, კვირკველია, გრიგალაშვილი, მახარაძე, არზიანი, შონია და კიდევ ბევრი ძალიან კარგი მოთამაშე. ამ გუნდს კი უკეთესი შედეგი შეეფერება.

- ფროლოვის შეცდომებს გულისხმობთ?
- არავითარ შემთხვევაში. ფროლოვი კარგი სპეციალისტია და მასზე ენა არ მომიტრიალდება. მან გუნდში გულიანად და პატიოსნად იმუშავა. უბრალოდ, მასაც არ გაუმართლა. სეზონი ნებისმიერმა გუნდმა შეიძლება ჩააგდოს, მე კი ამის გამო წინამორბედის ლანძღვას ნამდვილად არ ვაპირებ.

- თავის დროზე ჯანი კარნევალეს უთხრეს, ბათუმური პალმა იტალიაში ვერ გაიხარებსო, ანუ საქართველოში იტალიური მიდგომების კოპირება არ შეიძლება, განსხვავებულია საჭიროო. ასეთი რა მენტალიტეტია ქართულში, რომ ევროპული არ ჭრის?
- გეთანხმებით, რომ უცხოელებს საქართველოში ბარიერი ექმნებათ, რაც მათი ბრალი არაა. ჩვენი მოთამაშეები თავისებურები, ემოციურები და ამაყები არიან. ამიტომ ჩამოსულმა სპეციალისტმა აქაური ქუდი უნდა დაიხუროს, მათ რომ გაუგოს. უცხო ქვეყანაზე მორგება კი არა მხოლოდ საქართველოში, ყველგან ძნელია.

გაიხსენეთ, ანჩელოტის გერმანიაში რა შეემთხვა? იტალიურ გარემოს შეჩვეულ ფეხბურთელებს მიუნხენშიც მეგობრულად ექცეოდა, მაგრამ ასეთი მიდგომა არ გამოადგა. ეს იმას ნამდვილად არ ნიშნავდა, რომ ანჩელოტის კვალიფიკაცია დაეწუნებოდა.

- მაგრამ გუნდში იმიტომ მიგიწვიეს, რომ ბევრი რამ შეცვალოთ.
- თავისთავად ცხადია, რომ უნდა შევცვალოთ. ეს ჩვეულებრივი ამბავია, ორი ერთნაირი ხედვის მქონე მწვრთნელი იშვიათია. ჩვენთან ბევრი ისეთი ფეხბურთელია, ნაკრებში რომ უთამაშიათ, პიროვნებები არიან, პროფესიონალები არიან და მჯერა, მათ გუნდის გადარჩენა შეუძლიათ. ერთ-ერთი მიზეზი ესეც იყო, რის გამოც დავბრუნდი - ბათუმის "დინამოში" პოტენციალს ვხედავდი. მჯერა, ისინი გვერდით დამიდგებიან.

- "ჩიხურასთან" თამაში მეორე ტაიმში დათმეთ. ისე ჩანს, რომ გუნდს ფიზმომზადების პრობლემა აქვს.
- ესეც ფსიქოლოგიური პრობლემის გამოძახილი მგონია. ბიჭებს მოგების აღარ სჯეროდათ და მეორე ტაიმი ამიტომ წააგეს.

- დარჩენილ 5 ტურში ლიდერთა ჯგუფის წარმომადგენლებს - თბილისის "დინამოს", "საბურთალოს" და "ტორპედოს" ხვდებით, ხოლო აუტსაიდერებიდან "შუქურასა" და "კოლხეთს" - ქულები თითოეულ მათგანს სჭირდება და არავინ არაფერს დათმობს.
- ეს მესმის - კალენდარსაც კარგად გადავხედე. მაგრამ ამის შიშით მშობლიური გუნდის დახმარებაზე უარს ვერ ვიტყოდი. ხაზგასმით ვამბობ - მე მწვრთნელობისკენ გული არასოდეს მიმიწევდა. პირველად გუნდი რომ ჩამაბარეს, ამის სურვილი არც მაშინ მქონია და ახლაც ეს წინადადება მოულოდნელი იყო. მე ბევრად მშვიდი სამსახური მქონდა და თავის ატკივება ნამდვილად არ მსურდა. მაგრამ ხომ გითხარით - ბათუმის "დინამოს" თანადგომაზე უარს ვერ ვიტყოდი.

- გუნდზე უარყოფით გავლენას უსტადიონობაც ახდენდა. მაგრამ სახლში დაბრუნებლმა ბათუმის "დინამომაც" თავი ვერაფრით გამოიჩინა, პირიქით -გუნდს საკუთარი მოედნის კომპლექსი გაუჩნდა. არადა, მსგავსი საფეხბურთო გარემო არც ერთ სტადიონზე არაა.
- ეს მართლა მოულოდნელი იყო, რადგან ყველას გვეგონა, რომ სახლში, ბათუმში, დაბრუნებული "დინამო" თამაშების მაქსიმალურ რაოდენობას მოიგებდა. "ჩელე-არენა" ჩვენთვის უფრო იღბლიანია, რადგან იქ გამოსვლის პერიოდში ევროპის ლიგაზე ორჯერ გავედით. შესაძლოა, ქობულეთში უფრო მეტი ქულა აგვეღო. მაგრამ გუნდი დალაგდეს და ამასაც მოევლება - საკუთარ ქალაქში თამაშით ჯერ არავინ დაზარალებულა.

- სიტყვამ მოიტანა და გჯერათ, რომ ბათუმს საკუთარი საფეხბურთო სტადიონი ეღირსება?
- მე ვიცი ახლანდელი განწყობა, აჭარა პატარაა და ყველა ერთმანეთს ვიცნობთ. ვიცი, რომ მთავრობის და ქალაქის ხელმძღვანელებში ფეხბურთის ბევრი მოყვარულია და აქედან გამომდინარე ვამბობ - ბათუმში სტადიონი მალე აშენდება. აქვე მადლობა უნდა ვუთხრა მორაგბეებს, რომლებმაც ბათუმში დაბრუნების საშუალება მოგვცეს.

- ვიცით, რომ ბოლო დროს ბათუმის "დინამოს" საფეხბურთო სკოლის დირექტორი იყავით და საინტერესოა, თაობები მოდიან?
- ზღვისპირა ქალაქებში ნიჭიერი ბავშვები სულ იზრდებიან და დღესაც ასეა. სხვათა შორის, ბოლო დროს სკოლა კარგად ამუშავდა. ბავშვების განვითარებას შეყილაძე უძღვება, "დინამოს" ბევრი ვეტერანიც მუშაობს - მამინაშვილი, ხომერიკი, კანტიძე, შანიძე, ყულეჯიშვილი, ვანო მახარაძე, იმედია, მალე პაატა მაჭუტაძეც შემოგვიერთდება. გავა რამდენიმე წელი და ნახავთ, ბათუმში ძალიან კარგი თაობები წამოიზრდებიან.

ყოველდღიური სპორტული გაზეთი "ლელო"
1329
მკითხველის კომენტარები / 0 /
მსგავსი ამბები
რუბრიკის სხვა სიახლეები
;