აქცენტები სწორად დასვით! - ბათუმის დინამოს საგანგებო განცხადება

ბოლო მოვლენებთან დაკავშირებით, საგანგებო განცხადება ბათუმის “დინამომაც” გაავრცელა. ეს გასაგებია, რადგან “ვიტ ჯორჯიას” მოთამაშეები სწორედ ბათუმური მატჩის შემდეგ დააკავეს...

“საფეხბურთო კლუბი ბათუმის “დინამო” კატეგორიულად აცხადებს, რომ ჩვენი გუნდის ფეხბურთელთა მონაწილეობა 19 მაისის თუ სხვა რომელიმე თამაშის, “შეთანხმებული ანგარიშით” დასრულებაში - გამორიცხულია!

აღნიშნულს ადასტურებს სახელმწიფო უსაფრთხოების სამსახურის ანტიკორუფციული სააგენტოს განცხადებაც, რომელშიც აღნიშნულია, რომ 2019 წლის 19 მაისს, ორგანიზებული დანაშაულებრივი ჯგუფის წევრების მიერ საქართველოს ეროვნული საფეხბურთო ჩემპიონატის უმაღლეს ლიგაში მოასპარეზე საფეხბურთო კლუბ “ვიტ ჯორჯიას” მოსყიდულმა ფეხბურთელებმა, წინასწარი შეთანხმების საფუძველზე, საფეხბურთო კლუბ ბათუმის “დინამოსთან” შეხვედრა ორბურთიანი სხვაობით დათმეს, რაც ცალსახად გამორიცხავს “დინამოს” რომელიმე წარმომადგენლის რაიმე სახით მონაწილეობას გარიგებაში.

აღნიშნულს ადასტურებს ასევე ის, რომ გამომძიებელთა მხრიდან ჩვენი კლუბის არცერთი წარმომადგენლის მიმართ არავითარი კითხვის ნიშნები არ დასმულა.

ყოველივე ზემოაღნიშნულიდან გამომდინარე, უმორჩილესად ვთხოვთ მედიის წარმომადგენლებს, სწორად დასვან აქცენტები ამ საკითხის გაშუქების დროს და ბათუმის “დინამოს” სახელის ხსენებას ამ კონკრეტულ ფაქტთან მიმართებაში მეტი სიფრთხილით მოეკიდონ, ჩვენი კლუბის რეპუტაციას ჩრდილი რომ არ მიადგეს, მისი სახელი არ შეილახოს და არ გაჩნდეს კითხვები ჩვენს გულშემატკივრებსა და ქართულ საზოგადოებაში.

საფეხბურთო კლუბი ბათუმის “დინამო” დიდი სპორტული იდიალების ირგვლივ შეკრული ერთიანი გუნდია, რომელიც გარიგებულ მატჩებთან მიმართებაში საქართველოს ფეხბურთის ფედერაციის პრეზიდენტის სულისკვეთებას სრულიად იზიარებს და ღირსეული თამაშის პრინციპებს იცავს”. 

ყოველდღიური სპორტული გაზეთი "ლელო"
2244
მკითხველის კომენტარები / 0 /
მსგავსი ამბები
რუბრიკის სხვა სიახლეები
;