აშვეთია რჩება, თუმცა... სამწვრთნელო საკითხი ტორპედოში და უკრაინელი ფორვარდი სამეკარეო გამოცდილებით

ეროვნული ლიგის პირველ ტურში ახალი ქუთაისის "ტორპედო" შინ გორის "დილასთან" დამარცხდა - 0:2. აშკარად გამოჩნდა, რომ მიხეილ აშვეთიას გუნდი ჯერ კიდევ დასაკომპლექტებელია და თან გვარიანად აკლია შეთამაშება, რაც ნამდვილად არ არის გასაკვირი ცნობილი მოვლენების ფონზე - ზედ ჩემპიონატის წინ გადარჩენილი გუნდი ასე თანდათან, ჩემპიონატის მსვლელობისას უნდა "აშენდეს" - სხვა გზა, უბრალოდ, არ არის.

...მაგრამ გავრცელებული ინფორმაციით, "ტორპედო" არა მხოლოდ ფეხბურთელებს, არამედ, პრო-ლიცენზიის მქონე მწვრთნელსაც ეძებს. ის კი, თითქოს, აშვეთია პირველ ტურში წაგების შემდეგ კლუბის ხელმძღვანელობამ გაათავისუფლა, სიმართლე არ არის.

საქმე ისაა, რომ 2019 წელს ფეხბურთის ფედერაციამ დაამტკიცა ლიცენზირების ახალი, გამკაცრებული წესი, რომლის თანახმადაც ეროვნული ლიგის მთავარ მწვრთნელად მხოლოდ პრო-ლიცენზიის მქონე სპეციალისტმა უნდა იმუშაოს. სწორედ ამით იყო გამოწვეული თბილისის "დინამოში" ფელის ვისენტეს დანიშვნა, როცა რეალურად გუნდში ამ როლს ჩისკო მუნიოსი ასრულებდა. ასევეა წელს თბილისის "მერანი", სადაც, რეალურად, მთავარი მწვრთნელი ავთანდილ შენგელაია, მაგრამ ლიცენციის არქონის გამო, ოფიციალურად მთავარი მწვრთნელი გიორგი დარასელიაა.

აშვეთიას პრობლემა კი ის არის, რომ ამ დროისთვის მას პრო-ლიცენზია არ აქვს და "ტორპედო" ასეთი სერთიფიკატის მქონე სპეციალისტს ეძებს. მაგრამ აშვეთია და მისი თანაშემწეები "ტორპედოს" სამწვრთნელო შტაბში დარჩებიან და იმავე საქმეს გააკეთებენ, რასაც აქამდე ასრულებდნენ.

გავრცელებული ინფორმაციით, ქუთაისურ კლუბში დაადასტურეს, რომ მოლაპარაკება აქვთ რამდენიმე კანდიდატთან, მათ შორის, ვლადიმერ ხაჩიძესთან, რომელიც ბოლოს "ვიტ ჯორჯიას" წვრთნიდა. საინტერესოა, რომ ხაჩიძე "ვიტ ჯორჯიადან" წავიდა, რაც კიდევ უფრო ამძაფრებს ეჭვებს ქუთაისის "ტორპედოში" მისი შესაძლო მისვლის თაობაზე. ცხადია, ხაჩიძეს კომენტარისთვის დავუკავშირდით. აი, რა გვითხრა მან:

"ვადასტურებ, რომ "ვიტ ჯორჯია" დავტოვე. ქუთაისში ჩემს მიწვევაზე კი ჯერ ვერაფერს ვიტყვი. მე როგორც ვიცი, "ტორპედოში" სხვა კანდიდატურებიც განიხილება. ასე რომ, ჯერ ჩემზე ლაპარაკი ნაადრევია და ცოტა უადგილოც".

ქუთაისელთა ახალწვეული: თავდამსხმელი, რომელსაც მეკარედაც უთამაშია

...რასაც წყალი არ გაუვა, ეს არის ქუთაისის "ტორპედოში" უკრაინელი ფორვარდის, ვიტალი პონომარის ჩარიცხვა. ამის შესახებ ინფორმაცია კლუბის ოფიციალურმა გვერდმა გაავრცელა.

"პონომარი კარიერას "ტორპედოში" გააგრძელებს. უკრაინელი თავდამსხმელი სამედიცინო შემოწმებას გაივლის და კლუბთან კონტრაქტს ამის შემდეგ გააფორმებს. 29 წლის პონომარი გუნდს ლუცკის "ვოლინიდან" შეუერთდება", - ვკითხულობთ "ტორპედოს" ოფიციალურ გვერდზე.

ვიტალი პონომარი
დაიბადა 1990 წლის 31 მაისს კუპიანსკში (უკრაინა)
სიმაღლე: 182 სმ
ამპლუა: თავდამსხმელი

პროფესიული კარიერა
2007-10 შახტარი დონ. 0(0)
2007 კომუნალნიკი (იჯ) 12(0)
2008-09 შახტარი 3 40(19)
2009 ოლექსანდრია (იჯ) 9(0)
2010 პოლტავა 7(1)
2010-13 შახტარი სვ. 79(14)
2013-14 უკრაგროკომი 28(8)
2014-19 ოლექსანდრია 135(25)
2019 ვოლინი 15(3)
2020- ტორპედო ქ 0(0)

1990 წლის 31 მაისს ხარკოვის ოლქის (უკრაინა) ქალაქ კუპიანსკში დაბადებული ვიტალი პონომარი ფორვარდია. კუპიანსკის საფეხბურთო სკოლის აღზრდილი გახლავთ. სკოლის დამთავრების შემდეგ, ის სერგეი ატელკინმა, რომელიც დონეცკის "შახტარის" სელექციონერად მუშაობდა, ამ გუდში მიიწვია.

სინჯების შემდეგ პონომარს გუნდში დარჩენა შესთავაზეს, მაგრამ მაშინვე იჯარით გაუშვეს დაბალი ლიგის გუნდებში - ჯერ ლუგანსკის "კომუნალნიკში", ხოლო შემდეგ "შახტარის" მესამე გუნდში.

ამის მერეც, პონომარი, ძირითადად, დაბალი ლიგის გუნდებში გამოდიოდა - "ოლექსანდრიაში" (I ლიგა) და II ლიგის "პოლტავაში", სვერდლოვსკის "შახტარსა" და "უკრაგროკომში". უკრაინის პრემიერლიგაში 2015/16 წლების ჩემპიონატი ჩაატარა, როცა "ოლექსანდრიას" ღირსებას იცავდა და ამ გუნდთან ერთად 2015 წელს ჯერ პირველი ლიგის გამარჯვებული გახდა, ხოლო 2019 წელს - მესამეადგილოსანი.

2019 წლის ივლისში პონომარმა 2-წლიანი ხელშეკრულება გააფორმა ლუცკის "ვოლინთან", რომელიც უკრაინის პირველ ლიგაში თამაშობს. მაგრამ ნოემბერში კონტრაქტი გაწყვიტა და თავისუფალი აგენტი გახდა. ახალი გუნდის მოძებნამდე პონომარი "ოლექსანდრიაში" ვარჯიშობდა...

ის უკრაინაში კურიოზითაც ახსოვთ - 2016 წლის აპრილში, როცა "ოლექსანდრია" დნეპროპეტროვსკის "დნიპროსთან" 0:4 დამარცხდა, ამ 4 გოლიდან 3 სწორედ პონომარმა გაუშვა. ეს იმის გამო მოხდა, რომ ოლექსანდრიელთა მეკარე ანდრეი ნოვაკმა წითელი ბარათი მიიღო. ამ დროს, გუნდის მთავარ მწვრთნელ ვლადიმირ შარანს ყველა შეცვლა განხორციელებული ჰქონდა და შედეგად, მეკარის ხელთათმანები პონომარმა მოირგო...

1731
მკითხველის კომენტარები / 0 /
მსგავსი ამბები
რუბრიკის სხვა სიახლეები
;