აშკარად დაუჯერებელი... ანუ რამ გამოიწვია პირველი წრის სენსაციური ფინიში? [ოთხშაბათის საკითხავი]

საქართველოს ეროვნული ლიგის პირველი წრე ისტორიის კუთვნილებაა. “ლელომ” ჩემპიონატის ეს ნაწილი სტატისტიკის დონეზე უკვე შეაჯამა. ეს წერილი კი ერთგვარი ცდაა, შევაფასოთ მომხდარი და გარკვეულწილად, მომავლის განჭვრეტასაც შევეცადოთ...

ამას ბევრი ვერ  წარმიოდგენდა!

პირველი წრის "ჩემპიონი" "საბურთალო" გახდა, მაგრამ დღეს ლიდერი ბათუმის "დინამოა". გავრისკავთ და ვიტყვით, რომ ამას ბევრი ნამდვილად ვერ წარმოიდგენდა. როგორი საქმეა, გუნდი მიმდინარე სეზონის დაწყების წინ აღზევდა უძლიერესთა შორის და... ეგრევე პირველი ადგილი!

შემთხვევით არაფერი ხდება და, რა თქმა უნდა, ბათუმელთა წარმატებაც არ არის შემთხვევითი მოვლენა. აქ არ უნდა დაგვავიწყდეს გია გეგუჩაძის ფაქტორი. მას არ ესწავლება ქართული ტიტულების მოგება. მეტიც, კარგად იცის ყველა ჩვენებური ტიტულის გემო და გასაკვირი არაფერია იმაში, რომ კიდევ ერთ ქართულ ტიტულს შეუტიოს.

გავრისკავთ და დავწერთ: რომ არა სასტარტო წარუმატებლობა, როცა “დინამოს” გარკვეული დრო დასჭირდა უმაღლეს ლიგასთან შესაგუებლად, მათი პირველი ადგილი, ასე ვთქვათ, უფრო მყარი იქნებოდა.

აქვე დამსახურება არ უნდა დავუკარგოთ კლუბის ხელმძღვანელობას, რომელიც გუნდის უკეთესი მომავლისთვის ყველაფერს აკეთებს. ასევე დიდია გუნდის წარმატებაში მენეჯმენტის წვლილი. თუნდაც, ლეგიონერები რომ ავიღოთ, ბათუმელები ამ მხრივაც გამორჩეულები არიან. ყოველ შემთხვევაში, ალბათ ბევრი ვერ შეგვედავება იმაში, რომ ბათუმელთა ლეგიონერები, ჯოვინო ფლამარიონი და გაბრიელ რამოსი, საქართველოს ჩემპიონატში გამორჩეულთა შორის არიან და გიორგი ნავალოვსკის ტრანსფერი ხომ სულაც საუკეთესო იყო მიმდინარე პირველობაზე.

უახლოეს მომავალში “ლელო” შეგახვედრებთ “დინამოს” სამენეჯერო შტაბის წარმომადგენლებს და ისინი უკეთ ახსნიან, თუ როგორ შეიძლება ჩვენს პირობებში ასეთი კარგი ტრანსფერების “გაჩარხვა”.

როცა თამასა დაბლა არ ვარდება

“საბურთალო” ერთი ქულით ჩამორჩება ბათუმის “დინამოს” - საქართველოს მოქმედი ჩემპიონი, ვისაც გიორგი ჭიაბრიშვილი კარგ, თვალსასეირო ფეხბურთს ათამაშებს. ფაქტია, ეს გუნდი დღესაც ერთ-ერთ გამორჩეულ კლუბად რჩება საქართველოში თამაშის ხარისხით, კომპლექტაციით, საქმისადმი მიდგომით... 

გავრისკავთ და დავწერთ იმასაც, რომ “საბურთალო” ბოლომდე იბრძოლებს საქართველოს ჩემპიონობისთვის. დედაქალაქური კლუბის ხელმძღვანელობა დაგვეთანხმება: ჩემპიონთა ლიგისთვის გუნდს გაძლიერება აუცილებლად დასჭირდება. არის რამდენიმე პოზიცია, რომელსაც მიხედვა უნდა და ეს უმთავრესი ევროსაკლუბო ტურნირის დაწყებამდე უსათუოდ უნდა მოესწროს.

როცა ჯადოქრები არ არიან...

რა თქმა უნდა, როცა საქმე ეხება თბილისის “დინამოს”, ამ გუნდის გულშემატკივარი ყოველთვის პირველობას ითხოვს. ეს ბუნებრივიცაა. თბილისური კლუბის ისტორია, ტრადიცია და ამბიცია არ ტოვებს სხვა მიდგომის უფლებას. “დინამოს” ჰქონდა კარგი, შედარებით კარგი და ცუდი თამაშები. ჰქონდა გუნდური და ინდივიდუალური შეცდომები. 

ისიც ფაქტია, რომ მესამე ადგილი არ არის მისაღები შედეგი “დინამოსთვის”, მაგრამ ფაქტია ერთიც: ჩისკო და მისი სამწვრთნელო შტაბი ჯადოქრები არ არიან და მათ არ შეუძლიათ, ხელის ერთი აქნევით შეცვალონ სიტუაცია. ფაქტია, დიდი ჩავარდნა არ ყოფილა, მაგრამ პირველზე უკეთესი უნდა გამოვიდეს მეორე წრე - ასეთია გულშემატკივრის დაკვეთა და სატურნირო აუცილებლობა. სხვანაირად, გუნდს საქართველოს ჩემპიონობისთვის ბრძოლა ძალიან გაუჭირდება.

რომ არა ფინანსური კრიზისი...

რა თქმა უნდა, ეს რუბრიკის ავტორის სუბიექტური აზრია - შემადგენლობის მიხედვით, ქუთაისის “ტორპედო” საუკეთესო გუნდია ეროვნულ ლიგაში. კახა ჩხეტიანის ხელში მართლაც რომ კვალიფიციური ფეხბურთელები არიან თავმოყრილნი. რატომღაც მგონია - რომ არა ფინანსური სირთულეები, “ტორპედო” უფრო მაღლა იქნებოდა სატურნირო ცხრილში. 

როცა საქმე ეხება ფინანსების ნაკლებობას, ნებისმიერ სამწვრთნელო შტაბს გაუჭირდება, ბოლომდე შეუნარჩუნოს მოტივაცია ფეხბურთელებს. ეჭვი არ გვეპარება, რომ მეორე წრეში და, ზოგადად, ჩემპიონატის ბოლომდე “ტორპედო” გაცილებით სტაბილური გუნდი იქნება. 

ამის თქმის საფუძველს გვაძლევს ის, რომ ქართველ ფეხბურთელებთან ერთად უკვე გაიარეს ადაპტაცია იმ ლეგიონერებმა, რომლებიც უკვე აჩვენებენ თავიანთ საუკეთესო თვისებებს. მაგალითად, ძალიან ტექნიკურია რიჩარდ ლუკა. მე ასე მგონია - ჩია ტანის ბრაზილიელი საქართველოს ეროვნულ ლიგაში ერთ-ერთი ყველაზე ტექნიკური მოთამაშეა თანამემამულე ფლამარიონთან ერთად.

ბრავო, ჩიხურა!

სეზონის დაწყების წინ საჩხერის “ჩიხურას” რამდენიმე ლიდერი დააკლდა - გიორგი გაბედავა და ირაკლი ბუღრიძე უცხოეთში წავიდნენ, დაცვის ბურჯი ლევან კაკუბავა კი “საბურთალოში” გადავიდა. წავიდნენ სხვებიც. სოსო ფრუიძემ გეზს არ უღალატა. გუნდი ძირითადად სხვა კლუბების მიერ დაწუნებული ფეხბურთელებით შეავსო და შედეგად მივიღეთ არაერთი გამწარებული ფავორიტი, მე-5 ადგილი და მცირე ჩამორჩენა ლიდერებთან.

ალბათ, ქართულ ფეხბურთში კარგად ჩახედული მკითხველი დაგვეთანხმება, რომ ასეთი შედეგის ჩვენება ამ კონტინგენტით გმირობის ტოლფასია და სადაც საჩხერელთა წარმატებაზე ვწერთ, სოსო ფრუიძის ფაქტორს უნდა გავუსვათ ხაზი. 

წლების განმავლობაში ის ამტკიცებს, რომ საქართველოს ჩემპიონატში მისი გაქანებისა და ცოდნის მწვრთნელი ბევრი არ არის. მე ასე მგონია: ჩვენში ვერავინ იყენებს ისე კარგად მეტოქის სისუსტეებს, როგორც - ფრუიძე.

ავტორიტეტთა რისხვა

საბჭოთა დროში, სხვა პრიზებთან ერთად, “ავტორიტეტთა რისხვაც” თამაშდებოდა და ენიჭებოდა იმ გუნდს, რომელიც ყველაზე მეტ ქულას აგროვებდა ლიდერებთან მატჩებში. საქართველოში რომ ეს პრიზი არსებობდეს, ის უთუოდ “სიონს” გადაეცემოდა. ხუმრობა საქმე ხომ არაა - თემურ შალამბერიძის მიერ დამოძღვრილმა გუნდმა ჯერ თბილისის “დინამოს” მოუგო, მერე კი, პირველი წრის ბოლო ტურში, ქუთაისის “ტორპედოც” მიაყოლა.

“სიონი” ერთ-ერთი ყველაზე მწირბიუჯეტიანი კლუბია საქართველოში. აქედან გამომდინარე, ფეხბურთელებს ყველა შეხვედრაში ვერ მოსთხოვ სტაბილურად თამაშს, მაგრამ ფაქტია - ბოლნისელებმა თითოეულ შეხვედრაში ბოლომდე იბრძოლეს. “სიონს” ჰყავს თავისი ლიდერები, თუნდაც - ჯაბა უგულავა და დავით კირკიტაძე. 

მოკლედ, ბოლნისური კლუბი ინარჩუნებს თავის ნიშას და კოლორიტულია ყველანაირი გაგებით. ბოლნისში თამაში ნებისმიერ გუნდს უჭირს. იქ, სადაც რაღაცნაირად, ამაყად წერია - “აქ თამაშობს სიონი”!

ჯერ მხოლოდ გარიჟრაჟია

გორის “დილა” არასტაბილურია. ფაქტია, ამ გუნდისგან მეტს ველოდით და ვეჭვობთ, შედეგით კმაყოფილი არც კლუბის ხელმძღვანელობა იქნება. ყველაფერს თავისი მიზეზები აქვს. დროულად ვერ მოხერხდა ლეანდრო რიბეიროსა და მიკოლა კოვტალიუკის შემცვლელების მოძიება. 

გარდა ამისა, ტრავმები მოეძალათ ახალწვეულებს. შესაბამისად, მივიღეთ ის შედეგი, რომელიც დღესაა დაფიქსირებული. ფაქტია, გიორგი დეკანოსიძის გუნდს გაუჭირდება ევროსაგზურის მოპოვება. არადა, გუნდის მიზანი სწორედ ესაა.

მეტიც შეუძლიათ...

მიუხედავად იმისა, რომ სატურნირო თვალსაზრისით “ვიტ ჯორჯიას” შედეგი იდეალური არ არის, სათამაშო ორგანიზაციისა და დისციპლინის დაცვის კუთხით ვიტელებს ერთ-ერთი საუკეთესო გუნდი ჰყავთ საქართველოში. “ვიტ ჯორჯიას” ჰქონდა კარგი მატჩები. თბილისის “დინამოსთან” გასვლით თამაშში მოპოვებული 3 ქულა რად ღირს.

რა თქმა უნდა, იყო მარცხის სიმწარეც, მაგრამ ყველა, თუნდაც წაგებულ თამაშებშიც კი “ვეტერინარები” ბოლომდე იბრძოდნენ.

რატომ შეფერხდა ლოკომოტივი?

საქართველოს ჩემპიონატის კვალობაზე “ლოკომოტივს” ერთ-ერთი საუკეთესო შემადგენლობა ჰყავს. სატურნირო ცხრილში მისი დღევანდელი პოზიცია ამ გუნდის რეალურ ძალას სულაც არ შეესაბამება. 

“რკინიგზელებს” უთუოდ ექნებათ დრო დაშვებული შეცდომების გამოსასწორებლად. გუნდს სათავეში ახალი სამწვრთნელო შტაბი უდგას ლევან კორღალიძის მეთაურობით. ვნახოთ, რა და როგორ იქნება - “ლოკომოტივს” აშკარად აქვს იმის პოტენციალი, რომ ევროსაგზურებისთვის იბრძოლოს.

გადაარჩენს კილასონია რუსთავს?

“რუსთავს” ძალიან უჭირს. ამ ეტაპზე გუნდი უმაღლესი ლიგის დატოვების მთავარი კანდიდატია. კლუბის ხელმძღვანელობამ ერთხელაც ჩააბა სამწვრთნელო ფერხულში რუსთავული ფეხბურთის ცოცხალი ლეგენდა - ვარლამ კილასონია. ვნახოთ, გადაარჩენს თუ არა ის მშობლიურ კლუბს, რომელიც არცთუ დიდი ხნის წინ თავად აღაზევა ქართულ საფეხბურთო ელიტაში.

აქაც სენსაცია

29 წლის ჯაბა უგულავა 8 გოლით ლიდერობს ბომბარდირთა დავას. უგულავა ახალი კაცი არ არის საქართველოს ჩემპიონატში. ის ძირითადად ბოლნისის “სიონთან” ასოცირდება, თუმცა სხვა კლუბებშიც უთამაშია. 

მას აქვს თავდამსხმელისთვის აუცილებელი არაერთი თვისება, მაგრამ, ალბათ, ბევრი ვერ წარმოიდგენდა მის ყოფნას ბომბარდირთა სათავეში. თუ ასე გააგრძელებს, საქართველოს ჩემპიონატს ახალი ბომბარდირი ეყოლება. ჩვენი ჩემპიონატის ერთ-ერთი ინტრიგა ესეცაა. პირველობა ისე მიდის, რომელიმე გამოკვეთილ ბომბარდირ-ლიდერს ნაკლებად ველოდებით. 

ასე ვფიქრობ: ჩემპიონობისთვის ბრძოლასთან ერთად, ბომბარდირობისთვის ბრძოლაც ბოლომდე გაგრძელდება და ფავორიტის დასახელებისგან ამ შემთხვევაშიც თავს შევიკავებთ. შეიძლება, ყველაფერი ბოლო ტურშიც კი გადაწყდეს.

ყოველდღიური სპორტული გაზეთი "ლელო"
910
მკითხველის კომენტარები / 0 /
მსგავსი ამბები
რუბრიკის სხვა სიახლეები
;