აჭარის 25-ე საერთაშორისო ტურნირი მშვილდოსნობაში: ფუტკარაძის სამი მედალი 

ანგისას სასროლეთზე დასრულდა აჭარის 25-ე საერთაშორისო ტურნირი მშვილდოსნობაში, რომელშიც საქართველომ 3 მედალი მოიპოვა - 2 ოქრო და 1 ვერცხლი.

მოლოდინისამებრ, ჩვენგან წარმატებას ქალებმა მიაღწიეს, მათგან კი უფრო აჭარის ნაკრების წევრებმა იყოჩაღეს და სამივე მედალი მათზე მოდის. ჩვენებმა გაიმარჯვეს ქალებში პირად პირველობაშიც და გუნდურშიც, ხოლო შერეულ წყვილებში მეორეზე გავიდნენ. 

აღსანიშნავია, რომ სამივე ნომინაციაში მოიპოვა მედალი აჭარის ნაკრების წევრმა, ხელვაჩაურელმა ციკო ფუტკარაძემ. მან ოქროები ირგუნა პირადსა და გუნდურში, ხოლო შერეულ წყვილებში ასევე ხელვაჩაურელ ანრი ბასილაძესთან ერთად ვერცხლი მოიპოვა. გუნდურში მასთან ერთად ოქროს მედლებს ბათუმელი ნანა მახარაძე და ხელვაჩაურელი ირა არჯევანიძე დაეუფლნენ. 

სასროლეთი იმდენად იყო დატბორილი, რომ შეჯიბრება ერთი საათის დაგვიანებით დაიწყო. 

ჩვენებმა პირველი მედლები შერეულ წყვილებში მოიპოვეს. ბევრისთვის მოულოდნელად, ტურნირის პირველ ოქროს ყაზახური დუეტი - დიანა ტურსუნბეკი და მანსურ ალიმბაევი დაეუფლა. 

ამ დისციპლინაში ჩვენგან ორი დუეტი ჩაება - აჭარისა და თბილისის და ორივეს ყაზახებმა მოუგეს. აჭარის გუნდის შემადგენლობაზე უკვე გითხარით, თბილისური წყვილი კი ორმა მართლაც პერსპექტიულმა ახალგაზრდამ დააკომპლექტა: თემურ მაკიევი (ეს ნაკრების მწვრთნელ გია მაკიევის შვილია) და მედეა გვინჩიძე.

სამაგიეროდ, აჭარულმა დუეტმა გამოავლინა მებრძოლი ხასიათი, თუმცა პირველი წრე მათაც უმძიმეს ბრძოლაში გაიარეს - აზერბაიჯანელებს გადასროლაში მოუგეს: 5:4. ნახევარფინალში მეტოქედ თურქთა პირველი და უძლიერესი წყვილი ჰყავდათ - ეფენ გურკინ მოროში და აისიმა კარაოღლუ. ორივე საკვალიფიკაციო ეტაპის გამარჯვებულია და თანაც დიდი უპირატესობით ჩამოიტოვეს მდევრები. ფავორიტებადაც იქნებ ისინი მიიჩნეოდნენ, მაგრამ ჩვენებმა უდავიდარაბოდ შეძლეს მათი დამარცხება: 5:3. სამწუხაროდ, ფინალში ანალოგიურად ვეღარ იყოჩაღეს და ყაზახებთან 1:5 წააგეს. 

გუნდური შეჯიბრების ფინალში ჩვენი გოგონების მეტოქე თურქეთის ასევე პორველი ნაკრები იყო. შეგახსენებთ, რომ მათ ოლიმპიური მზადების გუნდი ჰყავდათ ჩამოყვანილი, რომელშიც ძირითადად ახალგაზრდები შედიოდნენ, ჩვენი მეტოქე კი პლეი ოფში პირველ ნომრად და სოლიდური უპირატესობით შევიდა. საბედნიეროდ, „ქართულმა სამაიამ“ მათ არათუ არაფერი დაუთმო, შეიძლება ითქვას, საკმაოდ იოლადაც მოუგო - სამივე სეტში აჯობა და 6:0 დაამარცხა. 

როგორც გუშინ გაცნობეთ, ქალებში ოქროს მედლისთვის ციკო ფუტკარაძე და აზერბაიჯანელი იალაღულ რამაზანოვა იბრძოლებდნენ. ეს ფინალი ყველაზე ბოლოს გაიმართა და შვილის საქომაგოდ მშობლებმაც მოიცალეს: საორგანიზაციო საკითხებში ჩაფლული მამა, ნაკრების მთავარი მწვრთნელი თამაზ ფუტკარაძე წინა დღეებში პერიოდულად კი იცლიდა სასროლეთზე მისასვლელად, მაგრამ ამ ფინალის წინ ყველა საქმე გადადო, ხოლო დედა, ნაკრების ერთ-ერთი ლიდერი და მშვილდოსნობის ფედერაციის პრეზიდენტი ხათუნა ფუტკარაძე, მგონი, პირველად გავიდა სასროლეთზე შვილის საქომაგოდ. 

პირველი პერიოდი რამაზანოვამ მოიგო. კიდევ კარგი, ეს მისი ბოლო გაელვება აღმოჩნდა - მომდევნო სამში ფუტკარაძემ აჯობა, 6:2 მოუგო და ჩემპიონიც გახდა. 

ტურნირში დიდი წარმატებით გამოვიდნენ თურქები, თუმცა მათ უფრო ვაჟებში იყოჩაღეს, სადაც ორი ოქრო მოიპოვეს. ისე კი პირად პირველობაში ძალიან გაუჭირდა გამარჯვება საკვალიფიკაციოს მომგებ მოროშს, ვისაც დიდი წინააღმდეგობა გაუწია უკრაინელმა არტემ მელეხოვმა. 

ამ ტურნირში ორ-ორი მედალი მოიპოვეს ყაზახებმა და აზერბაიჯანელებმა, რაც მათთვის კარგი შედეგია. უმედლოდ მხოლოდ სომხები და ლატვიელები დარჩნენ, პოლონელებმა კი მძიმე მშვილდში მოიპოვეს ჯილდოებიც და პრემიებიც. 

აჭარის საერთაშორისო ტურნირი
პირადი პირველობა

ქალები
1. ციკო ფუტკარაძე (აჭარა); იალაგულ რამაზანოვა (აზერბაიჯანი); ბუსე იარენ ატესი (თურქეთი). 

ვაჟები
1. ეფე გურკინ მოროში (თურქეთი); 2. არტემ მელეხოვი (უკრაინა); 3. ალპ აკისი (თურქეთი). 

გუნდური
ქალები
1. საქართველო; 2. თურქეთი I; 3. აზერბაიჯანი

ვაჟები
1. თურქეთი I; 2. თურქეთი II; 3. ყაზახეთი
შერეული წყვილები
1. ყაზახეთი (დიანა ტურსუნბეკი-მანსურ ალიმბაევი); 2. აჭარა (ციკო ფუტკარაძე-ანრი ბასილაძე); 3. თურქეთი (ეფე გურკინ მოროში-აისიმა კარაოღლუ). 
მძიმე მშვილდი

ქალები
1. კატარჟინა ზალანსკა; 2. ბეატა რუტოვსკა (პოლონეთი).

ვაჟები
1. კრჟისტოფ გორჟიცა (პოლონეთი); 2. ბეკტურსუნ ჟომარტი (ყაზახეთი); დმიტრო შუტი (უკრაინა). 

ირაკლი თავაძე
ბათუმი - თბილისი

ყოველდღიური სპორტული გაზეთი "ლელო"
757
მკითხველის კომენტარები / 0 /
მსგავსი ამბები
რუბრიკის სხვა სიახლეები
;