ახალგაზრდა მოფარიკავეთა მსოფლიოს თასი: კაროლმა ოქრომდე არ მიუშვა

სოჭში სამ დღეს გრძელდებოდა ახალგაზრდა მოფარიკავეთა მსოფლიოს თასის გათამაშება, რომელშიც ოთხი ქართველი მოხმალავეც მონაწილეობდა.

შესანიშნავად იასპარეზა ნიკა შენგელიამ. ჯგუფში მან 6-დან ხუთი შეხვედრა მოიგო: დაამარცხა ალი ალ ჯაბაინავი (ერაყი, 5:2), ნიკიტა პრესნოვი (რუსეთი, 5:4), ჰოსეინ მოჰამად აბედინი (ირანი, 5:4), მარტონ ტოტი (უნგრეთი, 5:4) და იუსეფ ალშამლანი (ფიე, 5:4), ხოლო იაპონელ რიოსუკე ტაგაკისთან ერთი ჩხვლეტით დათმო (4:5) პაექრობა და პლეი ოფში გავიდა, სადაც სტარტზე ძია ძინ რეი ზაუს (ჰონკონგი, 15:3) სძლია და მეორე წრეში თანაგუნდელ ვაჟა რეჭიას დაუპირისპირდა.

ამ უკანასკნელმა ჯგუფში მაქსინ პინჩუკს (ბელარუსი, 5:2), პროხორ სვიტიჩს (რუსეთი, 5:3), მაურისი ძიუბლევსკის (პოლონეთი, 5:3) აჯობა, ხოლო მარტინ ნადისა (უნგრეთი, 0:5) და შერზოდ მაუტოვთან (უზბეკეთი, 0:5) დამარცხდა. სამაგიეროდ, პლეი ოფის პირველ წრეში აზიელ მოხმალავესთან რევანში აიღო - 15:7 დაჯაბნა, მეთექვსმეტედფინალში კი შენგელიასთან ვერაფერს გახდა - 10:15.

ნიკამ შემდეგ ზედიზედ ორი მეტოქე ჩამოიშორა გზიდან - ნიკიტა ივანოვი (რუსეთი, 15:9), მოჰამედ ალფადლი (ფიე, 15:12), ნახევარფინალში კი პოლონელ კაროლ ლადემანს ვერ გასცდა - 7:15 და მესამე ადგილით დაკმაყოფილდა.

საქართველოს ახალგაზრდული ნაკრების წევრთაგან სხვებზე სუსტად იხმალავა ნიკოლოზ ჭეიშვილმა: მან ექვსიდან ხუთი ორთაბრძოლა წააგო და მხოლოდ ირანელ ნიმა ზადეხს სძლია - 5:2, მაგრამ ეს ერთი მოგება პლეი ოფში გასასვლელად არ ეყო.

კვარცხლბეკი
1. კონსტანტინ ლოხანოვი (რუსეთი), 2. კაროლ ლადემანი (პოლონეთი), 3. ნიკა შენგელია (საქართველო), ანატოლი კოსტენკო (რუსეთი)... 26. ვაჟა რეჭია (საქართველო)... 67. ნიკოლოზ ჭეიშვილი (საქართველო).

* * *
გოგონებში საქართველოს ღირსებას იცავდა მოხმალვე ლიკა ჯიჯეიშვილი. ჯგუფში მან უზბეკ დილნოზე აბდიევას (5:1) და რუმინელ კერასელა დრაგანს (5:4) დააყრევინა ფარ-ხმალი, ხოლო რუსებთან - ანა სმირნოვასთან (1:5), ალინა მიხაილოვასთან (1:5), ანა კუდრიაევასთან (25), ელიზავეტა კურზინასა (4:5) და პლეი ოფში ისევ კუდრიაევასთან (9:15) დამარცხდა და 26-ე ადგილი დაიკავა.

გუშინ ასპარეზობის ბოლო დღეს გუნდური პაექრობები გაიმართა. შეჯიბრებაში 12 ქვეყნის წარმომადგენლები ჩაებნენ. ჩვენებმა (შენგელია, რეჭია, ჭეიშვილი) სტარტზე ყაზახებს მოუგეს - 45:43, იაპონელებთან კი 36:45 დათმეს შეხვედრა. V-VIII ადგილებისთვის ბრძოლაში რუმინელებს 45:43 სძლიეს, ბელარუსებთან კი 40:45 დამარცხდნენ და მე-6 ადგილზე გავიდნენ.

კვარცხლბეკი
1. რუსეთი, 2. უნგრეთი, 3. იაპონია... 6. საქართველო

ყოველდღიური სპორტული გაზეთი "ლელო"
461
მკითხველის კომენტარები / 0 /
მსგავსი ამბები
რუბრიკის სხვა სიახლეები