ახალგაზრდული ოლიმპიადა. ილია სულამანიძემ ფინალში, დამატებითში 7.15 წუთი იჭიდავა და... ვერცხლი

ძიუდოისტი ილია სულამანიძე (100) ბუენოს აირესში მიმდინარე მესამე ახალგაზრდული ოლიმპიური თამაშების ვიცე-ჩემპიონია.

ჩვენმა ფალავანმა ფინალური შეხვედრა, რომელიც დამატებით დროში, 7.15 წუთი გაგრძელდა, ვაზარით წააგო ყაზახ ბეკარის სადუაკასთან.

სულამანიძეს ყველაზე ძლიერი მეტოქე ნახევარფინალში შეხვდა - ჭაბუკებში ევროპის წლევანდელი ფინალისტი ომერ აიდინი, თუმცა მას საკმაოდ დამაჯერებლად, ვაზარით აჯობა და ფინალში გავიდა, სადაც მისი მეტოქე ყაზახი ბეკარის სადუაკა აღმოჩნდა. ეს შეხვედრაც დამატებით დროში გაგრძელდა და მარათონული გამოდგა - 7.15 გაგრძელდა, საბოლოოდ კი გამარჯვება ვაზარით ყაზახს დარჩა.

მთლიანობაში, სულამანიძის გამოსვლა მაინც დადებითად უნდა შევაფასოთ. ახლა იმის თქმაც შეიძლება, რომ თავის დროზე გიორგი ყიზილაშვილმაც სწორი არჩევანი გააკეთა, როცა მთელი გუნდიდან ერთი ჰყავდა ამოსარჩევი და ყურადღება სულამანიძეზე შეაჩერა. შეგახსენებთ, რომ ამ ბიჭმა წლეულს ევროპის ჩემპიონატზე ბრინჯაოც მოიპოვა.

ამდენად, საქართველოს დელეგაციის ანგარიშზე უკვე ორი მედალია - თითო ვერცხლი და ბრინჯაო.

ყოველდღიური სპორტული გაზეთი "ლელო"
933
მკითხველის კომენტარები / 0 /
მსგავსი ამბები
რუბრიკის სხვა სიახლეები