ახალგაზრდული ოლიმპიური თამაშები. გუნდი ბუენოს აირესში გააცილეს

გუშინ საქართველოს ეროვნული ოლიმპიური კომიტეტის შტაბ-ბინაში არგენტინაში, მსოფლიოს მესამე ახალგაზრდულ თამაშებში მონაწილეთა გაცილების საზეიმო ცერემონიალი გაიმართა, გუნდი კი დღეს გაფრინდება სამხრეთ ნახევარსფეროში.

მესამე ახალგაზრდული ოლიმპიური თამაშები ბუენოს აირესში სტარტს 6 ოქტომბერს აიღებს, რომელიც სპორტის 32 სახეობას მოიცავს. სულ გათამაშდება მედლების 241 კომპლექტი, თამაშებში კი მონაწილეობას მსოფლიოს 178 ქვეყნის 4 000-მდე სპორტსმენი მიიღებს.

საქართველოს დელეგაცია შედარებით მოკრძალებული იქნება - 15 სპორტსმენით სპორტის 10 სახეობაში გამოვალთ. ესენია ჭიდაობა, ძიუდო, 3X3 კალათბურთი, მხატვრული ტანვარჯიში, ძალოსნობა, მძლეოსნობა, ტყვიის სროლა, თანამედროვე ხუთჭიდი, ტაეკვანდო და ჩოგბურთი.

კონკრეტულ მონაწილეთა სიას სახეობების მიხედვით ქვემოთ იხილავთ და ნახავთ, რომ ინდივიდუალურ სახეობებში ყველაზე მეტი წარმომადგენელი ჭიდაობას ეყოლება - 3, თუმცა აქ ორივე სახეობაა გაერთიანებული. ზოგადად, საჭიდაო სახეობებში კვოტები მოქმედებდა - ქვეყნიდან, მაქსიმუმ, 2 წარმომადგენელი იყო დაშვებული და იქაც გენდერული ბალანსი უნდა ყოფილიყო დაცული ანუ ერთი ბიჭი და ერთიც გოგო.

სწორედ ამიტომაა ძიუდოში 1 სპორტსმენი - მხოლოდ ბიჭებში, გოგონებმა კი ამჯერად ვერ შეძლეს საგზურის მოპოვება. ჭიდაობაში ჩვენთვის გამონაკლისი დაუშვეს და ორივე კვოტა ბიჭებზე მოგვცეს, თუმცა თავისუფალ ჭიდაობაში გაგვიმართლა კიდეც: თქვენ წარმოიდგინეთ და, ჭაბუკთა ევროპის ჩემპიონატის შემდეგ, რომელიც სალიცენზიო შეჯიბრება იყო, ჭიდაობის მსოფლიოს ფედერაციას... შეეშალა საგზურების გადანაწილება და შეცდომით ჩვენ მოგვცეს. მოგვიანებით შეცდომა აღიარეს, მაგრამ საგზური არ წაგვართვეს.

წლევანდელ თამაშებში პირველად გამოვალთ გუნდურ სახეობაში - კალათბურთში. ამ სიაში სწორედ მათი გამოჩენაა ყველაზე დიდი მოულოდნელობა.

არანაკლები მოულოდნელობაა ხუთჭიდის ლიცენზიაც ჩვენში სპორტის ამ სახეობის სადღეისო მდგომარეობიდან გამომდინარე. ფრიად "ნატანჯია" ძალოსანთა ლიცენზია.

ამ სახეობაში გუნდური შედეგების მიხედვით გაიცემოდა საგზურები და ჩვენებმა ჯერ კიდევ შარშან მოიპოვეს 1 ლიცენზია, თუმცა მოგვიანებით ევროპის უცხოელი ვიცე-ჩემპიონი დოპინგზე ჩავარდა. მისი ვერცხლი ბრინჯაოს მედალოსანს გადაეცა, ბრინჯაო კი - მეოთხეზე გასულ იტალიელს. ამით იტალიამ გუნდურ ჩათვლაში მცირედით გადაგვასწრო და ის საგზურიც მათ დარჩათ, ჩვენ კი ჩამოგვერთვა.

თუმცა მაღალი დონის პროფესიონალების ხელში აღმავლობის გზაზე მდგომ ქართულ ძალოსნობას არ გასჭირვებია მისი დაბრუნება - ევროპის წლევანდელ ჭაბუკთა ჩემპიონატში ულიცენზიოთა ტურნირში გუნდური პირველობა მოიპოვა, ოღონდ ამჯერად გუნდებზე მხოლოდ თითო საგზური იყო გათვლილი.

ახლანდელი თამაშები სახეობების რაოდენობითაც გაზრდილია, მონაწილეთა რიცხოვნობითაც და შედეგების მოლოდინითაც გამორჩეულია. ანალოგიურ წინა ორ თამაშებში სულ 4 მედალი გვაქვს მოპოვებული და ყველა საჭიდაო სახეობებში - 2-2 ვერცხლი და ბრინჯაო.

2010 წელს სინგაპურში გამართულ პირველ თამაშებში სპორტის მხოლოდ სამ სახეობაში გამოვდიოდით 5 სპორტსმენით და ბრინჯაო მოვიპოვეთ, რაც თავისუფალ ჭიდაობაში ირაკლი მოსიძემ შეძლო. 2014 წელს ჩინურ ნანძინში გამართულ მეორე თამაშებზე უკვე 7 სახეობაში გამოვედით 12 სპორტსმენით, რომლებმაც 3 ჯილდო - 2 ვერცხლი და 1 ბრინჯაო მოინადავლეს. ვიცე-ჩემპიონები ძიუდოისტი თამაზ კირაკოზაშვილი და თავისუფალ სტილში მოჭიდავე მექი სიმონია გახდნენ, მესამეზე კი მისი თანაგუნდელი ივერიკო ჯულაყიძე გავიდა.

როგორც ვხედავთ, ამ ღონისძიებაში აქამდე ძირითადად მოჭიდავეთა იმედად ვიყავით, ახლა კი გაცილებით მეტის იმედი გვაქვს. სროლაში ფედერაციას გაუჭირდა კიდეც არჩევანის გაკეთება ორ კანდიდატს შორის - ნინო ხუციბერიძე ახალგაზრდებში ევროპის ვიცე-ჩემპიონია და წლეულს თანატოლებში სერბეთის გრან პრი მოიგო, ხოლო მსოფლიოს ჩემპიონატზე ფინალში შევიდა, ლიზი კილაძე კი ახალგაზრდებში მსოფლიოს მესამე პრიზიორიც გახდა.

თუმცა მას წლეულს სკოლის გამოსაშვები თუ ეროვნული გამოცდების გამო ვარჯიშებიც გაუცდა, თან კანდიდატის დასახელების ვადაც იწურებოდა და ფედერაციამ არჩევანი ხუციბერიძეზე შეაჩერა. მით უფრო, რომ თავის დროზე საგზურიც მან მოიპოვა.

ძლიერი დესანტი გვეყოლება ჭიდაობაშიც, თუმცა იქ ყველა ასეთივე ტიტულოვანი იქნება, რადგან შერჩევის მკაცრი კრიტერიუმი იყო და კონტინენტური პირველობების ფინალისტებს იწვევდნენ მხოლოდ. თოხაძე და ჩხიკვაძე ევროპის ფინალისტები არიან, მსოფლიოზე კი უმედლოდ დარჩნენ. გეგელაშვილმა ევროპირველობაზეც და მსოფლიოზეც ბრინჯაოს მედლები მოიპოვა.

როგორც გითხარით, გუშინ ამ ნაკრებს გაცილების საზეიმო ცერემონიალი მოუწყვეს, რომელსაც სეოკ-ის პირველი ვიცე-პრეზიდენტი ელგუჯა ბერიშვილი უძღვებოდა. ოლიმპიელთა სახელით ოლიმპიური ფიცი ტანმოვარჯიშე ქეთევან არბოლიშვილმა დადო. იქვე მოეწყო ახალი ფორმების ჩვენებაც, მონაწილენი კი საზოგადოებას მისიის ხელმძღვანელმა ნინო სალუქვაძემ წარუდგინა. სპორტსმენებს მიესალმნენ სეოკ-ის პრეზიდენტი ლერი ხაბელოვი, განათლების, მეცნიერების, კულტურისა და სპორტის მინისტრის მოადგილე შალვა გოგოლაძე, ძალოსნობის ფედერაციის პრეზიდენტი კახი კახიაშვილი და სეოკ-ის პარტნიორ "საქართველოს ბანკის" საზოგადოებასთან ურთიერთობის დირექტორი ხათუნა კაკაბაძე.

რაც შეეხება არგენტინაში წამსვლელ დელეგაციას, მწვრთნელ-სპორტსმენთა ჩათვლით, მასში სულ 36 კაცი შედის. როგორც გითხარით, მისიის ხელმძღვანელი ნინო სალუქვაძეა, ვინც ხუციბერიძის მწვრთნელობასაც შეითავსებს, ადმინისტრაციულ პერსონალში კი რუსუდან აფციაურიც შედის.

დასასრულს გეტყვით, რომ არგენტინაში თამაშებზე ორგანიზატორებმა მწვრთნელთან ერთად ჭაბუკ ტაილანდელ ფეხბურთელთა ის გუნდიც მიიწვიეს, ამ ზაფხულს - ივნისში ხაო ლუანგის მღვიმეში წყალდიდობის გამო ორი კვირა, ფაქტობრივად, ტყვეობაში რომ გაატარეს. მათი გამოხსნის რთულ ოპერაციას მთელი მსოფლიო გაფაციცებით ადევნებდა თვალს. საბედნიეროდ, მაშველებმა ყველა მოზარდი უვნებლად გადაარჩინეს, თუმცა, სამწუხაროდ, ერთ-ერთი ყველაზე გამოცდილი მაშველი დაიღუპა - მღვიმეში მერამდენედ შებრუნებულს საჰაერო ბალონმა უღალატა.

ბერძნულ-რომაული ჭიდაობა
1. გიორგი თოხაძე (51)
2. გიორგი ჩხიკვაძე (60)
მწვრთნელი: ვაჟა კრავეიშვილი

თავისუფალი ჭიდაობა
1. გიორგი გეგელაშვილი (48)
მწვრთნელი: ვაჟა კრავეიშვილი

ძიუდო
1. ილია სულამანიძე (100)
მწვრთნელი: გიორგი ყიზილაშვილი

მძლეოსნობა
1. გიორგი კეკიშვილი (უროს ტყორცნა)
მწვრთნელი: დავით კეკიშვილი

ძალოსნობა
1. არჩილ მალაყმაძე (69)
მწვრთნელი: ზურაბ ანთაური

ჩოგბურთი
1. ანა მაქაცარია
მწვრთნელი: კონსტანტინ ბოლდირევი
თანამედროვე ხუთჭიდი
1. გაგა ხიჯაკაძე
მწვრთნელი: კახა გოცირიძე

ტაეკვანდო
1. ზურაბ კინწურაშვილი (48)
მწვრთნელი: გიორგი ბერაია

მხატვრული ტანვარჯიში
1. ქეთევან არბოლიშვილი
მწვრთნელი: ბელა კობალაძე

ტყვიის სროლა
10 მეტრი, პნევმატური პისტოლეტი
1. ნინო ხუციბერიძე

კალათბურთი
1. ლუკა მაზიაშვილი
2. ოთარ პერტაია
3. ზურაბ ჟღენტი
4. ლაშა მიქელაძე
მწვრთნელი: გრიგოლ გურგენიძე

ყოველდღიური სპორტული გაზეთი "ლელო"
753
მკითხველის კომენტარები / 0 /
მსგავსი ამბები
რუბრიკის სხვა სიახლეები
;