ახალგაზრდული ოლიმპიური ფესტივალი: წარუმატებელი დღე ბაქოში

გუშინ საქართველოს დელეგაცია ბაქოში მიმდინარე ევროპის ახალგაზრდულ ოლიმპიურ ფესტივალზე უმედლოდ დარჩა. ასევე უმედლო დღე ჰქონდათ ჩვენს ძიუდოისტებსაც - ტატამზე გასული სამივე ქართველი ნაადრევად გამოეთიშა შეჯიბრებას. 

ელგუჯა ჭინჭარაშვილმა (66) პირველ შეხვედრაში ლიეტუველი პიიუს მიკალაუსკასი აშკარად დაჯაბნა - ჯერ ვაზარი აუღო, მერე კი წმინდადაც დაამარცხა, თუმცა მომდევნო შეხვედრაში ვერაფერს გახდა მასპინძელ მატინ რზაზადესთან და თავად დატოვა ტატამი იპონით წაგებულმა. მას სანუგეშოში გადასვლის საშუალება აღარ მიეცა, თუმცა კვარცხლბეკზე ქართველი მაინც ვიხილეთ - მესამე ადგილზე საბერძნეთის სახელით მოჭიდავე მიხეილ ჩუტლაშვილი გავიდა. 

გიორგი იანტბელიძემ (73) ორი შეხვედრა მოიგო: ავსტრიელ სებასტიან დენგსაც და მოლდოველ დან სტანილასაც იპონით აჯობა (დენგს ვაზარიც აართვა), მაგრამ მეოთხედფინალში ვაზარით დამარცხდა თურქ მუსა სიმსეკთან. სამწუხაროდ, მან ვერც სანუგეშოში იყოჩაღა და პირველივე შეხვედრა დათმო ჰოლანდიელთა მომავალ მესამე პრიზიორ ხელე ვან ტაილინგენთან. 

გუშინ გოგოებში მარიამ ლაფაჩიშვილმაც (52) იჭიდავა, მაგრამ პირველივე ორთაბრძოლა დათმო უკრაინელ ვლადისლავა სნიტკოსთან. 
დღეს ოლიმპიურ ფესტივალზე პირადი პირველობის ბოლო დღეა, ჰეიდარ ალიევის სახელობის არენაზე კი ოთხი ქართველი იჭიდავებს. აკაკი ჯაფარიძე (81) პირველ წრეში ისვენებს და თვალს ჩეხი მარტინ ივანკასა და პორტუგალიელი პედრო ლიმას პაექრობას მიადევნებს, რომელშიც მისი პირველი მეტოქე გამოვლინდება.

იმათ გამარჯვებულს თუ მოუგებს, მეოთხედფინალშიც გავა, სადაც ჰოლანდიელი იან ვან ჰერკისა და სლოვაკ სამუელ რეტის დუეტიდან უძლიერესს შეხვდება. 

ჭაბუკებში ევროპის წლევანდელი მესამე პრიზიორი თორნიკე ფოლადიშვილი (90) მეორე წრიდან ჩაებმება შეჯიბრებაში, სადაც რუს ადამ სანგარიევს დაეჭიდება. მას თუ მოუგებს, მეოთხედფინალის საგზურს გაინაღდებს, იქ კი ამ სამი მეტოქიდან უძლიერესი ეყოლება კონკურენტად: ესტონელი კარლ ტურკ პრილინი (ამას ევროპის ჩემპიონატზე მოუგო), ლიეტუველი მარიუს მიტროჩინასი ან ბელგიელი ზაკარია იამაიგნე. 

პირველ წრეში თავისუფალია ჭაბუკებში ევროპის მოქმედი ჩემპიონი გიგა ტატიაშვილიც (+90) - მეოთხედფინალშია გასული. იქ მისი მეტოქე ლატვიელი ალექსის ივაშენკო ან მოლდოველი ალინ ბაგრინი იქნება. 

გოგოებში დღეს მხოლოდ ერთი მონაწილე - გვანცა სომხიშვილი (+70) გვეყოლება. ის პირველ შეხვედრას რუმინელ გეორგიანა მილერთან ჩაატარებს. ამ ჯგუფში მეორე წყვილს ჰოლანდიელი კარმენ დიკსტრა და ბულგარელი ირინა ჟელეზარსკა შეადგენენ. 

კვირას ბაქოში გუნდური პირველობა ჩატარდება, ნაკრებები კი კვლავაც შერეული პრინციპით დაკომპლექტდებიან. 

რაც შეეხება საერთო გუნდურ ჩათვლას ახლგაზრდულ ოლიმპიურ ფესტივალზე, საქართველომ გუშინდელი წარუმატებელი დღის შემდეგ მე-18 ადგილზე გადაინაცვლა. შეგახსენებთ, რომ ჩვენს ყულაბაში 9 მედალია - 1 ოქრო და 4-4 ვერცხლ-ბრინჯაო, თუმცა დიდი იმედია, რომ დღეს ეს მონაგარი მკვეთრად გაუმჯობესდება. 

ყოველდღიური სპორტული გაზეთი "ლელო"
238
მკითხველის კომენტარები / 0 /
მსგავსი ამბები
რუბრიკის სხვა სიახლეები
;