ახალი აუზი ახალი თაობისთვის

22-წლიანი იძულებითი შესვენების შემდეგ შარშან სახელოვანი ტრადიციების მქონე წყალბურთის კლუბი "დინამო" აღორძინდა. მისი დამფუძნებლები არიან საქართველოს ნაკრების წევრები - გიორგი ხვედელიანი, ზურაბ რურუა და მიხეილ ბაღათურია. მას შემდეგ წელიწადიც არ გასულა და "დინამომ" ჩვენთან სპორტის ამ სახეობის განვითარებას ახალი იმპულსი შესძინა.

რაც დრო გადის, კლუბი უფრო და უფრო შლის ფრთებს. დასტურად გუშინდელი დღეც გამოდგება: ბაგებში "სილიკონი ველის" ტერიტორიაზე ახალი სასპორტო კომპლექსი გაიხსნა, რომელიც საამართავად წყალბურთის კლუბ "დინამო თბილისის" აკადემიას გადაეცა. კომპლექსი აერთიანებს ერთ 25-მეტრიან აუზს ოთხი ბილიკითა და საჭყუმპალაოს (10X5), ასევე, ტანვარჯიშის დარბაზს ფიზიკური მომზადებისთვის.

აქ 3-დან 13 წლამდე 600-ზე მეტ მოზარდს შვიდი მწვრთნელი მოემსახურება, რომელებიც ცურვისა და წყალბურთის სწავლებას საერთაშორისო სტანდარტების შესაბამისად წარმართავენ. ბავშვთა სავარჯიშო სპორტული პროგრამები მოწვეულმა უცხოელმა ექსპერტებმა და ქართველმა სპეციალისტებმა ერთობლივად შეიმუშავეს და მათს განხორციელებაში მწვრთნელებთან ერთად საქართველოს წყალბურთელთა და მოცურავეთა ეროვნული ნაკრები გუნდების წევრებიც ჩაერთვებიან.

სასპორტო კომპლექის გახსნის ცერემონიაში მონაწილეობდნენ კულტურისა და სპორტის მინისტრი მიხეილ გიორგაძე, მინისტრის პირველი მოადგილე კახი კანდელაკი, მოადგილე შალვა გოგოლაძე, სპორტის პოლიტიკისა და მართვის დეპარტამენტის უფროსი ირაკლი დოლაბერიძე, საწყლოსნო სახეობათა ეროვნული ფედერაციის პრეზიდენტი დავით რურუა, "დინამო თბილისის" დამფუძნებლები, ჟურნალისტები, მწვრთნელები და ნორჩი სპორტსმენები.

გიორგი ხვედელიანი:

- "დინამო თბილისის" ძირითადი ბაზაა საწყლოსნო კომპლექსი "ოლიმპიკი", სადაც მთავარი გუნდი ვარჯიშობს. ბავშვთა აკადემიის აღსაზრდელები კი "ტონუსისა" და "არენა-2-ის" აუზებში ოსტატდებიან. დღეს მათს რიგებს კიდევ ერთი კომპლექსი შეემატა, რამაც ძალიან გაგვახარა. იმედია, მსგავსი ობიექტების რაოდენობა უფრო იმრავლებს და არა მარტო თბილისში.

დავით რურუა:

- ეს სასპორტო კომპლექსი საქართველოს საწყლოსნო სახეობათა ეროვნული ფედერაციისთვისაც დიდი შენაძენია, რადგან აქ ცურვასა და წყალბურთში მოზარდები ივარჯიშებენ და მომავალი ჩემპიონები დაფრთიანდებიან. ჩვენ აუცილებლად გვჭირდება ღირსეული ცვლა. ვიმედოვნებ, რომ ეს კომპლექსი საწყლოსნო სახეობების განვითარებაში დიდ წვლილს შეიტანს და სხვებისთვისაც მაგალთი გახდება.

მიხეილ გიორგაძე:

- მიხარია, რომ თბილისში "სილიკონ ველის" ტერიტორიაზე ახალი სასპორტო კომპლექსი გაიხსნა ორი საცურაო აუზთა და ერთ სავარჯიშო დარბაზით. კომპლექსი გადაეცემა "დინამო თბილისის" აკადემიას. მინდა მადლობა გადავუხადო კერძო სექტორს, რომელიც აქტიურად არის ჩართული სპორტული ინფრასტრუქტურის განვითარებაში. ეს ჩვენთვის უაღრესად მნიშვნელოვანია, რადგან სპორტის ხელმისაწვდომობა, მასობრიობის გაზრდა, ცხოვრების ჯანსაღი წესის პოპულარიზაცია-დამკვიდრება სამინისტროს ერთი-ერთი პრიორიტეტია და სასიამოვნოა, რომ ბავშვებს ასეთ კომფორტულ პირობებში ვარჯიშის საშუალება ექნებათ. როგორც ყოფილ დინამოელს, მიხარია, რომ აღორძინებულ თბილისის "დინამოს" დიდი პერსპექტივები აქვს და წარმატებები მინდა ვუსურვო.

ყოველდღიური სპორტული გაზეთი "ლელო"
13816
მკითხველის კომენტარები / 0 /
მსგავსი ამბები
რუბრიკის სხვა სიახლეები
;