ახალი და უმნიშვნელოვანესი პროექტი: ახალგაზრდების უცხოური სპარინგები

უცხოეთში ქართველი ბავშვების გამგზავრების, იქ სპარინგების გამართვისა და გამოცდილების მიღების შესახებ ბოლო დღეებში ვწერდით და დაგვეთანხმებით, საინტერესო თემაა. თბილისის “დინამოსა” და “საბურთალოს” გარდა, ანალოგიურ პრაქტიკას კიდევ ორმა გუნდმა მიმართა...

აქ მთავარი სხვა რამააა და მეტ ყურადღებასაც ამიტომ იმსახურებს, ვიდრე უცხოეთში გუნდების უბრალო წასვლა: ფეხბურთის განვითარების ფონდის ახალი პროექტის თანახმად, ოქროს ლიგის გამარჯვებულებმა და ვერცხლის მედლების მფლობელებმა ჯილდოდ ზამთარში სპარინგმატჩების გასამართავი ფულადი პრემიები მიიღეს. ფაქტია, გამარჯვებულები ამ სიკეთით უკვე სარგებლობენ.

თბილისის “დინამო” უცხოურ შეკრებაზე არა მხოლოდ მთავარი გუნდით, არამედ, ასაკობრივი ლიგების წარმომადგენლებთან ერთად გაემგზავრა. შეგახსენებთ, თბილისელთა 17 და 19-წლამდელი გუნდები თურქულ შეკრებაზე არიან. გოჩა ჩიქოვანისა და ვლადიმერ კაკაშვილის შეგირდები ანტალიაში 10 დღე დარჩებიან და მზადების პარალელურად, 3-3 ამხანაგურ მატჩსაც ჩაატარებენ.

17-წლამდელები 20 თებერვალს შვეიცარიულ “უსტერს” შეხვდებიან, 23 თებერვალს - დანიურ “როსკილდეს”, ხოლო 26 თებერვალს გასამართავი სპარინგისთვის მეტოქეს ადგილზე დააზუსტებენ. 19-წლამდელებიც იმავე დღეებში ითამაშებენ. კაკაშვილის გუნდის პირველი მეტოქე ადგილობრივი “ანტალიასფორი” იქნება, შემდეგ - ნორვეგიული “ნორდსტრანდი”, ბოლოს კი - ყაზახური “ტობოლი 2”.

“დინამოს” 15-წლამდელთა შემადგენლობა კი კვიპროსის ქალაქ ლარნაკაშია. ვახტანგ იაგორაშვილის გუნდი კუნძულზე ერთი კვირა დარჩება და მზადების პარალელურად ამხანაგურ მატჩებს ჩაატარებს. დინამოელები ფამაგუსტის “ანორთოსისს” შეხვდნენ და 10:0 დაამარცხეს. 5 გოლი ჯადული იობაშვილმა გაიტანა, დანარჩენი ხუთიც ომარ თოდუას, საბა გეგიაძის, თორნიკე მოლაშვილის, თემურ დევიძისა და აჩიკო დათუნაშვილის ანგარიშზეა. 20 თებერვალს ლურჯ-თეთრები ასევე ფამაგუსტის “ნეა სალამინასთან” ითამაშებენ, ხოლო 22 თებერვალს ლარნაკას აეკ-თან მოსინჯავენ ძალებს.

შეგახსენებთ, რომ “დინამოს” 15 და 17-წლამდელთა გუნდები “ოქროს ლიგის” ბოლო გათამაშების გამარჯვებულია, ხოლო 19-წლამდელთა კრებული ვერცხლის მედლების მფლობელია.

ასევე მოხდა “საბურთალოს” შემთხვევაში. გუნდი თურქეთში სარეზერვო, 17 და 16- წლამდელებით გაემგზავრა. “საბურთალო 2” ამხანაგურად ყაზახეთის პირველი ლიგის “კიზილჟართან” 0:3 დამარცხდა. 17 და 16-წლამდელები დანიის “როსკილდეს” თანატოლებს დაუპირისპირდნენ. 2002-წლიანებმა 5:1 მოიგეს, ხოლო 2003 წელს დაბადებულებმა მეტოქეს 5 უპასუხო ბურთი გაუტანეს. “საბურთალოს” ჭაბუკთა გუნდებმა თურქულ შეკრებაზე 3-3 ამხანაგური მატჩები გამართეს და სამშობლოში ხვალ დაბრუნდებიან.

ეს ყოველივე კი იმიტომაა საჭირო, რომ ჩვენმა ბავშვებმა თავიდანვე ისწავლონ სეზონისთვის პროფესიული მზადება, გაიგონ, რა დონის მეტოქეეები ჰყავთ და საერთოდ, თავიდანვე მიხვდნენ, ვისთან და სად მოუწევთ დაპირისპირება. ასეთი რამ ჩვენს ფეხბურთში არასოდეს მომხდარა, ბოლო 20 წელი გუნდების უმრავლესობა საკუთარ წვენში იხარშებოდა და ცუდი შედეგები, გარკვეულწილად, ამასაც უკავშირდება. ამიტომაა ბავშვების უცხოეთში თამაშები უმნიშვნელოვანესი ამბავი - თუკი ასე გაგრძელდება წლების განმავლობაში, ეს პროექტი თავის შედეგს აუცილებლად მოიტანს.

ყოველდღიური სპორტული გაზეთი "ლელო"
770
მკითხველის კომენტარები / 0 /
მსგავსი ამბები
რუბრიკის სხვა სიახლეები
;