ახალი ინტრიგა: რონალდომ მოურინიო... იუვენტუსში მიიწვია?

ჟოზე მოურინიომ, რომელიც ახლა უმუშევარია და ექსპერტობით იქცევს თავს, BeIN Sports-ის ეთერში საინტერესო განცხადება გააკეთა და ეჭვებში ჩააგდო მედია. ახლა ხომ ის პერიოდია, როცა ყველა თავმოყვარე ჟურნალისტი ტყავში ძვრება, რომ გაიგოს, სად იმუშავებს მოურინიო ახალი სეზონიდა:

"ერთ-ერთმა ფეხბურთელმა, ვისთანაც ძალიან ახლო ურთიერობა მაქვს, მითხრა - შეგიძლია მოხვიდე აქ მომავალი სეზონიდანო. მაგრამ მე ვუპასუხე - იმ გუნდში, სადაც შენ ხარ, მე არავის ვუყვარვარ-მეთქი. შენ მოდი, სამი თამაში მოიგე და მაშინვე შეგიყვარებენო, მითხრა...

ასეა, ჩვენ პროფესიონალები ვართ და პატივს ვცემთ ერთმანეთს. შეიძლება, ხანდახან მოედანზე კარგად არ ვიქცევით, ან პრესკონფერენციაზე ნეგატიური რეაქციები გვაქვს, მაგრამ ჩვენ ერთი ინდუსტრიიდან ვართ და კარგად გვესმის ერთმანეთის", - თქვა მოურინიომ და მედია საგონებელში ჩააგდო.

რა თქმა უნდა, მაშინვე დაიწყო მარჩიელობა - რომელი ფეხბურთელი იგულისხმა მოურინიომ? ერთ-ერთი მათგანი, ვისთანაც მას ძალიან კარგი ურთიერთობა აქვს, კრიშტიანო რონალდოა. ამ ლოგიკას თუ გავყვებით, გამოდის, რომ ყოფილი შეგირდი მას "იუვენტუსში" უხმობს. მაგრამ აქვს კი რონალდოს იმხელა წონა, რომ მოურინიოს შეთავაზება გაუკეთოს?

და კიდევ - რაც შეეხება იმას, რომ მოურინიო "იმ" კლუბში არავის უყვარს (როგორც თავად ამბობს), აქაც შეიძლება ვიგულისხმოთ "იუვენტუსი". მოურინიო იყო "ინტერის" მწვრთნელი, რომელიც "იუვესთვის" ისტორიული მტერია. ასე რომ, ძალიანაც ნუ გაგვიკვირდება, თუ მართლა "იუვენტუსზეა" ლაპარაკი...

877
მკითხველის კომენტარები / 0 /
მსგავსი ამბები
რუბრიკის სხვა სიახლეები
;