ახალი მწვრთნელები: ვესტ ბრომვიჩში პარდიუ, ევერტონში ელერდაისი

"ვესტ ბრომვიჩის" ახალ მთავარ მწვრთნელად ალან პარდიუ დაინიშნა, - იტყობინება კლუბის პრესსამსახური. 56 წლის სპეციალისტთან ორწლინახევრიანი კონტრაქტი გაფორმდა.

გასულ კვირას, "ვესტ ბრომვიჩმა" მთავარი მწვრთნელის პოსტიდან დაითხოვა ტონი პულისი. მის მოვალეობებს დროებით გარი მეგსონი ასრულებდა. ბოლო კლუბი, რომელსაც პარდიუ ავარჯიშებდა, "კრისტალ პალასი" იყო 2015-16 წლების სეზონში. წლევანდელი სეზონის დასაწყისში ის ტელევიზიაში მოეწყო სამუშაოდ.

როგორც ირკვევა, პარდიუს შტაბში შევა ჯონ კარვერი. ადრე ისინი ერთად მუშაობდნენ "ნიუკასლში". შეგახსენებთ, რომ "ვესტ ბრომვიჩი" მე-16 ადგილზეა პრემიერლიგაში და 14 მატჩში 12 ქულა აქვს მოგროვილი.

* * *
გუშინვე გაირკვა, რომ "ევერტონის" ახალი მწვრთნელი 63 წლის სემ ელერდაისია. ინგლისის ნაკრების ყოფილი თავკაცი "ირისებმა" წელიწადში 6 მილიონ გირვანქად დაიქირავეს.

"დიდმა სემმა" განაცხადა, რომ იანვრის სატრანსფერო ბაზარზე კლუბმა ახალი ფორვარდი უნდა იყიდოს, რათა რომელუ ლუკაკუს "მანჩესტერში" გადასვლით გაჩენილი ვაკუუმი შეავსოს. როგორ ჩანს, სწორედ ეს იყო ელერდაისის მთავარი პირობა მოლაპარაკებების პროცესში.

მისი დებიუტი მომავალ უქმეებზე, "ჰადერსფილდთან" საშინაო მატჩში შედგება, გუშინ კი "ვესტ ჰემთან" შეხვედრაში გუნდს კვლავ დევიდ ანსუორთი ხელმძღვანელობდა...

ყოველდღიური სპორტული გაზეთი "ლელო"
304
მკითხველის კომენტარები / 0 /
მსგავსი ამბები
რუბრიკის სხვა სიახლეები