ახალი პერსპექტივა ხარაიშვილისთვის

გიორგი ხარაიშვილი შვედეთის საფეხბურთო ჩემპიონატის წლის სიმბოლურ ნაკრებში დასახელებამ ძალიან გაახარა. "ლელომ" (lelo.ge) უკვე გაცნობათ, რომ საქართველოს ნაკრების ნახევარმცველი ალსვენსკანის (მთავარი ლიგა) წლის 11 რჩეულს შორის ფეხბურთის სტატისტიკის საერთაშორისო ვებგვერდმა, "სოფასქორმა" დაასახელა.

 "გიოტებორგის" ქართველ ლიდერს წლის სიმბოლურ ნაკრებში მოხვედრა ახარებს განსაკუთრებით იმ ფონზე, მისმა გუნდმა ჩემპიონატში მხოლოდ მე-7 ადგილი დაიკავა:

"შვედეთის ჩემპიონატი სუსტი ნამდვილად არ არის და აქედან გამომდინარე, წლის სიმბოლურ ნაკრებში დასახელება ჩემთვის დიდი პატივი და ძალიან სასიხარულო ამბავია. ისიც გასათვალისწინებელია, რომ "გიოტებორგი" ჩემპიონატში მხოლოდ მე-7 ადგილზე გავიდა და ამ პოზიციიდან სიმბოლურში დასახელება უფრო რთული იყო", - გვითხრა ხარაიშვილმა.

რაც შეეხება მომავალს, ცხადია, ასეთი აღიარება 23 წლის ფეხბურთელს გზას უნდა უხსნიდეს უკეთეს ლიგისკენ. შვედეთის ჩემპიონატს ევროპელი სელექციონერები ყოველთვის ყურადღებით აკვირდებოდნენ, რადგან სხვადასხვა დროს იქ უამრავი საინტერესო მოთამაშე აღმოუჩენიათ...

ხარაიშვილიც ამას იმედოვნებს: "დიახ, მეც მაქვს ამის იმედი, რომ მსგავსი აღიარება წინსვლის პერსპექტივას აჩენს. მაგრამ ჯერ კონკრეტული წინადადებით არავის მოუმართავს, თავადაც არაფერი გადამიწყვეტია და არც ჩემს მენეჯერთან მილაპარაკია".

გასულ უქმეებზე დასრულებულ შვედურ სეზონში ხარაიშვილმა "გიოტებორგის" მაისურით 28 მატჩი ჩაატარა, 7 გოლი გაიტანა და საუკეთესო ბომბარდირებში მხოლოდ რობინ სოდერს (14 გოლი) ჩამორჩა, ხოლო 8 საგოლე პასით ამ ნომინაციაში პირველ ადგილზე გავიდა.

1652
მკითხველის კომენტარები / 0 /
მსგავსი ამბები
რუბრიკის სხვა სიახლეები
;