ახალი სტემფორდ ბრიჯი - ყველაზე ძვირი სტადიონი ევროპაში

"ჩელსი" ასპარეზზე მორიგი სუპერპროექტით გამოდის. ლონდონური კლუბი ევროპაში ყველაზე ძვირ სტადიონს ააშენებს. რა თქმა უნდა, ეს მნიშვნელოვანი მომენტი საფეხბურთო საზოგადოებაში დიდ ყურადღებას იქცევს...

რად უნდა ჩელსის ახალი სტადიონი?

"ჩელსი" ერთადერთი ინგლისური ტოპკლუბია, რომელიც თამაშობს წინა საუკუნეში აშენებულ სტადიონზე. "მანჩესტერ სიტი" (2003 წელს) და "არსენალი" (2006) კარგა ხანია გადავიდნენ ახალ არენებზე. "ტოტენჰემი" ამას წლეულს გააკეთებს.

"მანჩესტერ იუნაიტედმა" (2006) და "ლივერპულმა" (2016) სტადიონებს საფუძვლიანი რეკონსტრუქცია ჩაუტარეს. და დარჩა მხოლოდ "სტემფორდ ბრიჯი", სადაც გასული საუკუნის 90-იანი წლების შემდეგ არაფერი შეცვლილა...

ტურნიკეტები შესასვლელში, ერთმანეთთან ძალიან ახლოს მდებარე ტრიბუნები და თითქმის ნულოვანი დაშორება მინდორთან - ყოველივე ეს, რა თქმა უნდა, ძალიან კარგია.

40-ათასიანი სტადიონი უკვე კარგა ხანია, ვერ ახერხებს ყველა მსურველის დატევას. ფაქტია, ლონდონური სუპერკლუბი გამოიმუშავებს იმაზე ნაკლებს, ვიდრე შეუძლია.

ფინანსური ანალიზის მიხედვით ირკვევა, რომ "ჩელსი" უშუალოდ სტადიონიდან 30 მილიონი ფუნტით ნაკლებს იღებს, ვიდრე "არსენალი" და 37 მილიონით ნაკლებს, ვიდრე "მანჩესტერ იუნაიტედი".

ამ პრობლემის გადაჭრას კლუბში დიდი ხანია, გეგმავენ. ჯერ კიდევ 2011 წელს "ჩელსი" მდინარე თემზის მარჯვენა ნაპირზე აპირებდა გადაბარგებას, მაგრამ ამ საქმიდან არაფერი გამოვიდა - "არისტოკრატები" მალაიზიური კომპანიის განაცხადთან დამარცხდნენ.

"ჩელსიში" გაიმარჯვა იდეამ, რომლის მიხედვითაც ახალი "სტემფორდ ბრიჯი" ძველის ადგილას უნდა აშენდეს და ის ევროპაში ყველაზე ძვირად ღირებული უნდა იყოს. რომან აბრამოვიჩი მზადაა, ამ გრანდიოზულ პროექტს თუნდაც მილიარდი ფუნტი დაახარჯოს. ვარაუდობენ, რომ ოლიგარქი ამ პროექტით ჩინელ ინვესტორებსაც დააინტერესებს.

რატომ ღირს მილიარდი ახალი სტემფორდ ბრიჯი?

მოკლედ, ძველი "სტემფორდ ბრიჯი" მთლიანად დაინგრევა. მის ადგილზე აშენდება ამავე სახელწოდების სტადიონი, რომელიც 60 ათას მაყურებელს დაიტევს. დიზაინზე იმუშავა ცნობილმა შვეიცარიულმა კომპანიამ, რომელმაც შექმნა "ალიანც არენა" (მიუნხენი), "მატმუტ ატლანტიკი" (ბორდო) და "ოლიმპიაშტადიონი" (ბერლინი).

ჩვენს მკითხველს საშუალება აქვს, ნახოს როგორ გამოიყურება ახალი "სტემფორდ ბრიჯი". ტრიბუნები 3-იარუსიანი გახდება, ძველ ფასადს კი შეცვლის 264 ქვის კოლონა.

პროექტის ერთ-ერთი მთავარი ნაწილია VIP-ლოჟის სერიოზულად გაფართოება. ამ დროისთვის სტადიონზე სულ 4 500 ელიტური ადგილია, ახალ სტადიონზე კი ასეთი 17 ათასი იქნება.

2017 წლის მარტში პროექტს მწვანე შუქი აუნთო ლონდონის მერმა სადიკ ხანმა. სამუშაოები 2020 წლიდან დაიწყება...

ყოველდღიური სპორტული გაზეთი "ლელო"
2364
მკითხველის კომენტარები / 2 /
დავითი
0
აღარ მეგონა ბათუმის სტადიონზე ძვირი რომელიმე სტადიონი თუ დაჯდებოდა :)
კაჭკაჭი
1
რაც უფრო ძვირია სტადიონის მშენებლობის ფასი, მით უფრო მომგებიანია კლუბის მფლობელისათვის, ასე რომ, 2 მილიარდი დოლარიც რომ დაჯდეს არ გაგიკვირდეთ :) მშენებლობა ყვლეფარს ჩამოწერს.
მსგავსი ამბები
რუბრიკის სხვა სიახლეები
;