...ახლა თავისუფალი დრო ბევრი მაქვს და მეუღლეს სამზარეულოშიც ვეხმარები!.. გიორგი მერებაშვილი ვისლას ისტორიულ სიმბოლურ ნაკრებში დაასახელეს...

გიორგი მერებაშვილი პლოცკის "ვისლას" ყველა დროის 11 საუკეთესო ლეგიონერს შორის დაასახელეს, - ასეთ ინფორმაციას ავრცელებს პოლონური ექსტრაკლასას (უმაღლესი ლიგა) კლუბი.

11 საუკეთესო გამოკითხვის შედეგად გამოავლინეს. ხმის მიცემა 6 დღის განმავლობაში მიმდინარეობდა "ვისლას" "ფეისბუქსა" და "ტვიტერზე". სულ გამოკითხვაში 1500-ზე მეტ გულშემატკივარი მონაწილეობდა. საბოლოოდ, კლუბის ისტორიაში საუკეთესო 11 უცხოელს შორის, ქართველის გარდა, მოხვდნენ ფეხბურთელები გერმანიიდან, სერბეთიდან (2), ჩერნოგორიიდან, ესპანეთიდან, ნიგერიიდან, ჩეხეთიდან, ბულგარეთიდან, ბრაზილიიდან და გვინეიდან.

აღსანიშნავია, რომ პლოცკის "ვისლას" ფორმით მათ ჯამში 757 მატჩი ჩაატარეს და 90 გოლი გაიტანეს, ამ გოლების მეოთხედი კი მერებაშვილის ანგარიშზეა - 33 წლის შემტევმა ნახევარმცველმა 116 მატჩში 22 ბურთი შეაგდო. "ვისლას" ვებგვერდმა მერებაშვილთან მცირე ინტერვიუ ჩაწერა:

- როგორ ატარებთ დროს დღევანდელ სიტუაციაში?

- ძალიან მოწყენილი ვარ. ურთულესი დრო უდგას მსოფლიოს, თითოეულ ადამიანს... ვცდილობ, მთელი დღე სახლში გავატარო. გარეთ გავდივარ მხოლოდ აუცილებლობის შემთხვევაში - როცა პროდუქტები მაქვს საყიდელი.

- ფიზიკურ აქტივობას ხართ მიჩვეული და ადვილი წარმოსადგენია, რომ გიჭირთ ამ მდგომარეობაში ყოფნა. რას აკეთებთ დღის განმავლობაში?

- ბევრი თავისუფალი დრო მაქვს და ვცდილობ, ეს დრო ძირითადად კითხვას დავუთმო. თუმცა არ მავიწყდება, რომ ფორმა უნდა შევინარჩუნო და დღის გარკვეულ მონაკვეთში ვვარჯიშობ, საღამოთი ტელევიზორს ვუყურებ... მოკლედ, ვცდილობ, არ მოვიწყინო... საერთოდ, ყველანაირ ნეგატივში არის პოზიტივიც და ამ პანდემიასაც აქვს თავისი პლუსი - უჩვეულოდ დიდ დროს ვატარებთ ოჯახებში. აქ არის ჩემი მეუღლე, რომელსაც ამას წინათ სამზარეულოში დავეხმარე. აქამდე ამას იშვიათად ვაკეთებდი, არ ვარ პროფესიონალი ამ საქმეში, მაგრამ როცა ამდენი თავისუფალი დრო გაქვს... ისე, მე და ჩემი მეუღლე რესტორნებში სიარულს ყოველთვის ვამჯობინებდით კერძების შინ მომზადებას.

- საინტერესოა, რა სახის ვარჯიშებს აკეთებთ შინ?

- ყველა ფეხბურთელს თავის გეგმა აქვს. მე პირადად, ბევრ ვარჯიშს ვაკეთებ მუცლის, მხრებისა და ზურგის კუნთებისთვის. საერთოდ, ვცდილობ, ყველა მთავარი კუნთი მუდმივად ვამუშაო... მაგრამ ესეც ძალიან მოსაწყენია - მარტო ვარჯიშობ, ვარჯიშობ, ვარჯიშობ და ერთ მატჩსაც ვერ თამაშობ... თუმცა რას ვიზამთ, ასეთია დღევანდელი რეალობა - იმდენად მიყვარს ფეხბურთი, მზად ვარ, ასეთ პირობებშიც, შეძლებისდაგვარად, ვიზრუნო ფორმის შენარჩუნებაზე. იმედი მაქვს, ცხოვრება მალე ისევ ნორმალურ კალაპოტში ჩადგება, მათ შორის, ფეხბურთიც.

- დასრულდა გამოკითხვა "ვისლას" ყველა დროის ლეგიონერთა სიმბოლური ნაკრების შესადგენად. გარემარბებს შორის ხმათა უმრავლესობა მიიღეთ და კლუბის 11 საუკეთესო უცხოელს შორის მოხვდით. "ვისლას" ქომაგებს ძალიან უყვარხართ. რას ნიშნავს ეს თქვენთვის?

- ძალიან მსიამოვნებს ამ სიტყვების მოსმენა. ქომაგების მხრიდან ასეთი დამოკიდებულება ჩემთვის ბევრს ნიშნავს და ბედნიერი ვარ, რომ ამ შესანიშნავი კლუბის ნაწილს წარმოვადგენ. სადაც არ უნდა ვიყო, "ვისლას" ლურჯ-თეთრი ფერები ყოველთვის ჩემს გულში იქნება. არაერთხელ მითქვამს და კიდევ ერთხელ ვიტყვი - მზად ვარ, ბოლომდე დავიხარჯო ამ გუნდისა და ამ ქალაქისთვის!.. მინდა თითოეულ გულშემატკივარს დიდი მადლობა გადავუხადო, რადგან მათ გარეშე ფეხბურთს, უბრალოდ, აზრი არ აქვს. ფანები გვაძლევენ მოტივაციას იმისთვის, რომ მსაჯის საფინალო სასტვენამდე ვიბრძოლოთ. მოუთმენლად ველი მათთან სტადიონზე შეხვედრას!.. მანამდე კი მინდა მოვუწოდო მათ - დავრჩეთ სახლებში და როგორმე გავუძლოთ ამ რთულ დროს! ყოველგვარი პანიკის გარეშე! დავუჯეროთ რეკომენდაციებს, რათა ხელი არ შევუწყოთ ვირუსის უფრო მეტად გავრცელებას. თუ ამას გავაკეთებთ, ფეხბურთიც მალე დაგვიბრუნდება!..

2015
მკითხველის კომენტარები / 0 /
მსგავსი ამბები
რუბრიკის სხვა სიახლეები
;