ახლოს ვართ ისტორიულ შედეგთან... ბირთვის კვრაში [+Video]

ბირთვის კვრა ისეთი სახეობაა, მასზე ქართველებმა უფრო მეტი ცნობილი კინოფილმიდან ვიცით. ამ სახეობაში დიდი წარმატებები არ გვქონია და ცალკეულ სპორტსმენთა გაელვებაზე სწორედ იმ პოპულარული კინოფილმის პერსონაჟი გვახსენედება. 

გორი სპორტული ქალაქია, თუმცა გამორჩეულ წარმატებებს გორელები საჭიდაო სახეობებში მოიმკიან, მაგრამ ამ ქალაქმა კიდევ ერთხელ დაამტკიცა, რომ სპორტული წარმატებების თვალსაზრისით მას კიდევ უფრო დიდი პოტენციალი აქვს. 

სრულდება ის დრო, როდესაც გორელები ოლიმპიურ თამაშებზე მხოლოდ ძიუდოსა და თავისუფალ ჭიდაობაში გამოდიოდნენ. ძალიან ახლოს ვართ იმასთან, რომ ტოკიოს ოლიმპიადაზე საქართველოს სახელით გორელი ბირთვის მკვრელი გიორგი მუჯარიძე ვიხილოთ. 

ახლა კი უფრო კონკრეტულად ამ თემაზე...  

დღეს გორელმა ბირთვის მკვრელმა გიორგი მუჯარიძემ საქართველოს ზამთრის ღია ჩემპიონატზე მძლეოსნობაში ბირთვი 21 მეტრსა და 21 სანტიმეტრზე გადააგდო.
მუჯარიძის შედეგი ისტორიულია, რადგან ამით იგი ტოკიოს წლევანდელი ოლიმპიადის ლიცენზიის მფლობელი ხდება.

თუმცა ჯერ უნდა დაველოდოთ მსოფლიო მძლეოსნობის ასოციაციის მიერ დღეს თბილისში ნაჩვენები შედეგის ოფიციალურ დადასტურებას, რაც უახლოეს დღეებში მოხდება.

ამის გარდა, მარტში ლეირიაში (პორტუგალია) ჩატარდება ევროპის თასი ტყორცნებში, სადაც ასევე იასპარეზებს მუჯარიძე და იქაც კიდევ ერთხელ მიეცემა საშუალება რომ გაიმეოროს თავისი შედეგი.

გიორგი მუჯარიძე 21 წლის გახლავთ. მისი ტალანტი აღმოაჩინა და ბირთვის კვრაში დააოსტატა შოთა ჩოჩიშვილის სახელობის კომპლექსური სპორტული სკოლის მძლეოსნობის სექციაში მოღვაწე მწვრთნელმა გივი იაზბარიანმა. ბოლო წლებია მუჯარიძე საქართველოს ნაკრებთან ერთად ვარჯიშობს, სადაც მისი პირადი მწვრთნელი დავით მანთიძეა.

მუჯარიძე საქართველოს არაერთგზის ჩემპიონი გახლავთ, ახალგაზრდებში ევროპის მცირე ერების ჩემპიონატის გამარჯვებული და ტყორცნებში ევროპის 23 წლამდელთა თასის გამარჯვებულია. 

3019
მკითხველის კომენტარები / 0 /
მსგავსი ამბები
რუბრიკის სხვა სიახლეები
;