ბადრი კვარაცხელია: ევროპის ლიგამდე აუცილებლად გავძლიერდებით

"სამტრედიამ" ბოლო სამ სეზონში ყველა შესაძლო ტიტული მოიპოვა - ჯერ ვიცე-ჩემპიონი გახდა, შემდეგ - ჩემპიონი და სუპერთასის მფლობელი, გასული სეზონი კი ბრინჯაოს მედლით დაასრულა.

სამწუხაროდ, ეს ტრიუმფალური სვლა წელს შეჩერდა და "სამტრედიასთვის" სეზონი კარგად ვერ აეწყო. სეზონის დაწყებიდან მალე გუნდის მთავარი მწვრთნელი შეიცვალა და "სამტრედია" ბადრი კვარაცხელიამ ჩაიბარა - 53 წლის სპეციალისტმა, რომელსაც უმუშავია ბოლნისის "სიონში", სუმგაითის "სტანდარტში", ცხინვალის "სპარტაკში", "გაბალაში", "თურანში", ლანჩხუთის "გურიასა" და მარტვილის "მერანში".

მართალია, 10 ტურის შემდეგ სამტრედიელები 7 ქულით მე-7 ადგილზე არიან. მაგრამ ფაქტია, რომ ბოლო 5 შეხვედრიდან გუნდმა მხოლოდ 1 წააგო და 2 გოლი გაუშვა, 4 ფრედ დაასრულა და ვარდნა შეაჩერა.

"ლელომ" ბადრი კვარაცხელიას ინტერვიუ ჩამოართვა - ცხადია, დავინტერესდით, რა სიახლეებს უნდა ველოდოთ გუნდში, რომელიც საქართველოს ევროპის ლიგაზე წარმოადგენს, აპირებენ თუ არა გაძლიერებას...

სირთულეების არასოდეს შემშინებია

- გუნდი ისეთ მძიმე დროს ჩაიბარეთ, როდესაც "სამტრედიაში" მისვლას ბევრი ვერ გარისკავდა.

- რთული ვითარება იყო და დალხენილები არც ახლა ვართ, რადგან 7-8 მოთამაშე დაშავებული იყო და ცხადია, ამან გუნდსა და შედეგებზე გავლენა მოახდინა.

მაგრამ სირთულეების არასოდეს შემშინებია და წინადადებას ამიტომაც დავთანხმდი. გუნდში ვხედავდი პოტენციალს, ხელმძღვანელობის მონდომებას და ამ ნაბიჯს არ ვნანობ.

- ჯერ ის შედეგი არაა, რაც სამტრედიელ გულშემატკივრებს გაახარებს, მაგრამ მთავარია, რომ ვარდნა შეჩერდა.

- ნამდვილად ვერ ვიტყვი, რომ სასურველი შედეგი დავდეთ. ამ ხუთ შეხვედრაში ჯერ მხოლოდ ერთი გოლი გავიტანეთ და ისიც ბოლო ტურში "ლოკომოტივთან" და ბუნებრივია, ასეთი დაბალი შედეგიანობით კმაყოფილი ვერ ვიქნები. თუმცა, არსებული ვითარებიდან გამომდინარე, ბევრი ფაქტორი მაიმედებს.

- მაგალითად?

- მთავარია, რომ დაცვა დავალაგეთ და ბოლო 5 შეხვედრაში მხოლოდ 2 ბურთი გავუშვით. წარუმატებელი სტარტის შემდეგ ეს პატარა საქმე არ იყო. ამავე დროს, ბოლო შეხვედრაში "ლოკომოტივთან" ბევრი მომენტი შევქმენით.

ადრე თუ გვიან ეს შედეგს გამოიღებს და დარწმუნებული ვარ, ვითარებას მეორე წრეში აუცილებლად გამოვასწორებთ. ახლა მთავარია, დიდი სხვაობით არავის ჩამოვრჩეთ - წინ 26 ტურია და დაწევა შესაძლებელია. ხელის ჩაქნევას არ ვაპირებთ და დარწმუნებული ვარ, "სამტრედია" პოზიციას მალე დაიბრუნებს.

თავისუფალი ფორვარდის
მოძებნა ძალიან ძნელია

- ახლა ურთულესი ამოცანა გაქვთ: გუნდი უნდა დაალაგოთ და ევროთასებზე გახვიდეთ...

- ბუნებრივია, გუნდის ხელმძღვანელობა მხოლოდ ამაზე ფიქრობს, რომ გავძლიერდეთ და საქართველო ევროპალიგაზე ღირსეულად წარმოვაჩინოთ - პლუს, ეროვნულ ლიგაშიც პოზიციები დავიბრუნოთ.

- ოლაიტანი ევროპალიგაზე ითამაშებს?

- მეორე ტურში რომ დაშავდა, მას შემდეგ ვეღარ გვეხმარება. მაგრამ ახლა ისიც რეაბილიტაციას გადის და სავარაუდოდ, პირველი ნახევრის ბოლომდე ვერ დაგვეხმარება. ევროსეზონამდე კი, ძნელი სათქმელია, მოახერხებს თუ არა ფორმის აღდგენას - ეს მაინც ინდივიდუალური საკითხია და წინასწარ ვერაფერს ვიტყვი.

- ფაქტია, სასწრაფოდ თავდამსხმელი გჭირდებათ...

- რა თქმა უნდა - ამაზე ხელმძღვანელობა უკვე მუშაობს. თანაც, გვინდა არა ერთი, არამედ, ორი თავდამსხმელი. მაგრამ ახლა სეზონი მთავრდება და თავისუფალი თავდამსხმელის მოძებნა ძალიან ძნელი აღმოჩნდა. თუმცა, ევროთასებამდე გავძლიერდებით და დიდი იმედი მაქვს - ყველა რგოლში.

- სხვაგვარად, ევროპაში თამაშს აზრი არ ექნება.

- რა თქმა უნდა. ეს ყველაზე მეტად "სამტრედიას" ხელმძღვანელებს ადარდებთ.

ნდონგი ჩვენ
არ გაგვიშვია

- მოკლედ, კადრების მიმართულებით ბევრი სამუშაო გაგაჩნიათ.

- თუმცა, ამას ობიექტური მიზეზებიც გააჩნია. ჩვენი ერთადერთი თავდამსხმელი მაიკლ ოლაიტანი დაშავებულია. მის ნაცვლად გამოუცდელ გიორბელიძეს და ხაბეიშვილს ვათამაშებთ, რომლებიც აქამდე დუბლებსა და 19-წლამდელთა ლიგებში გამოდიოდნენ.

- ივან ფატიჩი გუნდს როდის დაეხმარება?

- სხვათა შორის, ფატიჩი ტრავმამდეც გამაყუჩებლით თამაშობდა. მერე პრობლემა გაუმიზეზდა და მკურნალობა დასჭირდა. რეაბილიტაცია ახლახან დაასრულა და გუშინ გუნდთან ერთად ივარჯიშა. ნელ-ნელა სრულ დატვირთვებზეც გადავა. მაგრამ ძნელი სათქმელია, ფორმაში როდის შევა.

- საინტერესოა, ასეთი საკადრო დეფიციტის დროს ანრი ნდონგი რატომ გაუშვით?

- მისი ინტერვიუ წავიკითხე და გაკვირვებული ვარ - ვინ გაუშვა?!

- თავისით წავიდა?

- ნდონგი ხელმძღვანელობას დაელაპარაკა და გათავისუფლება თავად სთხოვა. ეს მისი ინიციატივა იყო და არა "სამტრედიას". ამის შემდეგ ასეთი კომენტარი, სულ მცირე, უცნაური იყო.

- თქვენ მისი გადარწმუნება არ გიცდიათ?

- ფეხბურთელს წასვლა რომ უნდა, იმას ძალით ვერ დავტოვებთ. ეტყობა, სამტრედია არ მოსწონდა და თავადაც აღიარა, რომ სამი გუნდი იწვევდა. ასე რომ, "სამტრედიასკენ" ხელის გამოშვერა გაუგებარია.

გუნდში ჯანსაღი გარემოა

- უახლოესი ტურის თამაშზე ვილაპარაკოთ - ხვალ ბოლნისის "სიონს" ხვდებით, რომელიც თქვენი უშუალო კონკურენტია.

- დიახ, კონკურენტია და ურთულესი თამაში გველოდება. სატურნირო მდგომარეობიდან გამომდინარე, რეალურად, ეს 6-ქულიანი თამაში იქნება. ჩვენს საწინააღმდეგოდ ის ფაქტორი მოქმედებს, რომ გასვლაზე ვთამაშობთ და საკადრო პრობლემები გვაქვს.

მაგრამ არა მგონია, პრობლემები მხოლოდ ჩვენ გვაწუხებდეს. მოკლედ, ამ მატჩისთვის განსაკუთრებული მონდომებით ვემზადებით.

- გუნდში ვითარება დალაგდა?

- არეული არც ყოფილა. თამამად ვიტყვი, ახლა გუნდში არანაირი დაძაბულობა არაა და ჯანსაღი ვითარებაა. მთავარია, გუნდი საკუთარ არენაზე დროულად დაბრუნდეს.

"სამტრედია" საკუთარ მოედანზე სულ სხვა გუნდია. ყველამ იცის, სამტრედიელებს ფეხბურთი როგორ უყვართ - ხალხი გასვლით თამაშებზე სულ დაგვყვება. მაგრამ ისიც ცხადია, რომ სხვა ქალაქში იმდენი ხალხი ვერ ივლის, რამდენიც საკუთარ სტადიონზე.

- "ეროსი მანჯგალაძეზე" დაბრუნება უახლოეს პერიოდში რეალურია?

- მუშაობა მიდის და რაც ვიცი, მოედანი მზად იქნება. საკუთარ სტადიონზე თამაში გუნდზე სასიკეთოდ რომ იმოქმედებს, ამაზე ორი აზრი არ არის.

ყოველდღიური სპორტული გაზეთი "ლელო"
1294
მკითხველის კომენტარები / 0 /
მსგავსი ამბები
რუბრიკის სხვა სიახლეები
;