ბაზაძე საუკეთესო ათეულში 

უნგრეთის დედაქალაქ ბუდაპეშტში დღეს დამთავრდება მოფარიკავთა მსოფლიოს ჩემპიონატი, ქართველი მუშკეტერებისთვის კი შეჯიბრება გუშინ დასრულდა. 

საფარიკაო ბილიკებზე ძალებს ცდიდნენ მოხმალავე ქალთა გუნდები. საქართველოს ნაკრები (თეოდორა კახიანი, ლიკა ჯიჯეიშვილი, დარია ანტონოვა) სტარტზე რუსეთის ძლიერ ნაკრებს დაუპირისპირდა.

სლავები პირველი ორთაბრძოლებიდანვე დაწინაურდნენ. მართალია, ბოლო ორ პაექრობაში ლიკა ჯიჯეიშვილმა იანა ეგორიანს 7:5 სძლია, ხოლო თეოდორა კახიანმა სახელოვან მოფარიკავეს - ოლიმპიური თამაშების ჩემპიონსა და ორგზის ვერცხლის პრიზიორს, პირადსა და გუნდურში მსოფლიოს შვიდგზისა და ევროპის 14-გზის ჩემპიონ სოფიო ველიკაიას 9:5 მოუგო, მაგრამ საერთო წარმატებისთვის ეს საკმარისი არ აღმოჩნდა - საქართველოს ნაკრებმა 34:45 დათმო მატჩი და საბოლოოდ 31-ე ადგილზე გავიდა... 

მართალია, მსოფლიოს ჩემპიონატი ჯერ არ დასრულებულა, მაგრამ უნგრული ბატალიების გათვალისწინებით ფარიკაობის საერთაშორისო ფედერაციამ უკვე შეიტანა ცვლილებები მსოფლიოს კლასიფიკაციაში.

მოხმალავე სანდრო ბაზაძემ ინდივიდუალურში მსოფლიოზე მოპოვებული ქულებით წინა მონაგარი გაიმდიდრა და ახლა 126 ქულით ფრანგ ბოლად აპიტნისთან ერთად მერვე-მეცხრე ადგილებს იყოფს. შეიცვალა ლიდერიც - 2019 წლის კორეელმა მსოფლიოს ჩემპიონმა სანგუკ ოჰმა ამერიკელ ელი დერშვიცს გაუსწრო და მოხმალავე ვაჟთა სათავეში გადაინაცვლა.

პირველი ათეული კი ასეთია: 1. სანგუკ ოჰი (კორეა, 290 ქულა), 2. ელი დერშვიცი (აშშ, 210), 3. მაქს ჰარტუნგი (გერმანია, 210), 4. ლუკა კურატოლი (იტალია, 179), 5. არონ სილადი (უნგრეთი, 146), 6. კამილ იბრაგიმოვი (რუსეთი, 135), 7. ვენიამინ რეშეტნიკოვი (რუსეთი, 134), 8. ბოლად აპიტნი (საფრანგეთი, 126), 9. სანდრო ბაზაძე (საქართველო, 126), 10. მოჯთაფა აბედინი (ირანი, 115)... 47. მიხეილ მარდალეიშვილი (33.00 ქულა), 73. ბექა ბაზაძე (20.50), 112. ნიკა შენგელია (11.75), 203. ვაჟა რეჭია (4.25), 254. საბა სულამანიძე (2.00).

დანარჩენ დისციპლინებში ქართველთა მაჩვენებლები: ხმალი, ქალები: 67. თეოდორა კახიანი (23.25), 79. ლიკა ჯიჯეიშვილი (19.00), 212. დარია ანტონოვა (3.00); რაპირა, ვაჟები: 108. ლუკა ღაღანიძე (13.00), 110. ლაშა გალუაშვილი (12.88); დაშნა, ქალები: 200. მაია გუჩმაზოვა (5.75).

ყოველდღიური სპორტული გაზეთი "ლელო"
226
მკითხველის კომენტარები / 0 /
მსგავსი ამბები
რუბრიკის სხვა სიახლეები
;